ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެރިކަމުގެ ދެވަނަ ދައުރަކަށް ހޮވޭނީ ވަރަށް ގިނަ ހެޔޮލަފާ އަޅުންގެ ދުއާތަކުގެ ބަރަކާތާއިއެކު ކަމަށް ހޯމް މިނިސްޓަރ އަދި އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.
އިމްރާން މިފަދައިން ވިދާޅުވެފައިވަނީ އޭނާ ކުރެއްވި ޓްވީޓެއްގައެވެ.
އެގޮތުން އިމްރާން ވިދާޅުވީ ރުޅި އަންނަ މީހަކު ރުޅި އަޔަސް، މަލާމަތް ކުރާ މީހަކު މަލާމަތް ކުރިޔަސް، ރައީސް ޞާލިހު ވެރިކަމަށް އައީ އަމާންކަމާ އެކު ކަމަށެވެ.
އަދި އެމަނިކުފާނު ދައުރެއް ފުރިހަމަ ކުރައްވަނީވެސް ﷲގެ ރަހުމަތާއެކު ކަމަށް އިމްރާން ވިދާޅުވިއެވެ.
މިއާއިއެކު ރައީސް ޞާލިހު ވެރިކަމުގެ ދެވަނަ ދައުރަކަށް ހޮވޭނީވެސް ވަރަށް ގިނަ ހެޔޮލަފާ އަޅުންގެ އިޚްލާސްތެރި ހެޔޮ ދުއާތަކުގެ ބަރަކާތާއިއެކު ކަމަށް އިމްރާން ވިދާޅުވިއެވެ.
ސަރުކާރުގެ ކޯލިޝަންގެ މިހާރުގެވެސް ބައިވެރިއެއް ކަމަށްވާ އަދާލަތު ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހަށްް ތާއީދުކޮށް އެމަކުފާނާއިއެކު ކޯލިޝަން ހެދުމަށް ނިންމާފައެވެ.
އެގޮތުން އެމަނިކުފާނުގެ ރިޔާސީ ކެމްޕެއިންއަށް ށ އަތޮޅުގެ ރަށްތަކަށް ކުރެއްވި ދަތުރުފުޅުގައި އިމްރާން ވަނީ ބައިވެރިވެ ވަޑައިގެންފައެވެ.
އަދި އެ އަތޮޅު ފޯކައިދޫގައި ބޭއްވުނު ރަސްމިއްޔާތެއްގައި ވާހަކަދައްކަވަމުން އިމްރާން ވަނީ އުފާވެރި ރާއްޖެއެއް ލިބޭނީ ރައީސް ޞާލިހު އާއި އެކު ކަމަށް ކޮންމެ ދިވެއްސެއްވެސް ގަބޫލު ކުރާ ކަމަށް ވިދާޅުވެ ސަރުކާރާއި ދެކޮޅު ފަރާތްތަކަށް ފާޑުކިޔާފައެވެ.
Advertisement
This content is created and paid for by advertisers and does not involve Voice Journalists
