ދިވެހިރާއްޖެ މިވަނީ ނަބީ ބޭކަލަކު ބޭނުންވާ މިންވަރަށް ފަސާދަވެފައި ކަމަށް ކުރީގެ ބަންޑާރަ ނާއިބު ދިޔާނާ ސައީދު ވިދާޅުވެއްޖެއެވެ. 

ދިޔާނާ މިފަދައިން ވިދާޅުވީ އެމްއެމްޕީއާރުސީ ޚިޔާނާތުގެ މޭސްތިރިޔާ ކުރީގެ ނާއިބު ރައީސް އަހުމަދު އަދީބު ރާއްޖެއިން ބޭރަށް ފުރުމަށް ކަރެކްޝަންސްއިން ހުއްދަ ދިން ޚަބަރާއި، ޖިންސީ ގޯނާގެ ދައުވާ ތަކެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޖަލު ހުކުމް ބާތިލް ކުރުމާއިއެކު އޭނާ ރާއްޖެ އައި ޚަބަރާއި، އަދި ހައިކޯޓުގެ ފަނޑިޔާރުން ޗުއްޓީ ނެގުމާއި ގުޅިގެން ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ އިސްތިއުނާފް މައްސަލަ މަޑު ޖެހުނު ޚަބަރާއި ގުޅިގެން ކަންބޮޑުވުން ފާޅުކުރައްވައި ކުރެއްވި ޓުވީޓެއްގައެވެ. 

އެގޮތުން ދިޔާނާ ވިދާޅުވީ، ގައުމެއް މިވަރަށް ފަސާދަ ވެއްޖެނަމަ، އެތަނަށް ދެން ބޭނުންވާނީ ނަބިއްޔަކު ކަމަށް މުސްކުޅިން ބުނެއުޅޭ ކަމަށެވެ. އެހެންނަމަވެސް، މިއީ ފަހު ޒަމާނަށް ވުމުން، އެކަން ނުވާނެ ކަމަށާ، އޭގެ ބަދަލުގައި ދެން ކުރެވެން އޮންނާނެ ކަމަކީ ރަސޫލާ ޞައްލައްالله ޢަލައިހި ވަސައްލަމް ގެ ރިސާލަތު ދިރުވުން ކަމަށްވެސް އޭނާ ވިދާޅުވި އެވެ.

"އެކަން ކުރަން މިތަނުގައި ތިބި ގިނަ މީހުން ވެސް ތިބީ މި ފަސާދައަށް ގެނބި ނިމިފައި." ދިޔާނާ ވިދާޅުވިއެވެ.

ދިޔާނާ މިފަދައިން ވިދާޅުވެފައި ވާއިރު، ދައުލަތުގެ ތިން ބިލިއަން ރުފިޔާއަށް ވުރެ ގިނަ ފައިސާއަށް ހިޔާނާތްތެރިވި އަދީބު، ބޭސްފަރުވާއަށް ރާއްޖޭން ބޭރަށް ފުރުމުގެ ހުއްދަ ސަރުކާރުން ދިނުމާއި އެކު އޭނާ ވަނީ މިހާރު ސިންގަޕޫރަށް ފުރާފައެވެ. 

އަދީބު ފުރި އިރު، ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރުމާއި ޖިންސީ އަނިޔާ ދިނުމާއި ރޭޕްކުރަން އުޅުމާއި ބޭއަދަބީ ގޮތުގައި ޖިންސީ ގުނަވަން ހާމަކުރުމާއި ހުއްދަ ނޫން ޖިންސީ މުއާމަލާތެއް ހިންގުމުގެ ދައުވާ އުފުލާފައިވަނިކޮށް، ބޭސްފަރުވާއަށް ކަމަށް ބުނެ ރާއްޖެއިން ބޭރަށް ދިޔުމަށްފަހު، އެ ދައުވާ އަނބުރާ ގެންދިޔުމުން އިއްޔެ އަލީ ވަހީދު ވަނީ އެނބުރި ރާއްޖެ އައިސްފައެވެ. 

އަދި ކުރީގެ ރައީސް ޔާމީން 11 އަހަރަށް ޖަލަށް ލާން ކޮށްފައިވާ ހުކުމުގެ އިސްތިއުނާފު އަޑުއެހުންތަކުގެ ހުކުމް ކުރުމާއި ގާތް ވެފައި ވަނިކޮށް މައްސަލަ ބައްލަވާ ދެފަނޑިޔާރެއްގެ ޗުއްޓީގެ ސަބަބުން ޝަރީއަތް ކުރިއަށް ނުގެންދެވި ރިޔާސީ އިންތިހާބަށް ކުރިމަތިލާ މުއްދަތު ހަމަވުމުގެ ކުރިން މައްސަލަ ނިމުމުގެ އެފުރުސަތު ވަނީ ކުޑަވެފައެވެ.