ވެރިކަންކުރާ މައި ޕާޓީ އެމްޑީޕީގެ މީސް މީޑިއާ އެކްޓިވިސްޓެއްގެ ގޮތުގައި ހަރަކާތްތެރިވި ޝަމްއޫން ޖަލީލް (ލޫކަސް ޖަލީލް) ސަރުކާރުގައި އޭނާ އަދާކުރި ސިޔާސީ މަގާމުން އިސްތިއުފާ ދީފިއެވެ.
އެގޮތުން އިސްތިއުފާ ދެއްވިކަން ހާމަ ކުރައްވާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުއަށް ލިޔުއްވި ސިޓީގައި ވަނީ ސަރުކާރުގައި މަސައްކަތް ކުރުމުގެ ފުރުސަތަކީ ތަޖުރިބާއެއް ކަމަށް ފާހަގަކޮށް އަބަދުވެސް ބަހައްޓަވާ ގާތްކަމަށް ރައީސުލްޖުމްހޫރިއްޔާއަށް ޝުކުރު އަދާ ކޮށްފައެވެ.
އެހެންނަމަވެސް މިހާތަނަށް އަދާކުރައްވަމުން އައި ހެރިޓޭޖް މިނިސްޓްރީގެ ޑިރެކްޓަރެއްގެ މަގާމުން އިސްތިއުފާ ދީފައިވާ ވަކި ސަބަބެއް ހާމަ ކޮށްފައެއް ނެތެވެ.
މީސް މީޑިއާ ތެރޭގައި ދެކެވޭ ވާހަކަތަކުގެ ތެރޭގައި ލޫކަސް އިސްތިއުފާ ދީފައިވަނީ މިރޭ ދަ ޑިމޮކްރަޓަސްއަށް ރައީސް ނަޝީދު ސޮއި ކުރެއްވުމަށް ބާއްވާ ޖަލްސާގައި ލޫކަސް ވެސް އެ ޕާޓީއަށް ސޮއި ކުރުމަށް ކަމަށް ދަނީ ބުނަމުންނެވެ.
މީގެ ކުރިން ލޫކަސް ވަނީ ރައީސް އަބްދުالله ޔާމީން އަބްދުލްޤައްޔޫމްގެ ވެރިކަމާއި ޑރ. މުހައްމަދު ވަހީދުގެ ވެރިކަމުގައި އެމްޑީޕީ އިދިކޮޅު ޕާޓީއެއްގެ ގޮތުގައި އޮތްއިރު އެޕާޓީގެ ހަރަކާތްތަކުގައި އިސްކޮށް އުޅުއްވާ، މީސް މީޑިއާގައި ސަރުކާރުތަކާއި ދެކޮޅަށް އަޑުއުފުލާ ފާޑު ކިޔާ ހަދާފައެވެ.
އެގޮތުން 2016 ވަނަ އަހަރު ލޫކަސް ވަނީ މިކަމުގެ ސަބަބުން ހައްޔަރުކޮށް ޖަލަށްވެސް ލާފައެވެ.
ނަމަވެސް މި ވެރިކަމުގައި ރައީސް ޞާލިހާއި ރައީސް ނަޝީދާއި ދެމެދު އަދި ޕާޓީގެ މެމްބަރުންގެ ތެރޭގައި އުފެދުނު ހަމަނުޖެހުމާއި ބައިބައިވުމުގެ ތެރޭގައިވެސް ލޫކަސް ވަކި ކޮޅަކަށް އަރާ މީސް މީޑިއާގައި އަޑުއުފުލާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
