ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ދައުރު ނިންމާލީ އެންމެ ނާއިބު ރައީސްއަކާއެކު ކަމަށާއި މުހިއްމު މިނިސްޓްރީތަކުގެ މިނިސްޓަރުން ބަދަލެއް ނުކުރައްވާ ކަމަށް އެމްޑީއޭގެ ރައީސް އަޙްމަދު ސިޔާމް މުޙައްމަދު (ސަން ސިޔާމް) ވިދާޅުވެއްޖެއެވެ.

އެގޮތުން ރައީސް ޞާލިހަށް ތާއީދު ކުރައްވާ ކުރެއްވި ޓްވީޓުގައި ސިޔާމް ވިދާޅުވީ އެމަނިކުފާނުގެ 5 އަހަރުގެ މުޅި ދައުރު ނިންމާލީ އެންމެ ނާއިބު ރައީސްއަކާއެކު ކަމަށާއި މުހިއްމު މިނިސްޓްރީތަކުގެ މިނިސްޓަރުން އެމަނިކުފާނު ބަދަލު ނުކުރައްވާ ކަމަށެވެ.

އަދި ރައީސް ޞާލިހުގެ ދައުރުގައި ދިވެހިރާއްޖޭގެ ކޯޓުތަކަށް ނުފޫޒު ފޯރުވާތަނެއް ނުފެންނަ ކަމަށް ވެސް ސިޔާމް ވިދާޅުވިއެވެ.

Advertisement

މިއާއިއެކު މުޅި ގައުމު ހަމަޖެހި، ރާއްޖެއަށް ފަތުރުވެރިން ކުރި ޒިޔާރަތް ރިކޯޑް އަދަދަށް އަރާ، އާއިލާތަކަށް އުފާވެރިކަން ރައީސް ޞާލިހު ގެނެސްފައިވާ ކަމަށް ވެސް ސިޔާމް ފާހަގަކުރެއްވިއެވެ.

އަދި މިކަންކަމުން ރަމްޒުކޮށްދެނީ ރައީސް ޞާލިހުގެ ހިންގުންތެރިކަމާއި، ކެތްތެރިކަމާއި، ހިކްމަތްތެރިކަން ކަމަށް ސިޔާމް ވިދާޅުވިއެވެ.

މިއަހަރުގެ ރިޔާސީ އިބްތިޚާބަށް އެމްޑީއޭއިން ވަނީ ރައީސް ޞާލިހާއިއެކު ކޯލިޝަން ހަދައިފައެވެ. އަދި އެމަނިކުފާނު ކެމްޕެއިނަށް ކުރައްވާ ދަތުރުފުޅުތަކުގައި އެޕާޓީގެ ލީޑަރު ސިޔާމް ވަނީ ބައިވެރިވެ ވަޑައިގެންފައެވެ.