ޤައުމީ ވާޖިބަށް އިސްކަންދީ ޤައުމު އިތުރު 5 އަހަރު އިންޑިއާގެ ގޮހޮރަށްކާން ދޫކޮށްނުލުމަށް ޕީއެންސީގެ ނައިބު ރައީސް އަދި މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ދިވެހިރާއްޖޭގެ ފަނޑިޔާރުންނަށް ގޮވާލައިފިއެވެ.
އެގޮތުން ސައީދު މީސް މީޑިއާގައި ކުރެއްވި ޕޯސްޓެއްގައި ވިދާޅުވީ ކުރިއަށް އޮތް ރިޔާސީ އިންތިހާބަށް ނުފޫޒު ފޯރުވަން ސަރުކާރު ހިންގާ ޤައިރުޤާނޫނީ މައްސަލަތައް ބައިނަލްއަޤްވާމީ ފަރާތްތަކަށް ސާފުވާނެ ކަމަށެވެ.
އެގޮތުން ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެނޑިޑޭޓް ރައީސް އަބްދުﷲ ޔާމީން އަބްދުލްޤައްޔޫމްގެ އިސްތިއުނާފަށް ސަރުކާރުން ހުރަސްއަޅާ އެމަނިކުފާނުގެ އިންތިޙާބީ ޙައްޤަށް ހުރަސްއަޅަމުން މިނިވަން އިންސާފުވެރި އިންތިހާބެއް ނުބޭއްވޭނެކަން ހަމަ ހުރިހާ ފަރާތްތައްވެސް އިއްތިފާޤުވާ ކަމަށް ސައީދު ވިދާޅުވިއެވެ.
އަދި ރައީސް ޔާމީންގެ ސަޕޯޓަރުން އެފުރުސަތު ސަރުކާރަކަށް ނުވެސްދޭނެ ކަމަށް ވެސް ސައީދު ފާހަގަކުރެއްވިއެވެ.
މިއާއިއެކު ޤައުމީވާޖިބަށް އިސްކަންދީ ޤައުމު އިތުރު 5 އަހަރު އިންޑިއާގެ ގޮހޮރަށްކާން ދޫކޮއްނުލުމަށް ފަނޑިޔާރުންނަށް އިޙްތިރާމްއާއިއެކު ގޮވާލައްވާ ކަމަށް ސައީދު ވިދާޅުވިއެވެ.
މީގެ އިތުރުން މި މައްސަލަ ވާނީ ކޮމަންވެލްތުގެ ސަމާލުކަމަށްވެސް ގެނެސްފައި ކަމަށް ސައީދު ވަނީ ފާހަގަކުރައްވާފައެވެ.
ރިޔާސީ އިންތިޚާބަށާއި ރައީސް ޔާމީނުގެ ޝަރީއަތަށް ސަރުކާރުން ނުފޫޒު ފޯރުވަމުން އަންނަ ކަމަށް ބުނެ އިދިކޮޅުން އަންނަނީ ކޮންމެ ރެއަކު މުޒާހަރާ ކުރަމުންނެވެ.
Advertisement
This content is created and paid for by advertisers and does not involve Voice Journalists
