ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އުޅުއްވަނީ މިއަހަރު ބާއްވާ ރިޔާސީ އިންތިޚާބުގައި ވާދަކުރައްވާ އެހެން ކެންޑިޑޭޓުންނަށް ވުރެ މާ ކުރީގައި ކަމަށާއި، މި އިންތިޚާބުގައި އެމަނިކުފާނާއި އަރާ ހަމަ ނުކުރެވޭނެކަމަށް ހޯމް މިނިސްޓަރު އަދި ސަރުކާރުގެ ކޯލިޝަން ޕާޓުނަރު އަދާލަތު ޕާޓީގެ ރައީސް އިމްރާނު އަބްދުالله ވިދާޅުވެއްޖެ އެވެ.
އިމްރާނު މިފަދައިން ވިދާޅުވެފައިވަނީ ރައީސް ޞާލިހު މ އަތޮޅަށް ކުރައްވާ ކެމްޕޭނު ދަތުރުފުޅުގައި މ މުލަކުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.
އިމްރާނު ވިދާޅުވީ ރިޔާސީ އިންތިޚާބުގައި ރައީސުލްޖުމްހޫރިއްޔާގެ ކެމްޕޭނު ފެށި ރަށްތަކަށް ދަތުރުފުޅު ފައްޓަވާ ރައްޔިތުންނާއި ބައްދަލުކުރުމާއި ވައުދުފުޅުތައް ވިދާޅުވަމުން ގެންދިއުމުގެ މަސައްކަތްތައް ކުރައްވަމުން ދަނީ އެހެން ކެންޑީޑޭޓުންނަށް ވުރެ މާ ބާރު ސްޕީޑުގައި ކަމަށެވެ.
އިންތިޚާބުގައި ރައީސް ޞާލިހު މިހާރު ހުންނެވީ އެހެން ހުރިހާ ކެންޑިޑޭޓުންނަށް ވުރެ މާ ކުރިއަށް ވަޑައިގެންފައި ކަަމަށާއި، ދެން އޮތީ އެ ސްޕީޑު ހިފަހައްޓާލައިގެން ގޮސް އިންތިޚާބު ކާމިޔާބުކުރުން ކަމަށް އިމްރާނު ވިދާޅުވި އެވެ.
"ކޮންމެ ރަށަކަށް އަރާ ރައީސް ރައްޔިތުންނާއި ބައްދަލުކުރައްވާ، މިހާރު ކޮށްދެއްވާފައި ހުރި ކަންތައް ކިޔާދެއްވާ ދެން ކުރައްވަން ގަސްދުކުރައްވާ ކަންތައް ކިޔައިދެއްވާ ރާއްޖެއަށް ތިޔަ ގެންނަވަން ގަސްދުކުރާ ބޮޑު ބަދަލުގެ ވާހަކަ ވިދާޅުވެދެއްވާ، ރާއްޖޭގެ އިޤްތިޞާދު ދެގުނަ ކުރައްވާނެކަމަށް ވިދާޅުވެދެއްވާ، މި ހުރިހާ ކަމެއްގެ ވާހަކަ ރައްޔިތުންނަށް ހިއްސާކުރެއްވީމާ ރައީސް ތިޔަ ހުންނެވީ އެހެން ކެންޑިޑޭޓުންނަށް ވުރެ މާ ކުރިއަރާފައި އެނގޭތޯ! ދެން އަރާ ހަމަ ނުކުރެވޭނެ އިނގޭތޯ! އަރާ ހަމައެއް ނުކުރެވޭނެ. އެއްވެސް ކެންޑިޑޭޓަކަށް ރައީސްއާއި އަރާ ހަމައެއް ނުކުރެވޭނެ"
ހޯމް މިނިސްޓަރު އިމްރާނު
މ އަތޮޅަށް ރައީސް ޞާލިހު އަރިހުގައި ކުރެވުނު ދަތުރުގެ ތަޖުރިބާއަށް ބަލާއިރު ރައްޔިތުންގެ ވިސްނުމަށް އައިސްފައިވާ ބޮޑު ބަދަލު ފާހަގަކުރެވުނުކަމަށް އިމްރާނު ވިދާޅުވި އެވެ.
އެގޮތުން މާޒީގައި އެމްޑީޕީއަށް ވޯޓު ހޯދަން އުނދަގޫވި ރަށްތަކުގެ ޗާޓު މިއަދު ވަނީ ބަދަލުވެފައިކަމަށާއި، ރައީސް ޞާލިހުގެ ވެރިކަމުގައި ރައްޔިތުންގެ ހިތްތައް ހުޅުވާލާ، އެ ރައްޔިތުންގެ ހިތްތައް ކާމިޔާބު ކުރައްވާފައިވާކަމަށް އިމްރާނު ވިދާޅުވި އެވެ.
އެކަންކަން ފާހަގަކުރައްވާ އިމްރާނު ވިދާޅުވީ މ އަތޮޅުން ރައީސް ޞާލިހަށް 60 ޕަސެންޓު ވޯޓު ލިބިވަޑައިގަންނަވާނެ ކަމަށެވެ.
Advertisement
This content is created and paid for by advertisers and does not involve Voice Journalists
