ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ރިޔާސީ ކެމްޕޭނަށް ރަށްރަށަށް އަރާވަޑައިގަތުމުން އެމަނިކުފާނާއި ދެކޮޅަށް ވާދަވެރިން މުޒާހަރާކުރާނަމަ، އެ ފަރާތްތަކާއި ދެކޮޅަށް ނިކުންނަން ޖެހިދާނެކަމަށް ވިދާޅުވެ ހޯމް މިނިސްޓަރު އަދި ސަރުކާރުގެ ކޯލިޝަން ޕާޓުނަރު އަދާލަތު ޕާޓީގެ ރައީސް އިމްރާނު އަބްދުالله އިންޒާރު ދެއްވައިފި އެވެ.
ރައީސް ޞާލިހު މ އަތޮޅަށް ކުރެއްވި ރިޔާސީ ކެމްޕޭނު ދަތުރުފުޅުގައި ބައެއް ރަށްރަށުން ވަނީ އެމަނިކުފާނު ވަޑައިގެންނެވުމާއި އެކު، އެމަނިކުފާނުގެ އިސްތިއުފާއަށް ގޮވާލާ މުޒާހަރާކޮށްފަ އެވެ. އަދި އެމަނިކުފާނަށް މަރުހަބާ ދަންނަވަން ގޮސްތިބި ބައެއް ރައްޔިތުން ވަނީ އެމަނިކުފާނަށް "ވަގަށް" ގޮވާފައެވެ.
މ ދިއްގަރުގައި އޮތް ރައީސް ޞާލިހުގެ ކެމްޕޭނު ހަރުގެ ޖަލްސާއެއްގައި އިމްރާނު ވަނީ އެ ހަރަކާތްތަކާއި ގުޅިގެން ނުރުހުން ފާޅުކުރައްވާފަ އެވެ. އޭނާ ވިދާޅުވީ ސިޔާސީ ވެރިން ރަށްރަށަށް ވަޑައިގަތުމުން، އެމީހުންނާއި ދެކޮޅަށް އަޑުގަދަކޮށް މުޒާހަރާ ކުރުމަކީ 2000 ވަނަ އަހަރުގެ ކުރީކޮޅުގެ މާޒީގެ ތެރެއަށް ދޫކޮށްލާފައިވާ ކަންކަން ކަމަށެވެ.
އެހެންކަމުން ރައީސް ޞާލިހު ރަށްތަކަށް ވަޑައިގަތުމުން ޕީޕީއެމާއި ދަ ޑިމޮކްރެޓްސް ނިކުމެ ކުރަމުންދާ މުޒާހަރާތައް ހުއްޓާލުމަށް ނަސޭހަތްތެރިވާކަމަށް އިމްރާނު ވިދާޅުވި އެވެ.
"ސިޔާސީ ހަރަކާތް ހިންގަން އަބަދު ކުރަން އޮތް ކަމަކީ މުޒާހަރާކުރުންކަމަށް (ހެދިޔަކަ) ނުދޭނަން. ރައީސް ވިދާޅުވިހެން ސިޔާސީ ހަރަކާތް ހިންގަން މިއަދު ރާއްޖެ ތަސައްރަފު ފުދިފަ މި އޮތީ، ޑިމޮކްރަސީއަށް ފައްކާވެފައި މިއޮތީ މިއަދުގެ ހާލަތުގައި ވައުދު ވިއްކައިގެން، ސިޔާސަތު ވިއްކައިގެން، ތިމަންނަމެން ރައްޔިތުންނަށް ކޮށްދޭނީ ކޮން ކަމެއްކަން ބުނެދީގެން، އެކަން އަމަލީގޮތުން ސާބިތުކޮށްދީގެން މިއަދު ސިޔާސީ މަސައްކަތް ކުރާނީ"
ހޯމް މިނިސްޓަރު އިމްރާނު
އެއާއެކު އޭނާ ވިދާޅުވީ ރައީސް ޞާލިހުގެ ފަހަތްޕުޅުގައި ތިއްބެވީ ޕީޕީއެމާއި ދަ ޑިމޮކްރެޓްސްއަށް ވުރެ މުޒާހަރާތަކަށް މާ ފަރިތަ ބޭފުޅުންކަމަށެވެ.
މިހާރު ރައީސް ޞާލިހު ރަށްތަކަށް ވަޑައިގަތުމުން އިދިކޮޅުން ކުރަމުންދާ މުޒާހަރާތައް ތަކުރާރު ކުރާނަމަ، އެބޭފުޅުންގެ ލީޑަރުން ވަޑައިގަތުމުން ވެސް ރަށްތަކުގައި މުޒާހާރާކުރަން ޖެހިދާނެ ކަމަށާއި، އޭރުން ހިފަހައްޓާ ނުލެވޭނެކަމަށް އިމްރާނު ވިދާޅުވި އެވެ.
"ގަޔަށް ބޮލަށް އެރި ދުވަސްވަރު ހިނގައްޖެ. މިއަދު އެކަން ނިންމާލައްވާ. ހުރިހާ ބޭފުޅުން ނިންމާލައްވާ. ހުރިހާ ޕާޓީތަކުން ނިންމާލައްވާ. އެކަން އެގޮތަށް ކުރަން ބޭނުން ނެތްނަމަ، ދެން ވެސް އެކަން ކުރަން މާ މޮޅު ޓީމެއް ރައީސާއި އެކު އެބޮތް. އަޅުގަނޑުމެން މާ ބާރަށް މުޒާހަރާކުރާނަން. މާ އަޑުގަދަވާނެ، މާ މުޒާހަރާކުރާނެ"
ހޯމް މިނިސްޓަރު އިމްރާނު
Advertisement
This content is created and paid for by advertisers and does not involve Voice Journalists
