އިންޑިއާ އަށް ނިސްބަތް މީހަކު "ހިންދޫ" ދީނުގެ މީހެއް މަސްތުގެ ހާލަތުގައި ހުރެގެން ފުރުގާން މިސްކިތަށް އަރައި އަޅުކަންކުރަން އުޅުނު މައްސަލަ ބެލެން ނެތް ކަމަށް ބުނެ ފުލުހުން އޭނާ ދޫކޮށްލައިފިއެވެ. 

މިހާދިސާ ހިނގި އިރު އެ ތަނުގައި ހުރި މީހަކު "ވޮއިސް" އަށް މައުލޫމާތު ދިން ގޮތުގައި، ރޭ ފުރުގާން މިސްކިތުގައި އިޝާ ނަމާދު ޖަމާއަތުގައި ހަރަކާތްތަކާއި، ޖަމާއަތުގެ އަދަބާއި ހިލާފު އަމަލުތައްކޮށްފައިވާތީ އެމީހާއާއި އެވަގުތު މިސްކިތުގައި ތިބި ބައެއް މީހުން އެމީހާ ކުރާ ކަމަކާއި ގުޅޭ ގޮތުން ސުވާލު ކުރިއެވެ. އޭނާއަކީ މުސްލިމެއްތޯ ސުވާލުކުރުމުން އެއީ ހިންދޫއެއްކަމާއި، އޭނާގެ ކަލާނގެއަކީ ޝިވާކަމަށް އޭނާ ބުނެފައިވެއެވެ. އެމީހާ މިސްކިތައް އެރީ އަޅުކަން ކުރާނެ ތަނެއް ނެތިގެން އަޅުކަންކުރަން ކަމަށްވެސް އޭނާ ބުނެފައިވާ ކަމަށް އޭނާ ބުނެފައިވާކަމަށް އޭނާއާއި ވާހަކަ ދެއްކި މީހާ ވޮއިސްއަށް މައުލޫމާތު ދީފައިވެއެވެ.

މިސްކިތުގައި ތިބި މީހުން އޭނާ ގާތުގައި އެފަދައިން، މިސްކިތުގައި ކަންކަން ނުކުރެވޭނެ ކަމަށް ބުނުމުން މިސްކިތުން ނުކުމެ، މިސްކިތުގެ ވުޟޫ ކުރާ ތަނަށް ގޮސް ކުޑަކަމުދިޔުމަަށްވެސް އޭނާ މަސައްކަތް ކުރި ކަމަށް އެތަނުގައި ހުރި މީހަކު މައުލޫމާތު ދިނެވެ. ނަމަވެސް، މީހުން އޭނާ ހުއްޓުވައި ފުލުހުންނަށް ރިޕޯޓް ކުރި ކަމަށާ، އޭނާގެ އަމަލުތައް ހުރި ގޮތުންނާއި، ގައިން ދުވާ ވަހުން، އޭނާ ހުރީ މަސްތުގެ ހާލަތުގައި ކަމަށް ވަރަށް ބޮޑަށް ބެލެވޭ ކަމަށް ވޮއިސް އަށް މައުލޫމާތު ދިން މީހާ ބުންޏެވެ. އަދި ފަހުން އޭނާގެ މަސައްކަތް ކުރާތަނުގެ ވެރިމީހާވެސް އެތަނަށް ހާޒިރުކޮށްފައިވެއެވެ.

އެގޮތުން އިންޑިއާ މީހާއަކީ މަސްތުގެ ހާލަތުގައި ވަރަށް ގިނައިން އުޅޭމީހެއްކަމަށާއި، މަސައްކަތައް ފިލައިގެން އުޅޭ މައްސަލާގައި ފުލުހަށްވެސް ރިޕޯޓްކޮށްފައިވާކަމަށް އޭނާ މަސައްކަތް ކުރާތަނުގެ ވެރިމީހާ މައުލޫމާތު ދީފައިވެއެވެ.

އިންޑިއާގެ މީހާގެ މައްސަލަ ރިޕޯޓް ކުރުމުންވެސް ފުލުހުން އެމީހާ ހައްޔަރު ކޮށްފައި ނުވާ ކަމަށާ، އޭނާއާއި މެދު ފިޔަވަޅު އަޅައި އިމިގްރޭޝަން އާއި ހަވާލުވެސް ކުރެވޭނީ އޭނާގެ ސްޕޮންސާ ރިޕޯޓް ކުރުމުން ކަމަށް ފުލުހުން ބުނެފައިވާ ކަމަށް ވޮއިސްއަށް މައުލޫމާތު ދިން މީހާ ބުންޏެވެ. އަދި އެމީހާ ދޫކޮށްލަން ފުލުހުން އެދުނު ކަމަށްވެސް މައުލޫމާތު ދިން މީހާ ބުންޏެވެ. 

ފުލުހުން މިފަދައިން ބުނި ނަމަވެސް، އޭނާގެ ރާއްޖެ ގެނެސްފައިވާ ފަރާތުން އޭނާގެ މައްސަލަ ތަކުރާރުކޮށް ފުލުހަށް ހުށަހަޅާފައިވާކަމަށް ވެރިފަރާތް ވަނީ މައުލޫމާތު ދީފައެވެ.

މި މައްސަލައިގައި ފުލުހުންގެ ބަހެއް ލިބޭތޯ "ވޮއިސް" އިން ކުރި މަސައްކަތުން މިހާތަނަށްވެސް ބަހެއް ލިބޭގޮތް ވަނީ ނުވެފައެވެ.