މި ސަރުކާރުން ވައުދުތައް ފުއްދާއިރު، އެ ރަށެއްގެ ރައްޔިތުންގެ ސިޔާސީ ފިކުރަށް ނުބަލާނެ ކަމަށާ، އެހެންނަމަވެސް ރައްޔިތުންގެ ވިސްނުން ހުރިގޮތް ބައްލަވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ވ. ފެލިދޫގައި ބޭއްވި ބައްދަލުވުމުގައި ވާހަކަ ދައްކަވަމުން ރައީސް ޞާލިހް ވިދާޅުވީ، ރަށެއްގެ ރައްޔިތުންގެ ސިޔާސީ ފިކުރު ސަރުކާރާއި ތަފާތު ވިނަމަވެސް އެކަން އެކަހެރިކޮށް އެ ރަށަކަށް ބޭނުންވާ ތަރައްގީ މިސަރުކާރުން ގެނެސްދެމުންދާ ކަމަށެވެ. އެގޮތުން 2018 ވަނަ އަހަރުގެ ރިޔާސީ އިންތިހާބުގައި ފެލިދޫއިން އެމަނިކުފާނަށް ތާއީދު ލިބިލައްވާފައި ނުވި ނަމަވެސް، ފާއިތުވި ފަސް އަހަރުގެ ތެރޭގައި އެ ރަށަށްވެސް ގިނަ ކަންކަން ކޮށްދެވިފައިވާ ކަމަށް ވިދާޅުވި އެވެ.
2018 ވަނަ އަހަރުގެ މި ރަށުގެ (ފެލިދޫގެ) ނަތީޖާ އަޅުގަނޑަށް އެނގޭ. އެހެންނަމަވެސް، ތަރައްޤީގެ މަޝްރޫޢުތައް ކުރިއަށް ގެންދިޔުމުގައި އެއްވެސް ރަށެއް އަޅުގަނޑު ބާކީއެއް ނުކުރަން. މިރަށުގައި މިހާތަނަށް، ގާތްގަނޑަކަށް މި ވޭތިވެދިޔަ ފަސް އަހަރުގެ ތެރޭގައި، މިވަނީ ބޮޑު ބަނދަރެއް އެޅިފައި. ސްކޫލަށް ބޭނުންވެފައި އޮތް މަލްޓިޕާޕަސް ހޯލް ނިމިއްޖެ. ކުޑަކުދިންގެ ޕާކު ގާއިމް ކުރެވިއްޖެ. އިންޖީނުގޭގެ އިމާރާތް ނިމިއްޖެ. އަދި އަޅުގަނޑުމެން ވައުދުވީ ގޮތަށް ފެނާއި ނަރުދަމާގެ މަސައްކަތް މިރަށުގައި މިހާރު އެދަނީ ކުރިއަށް. ދައުރު ނިމުމުގެ ކުރިން އިރާދަކުރެއްވިޔާ އެހުރިހާ މަސައްކަތެއް އަޅުގަނޑުމެން ކޮށް ނިންމާނަން.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މީގެ އިތުރުން ފެލިދޫ ގޮނޑުދޮށް ހިމާޔަތް ކޮށް ހޮސްޕިޓަލު ތަރައްޤީ ކުރުމުގެ މަސައްކަތް ވެސް ވަރަށް އަވަހަށް ފެށޭނެ ކަމަށް ރައީސް ޞާލިހު ވިދާޅުވި އެވެ.
މިއާއެކު ތަރައްޤީގެ މަޝްރޫޢުތައް ކުރިއަށް ގެންދިޔުމަށް ރައްޔިތުންގެ އެއްބާރުލުން ބޭނުންވާކަން ފާހަގަކުރައްވައި ރައީސް ޞާލިހް ވަނީ ފެލިދޫގެ ރައްޔިތުން އެކަމާއި މެދު ވިސްނެވުމަށް އެދިލައްވާފައެވެ. އަދި 2018 ވަނަ އަހަރުގެ އިންތިޚާބުގައި، އެމަނިކުފާނުގެ ކޯލިޝަނަށް ލިބުނު ތާއީދަށްވުރެ ބޮޑު ތާއީދެއް ކުރިއަށް އޮތް އިންތިހާބުގައިވެސް ލިބޭނެ ކަމަށާ އެމަންޒަރު މިހާރުވެސް ފެންނަމުންދާ ކަމަށް ރައީސް ޞާލިހު ވިދާޅުވި އެވެ. އެހެންކަމުން، ފެލިދޫ ރައްޔިތުންވެސް ބާކީ ނުވުމަށް އެމަނިކުފާނު ވަނީ އެދިލައްވާފައެވެ.
އަޅުގަނޑު އެދެނީ ފެލިދޫ ރައްޔިތުންގެ ކިބައިން، ބާކީވެވަޑައިނުގަންނަވާށޭ. އަޅުގަނޑުމެންނާ އެކީ ކުރިއަށް ވަޑައިގަންނަވާށޭ. ވާ ވައުދުތައް އަޅުގަނޑުމެން މިދަނީ ފުއްދަމުން. ވިސްނުމަކަށް ނުބަލާ. އެހެން ނަމަވެސް، އެހެންނަމަވެސް، ރައްޔިތުންގެ ވިސްނުން ހުރިގޮތް އެއީ ސަރުކާރަކުން ބަލާނެ ކަމެއް. އަޅުގަނޑުމެން އަންނާނަން ތިބޭފުޅުން ކައިރިއަށް.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހު ވިދާޅުވީ ފަށާފައިވާ ތަރައްގީގެ މަޝްރޫއުތައް ނިންމޭނީ އެމަނިކުފާނުގެ ކޯލިޝަން ކުރިއަށް އޮތް ދައުރަށް އިންތިހާބު ކޮށްގެން ކަމަށެވެ.
Advertisement
This content is created and paid for by advertisers and does not involve Voice Journalists
