ކުރިއަށް ރިޔާސީ އިންތިހާބުގައި އެހެން ޕާޓީ ތަކާއި ކޯލިޝަން ނުހަދައި އެކަނިވެސް ވާދަކުރެވިދާ ކަމަށާ، އެހެން ނަމަވެސް އެއީ އެންމެ ރަނގަޅު ގޮތް ނޫން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ކެމްޕެއިނަށް ވ އަތޮޅަށް މިއަދު ކުރެއްވި ދަތުރުފުޅުގައި އެ އަތޮޅު ތިނަދޫއަށް ވަޑައިގެން ރައްޔިތުންނާ ބައްދަލު ކުރައްވާ ދެއްކެވި ވާހަކަފުޅުގައި ވިދާޅުވީ، އުފާވެރި އަމާން ރާއްޖެއެއް ގެނެވޭނީ ގުޅިފައިވާ، ގިނަ ފަރާތްތަކުގެ ޚިޔާލާއި މަޝްވަރާއާއި އެކުގައި ކަމަށެވެ. އަދި އެމަނިކުފާނުގެ ވިސްނުމަކީ ރާއްޖޭގައި ތިބި، ތަފާތު ޚިޔާލު ތަކުގެ މީހުންނާއި އެކު މަޝްވަރާ ކޮށްގެން ކުރިއަށް ދިޔުން ކަމަށްވެސް ވިދާޅުވި އެވެ.
މިއަދު ޢަދާލަތު ޕާޓީއާއި އެމްޑީއޭ އަޅުގަނޑުމެންނާއި އެކީގައި އެތިބީ އެހެންވެ. އަޅުގަނޑުމެންގެ ނިންމުންތައް ނިންމާނީ، މި އުފާވެރި އަމާން ރާއްޖެ ރައްޔިތުންނަށް ހޯދައި ދިނުމުގައި، މި ދެންނެވި ބޭފުޅުންގެވެސް (އަދާލަތު އަދި އެމްޑީއޭ) މަޝްވަރާއާއި އެކީގައި. އަޅުގަނޑު ހިތުން، ރާއްޖޭގައި އެބަތިބި، ތަފާތު ވިސްނުމުގެ ބޭފުޅުން. އެއީ ސަރުކާރެއް ހިންގާއިރުގައި، އަދި ތަރައްގީ ވަމުންދާ ގައުމެއްގައި މިކަން ކުރަންޖެހޭނޭ ގޮތް. އެހެންވީމާ ކޯލިޝަނަކާއި އެކީގައި ކުރިއަށް މިދަނީ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހު ވިދާޅުވީ ރިޔާސީ އިންތިހާބުގައި އެމަނިކުފާނު އެކަނިވެސް ވާދަކުރައްވަން ނުކުންނެވިދާނެ ކަމަށެވެ. އެހެންނަމަވެސް އެކަން ނުކުރައްވަނީ އެއީ ގައުމަށް އެންމެ ބޭނުންތެރި ގޮތް ނޫން ކަމަށްވާތީ ކަމަށެވެ.
އަޅުގަނޑަށް އެކަނިވެސް މިކަމަށް ނުކުމެވިދާނެ. އެހެންނަމަވެސް އެއީ އެކީއެއް މި ގައުމަށް އެންމެ ބޭނުންތެރި ގޮތެއް ނޫން އަދި. މިގައުމަށް އެންމެ ރަނގަޅު ގޮތް ހޯދޭނީ މިފަދަ ކޯލިޝަންއަކާއި އެކީގައި.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހު ވިދާޅުވީ، ކުރިއަށް އޮތް ރިޔާސީ އިންތިހާބުގައި އެމްޑީޕީ، އަދާލަތު އަދި އެމްޑީއޭގެ ކޯލިޝަނަށް ރައްޔިތުންގެ ތާއީދު ލިބޭނެ ކަމަށެވެ.
Advertisement
This content is created and paid for by advertisers and does not involve Voice Journalists
