ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ތުރާކުނު ފުޓްބޯޅަ ދަނޑާއި ޕާކު ހުޅުވައި ދެއްވައިފި އެވެ. 

ތުރާކުނު ފުޓްބޯޅަ ދަނޑާއި ޕާކު ރައީސް ޞާލިހު ހުޅުވައިދެއްވާފައި ވަނީ، އެމަނިކުފާނު ހއ ކުރައްވަމުންދާ ކެންޕެއިން ދަތުރުގެ ތެރެއިން މިއަދު އެރަށަށް ވަޑައިގެންނެވެ. 

ތުރާކުނު ފުޓްބޯޅަ ދަނޑުގައި ޓާފު އަޅައި ތަރައްޤީ ކޮށް، އެރަށުގައި ކުޑަކުދިންގެ ޕާކެއް އެޅުމުގެ މަސައްކަތް ފަށާފައިވަނީ 2020 ވަނަ އަހަރުގެ ތެރޭގައެވެ. އެގޮތުން އެ ދަނޑުގައި ޓާފު އަޅަން މައިނާ ސްޕޯޓްސް ފީލްޑް ޕްރައިވެޓް ލިމިޓެޑާއި ހަވާލުކުރި 1.3 މިލިއަން ރުފިޔާ އަށެވެ. 

Advertisement

ތުރާކުނުގެ އިތުރުން، އެ އަހަރުގެ ތެރޭގައި އިތުރު 14 ރަށެއްގައި ޕާކު އެޅުމަށް ތަކެތި ފޮނުވުނު ކަމަށް މިނިސްޓްރީން ބުނެއެވެ. 

އެގޮތުން ޕާކު ތަރައްޤީ ކުރުމަށް ސާމާނު ފޮނުވި ރަށްތަކުގެ ތެރޭގައި ކ. ގުޅި، ގދ. ރަތަފަންދޫ، ގދ. ތިނަދޫ، އއ. ރަސްދޫ، ކ.ގާފަރު، ބ.ކިހާދޫ، މ. ރަތްމަންދޫގެ އިތުރުން ގދ. ވާދޫ ހިމެނެއެވެ. އަދި މީގެ އިތުރުން ތ. ހިިރިލަންދޫ، ހއ. ތުރާކުނު، އދ. ކުނބުރުދޫ، ގއ. ނިލަންދޫ، ތ ވަންދޫ، ރ. ވާދޫ ގެ އިތުރުން ތ. ކަނޑޫދޫގައި ހިމެނެއެވެ.