ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ދައުރުގެ ފަސް އަހަރަކީ މި ރާއްޖޭގެ ފަހުގެ ތާރީޚް ދެކުނު އެންމެ ކުށް މަދު ފަސް އަހަރު ކަމަށް އެމަނިކުފާނު ވިދާޅުވެއްޖެއެވެ.
ރިޔާސީ ކެންޕެއިނަށް ތިލަދުންމަތީ އުތުރުބުރިއަށް ކުރައްވަމުންދާ ދަތުރުފުޅުގައި އެ އަތޮޅު ތުރާކުނަށް ވަޑައިގެން ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ޞާލިހް ވިދާޅުވީ، މިސަރުކާރުން ގެންނަ ތަރައްޤީގެ މަޝްރޫޢުތައް ކުރިއަށް ގެންދެވެނީ މުޖުތަމަޢު އަމާންކަންމަތީގައި އޮންނާތީ ކަމަށެވެ. އަދި ކުރިއަށް އޮތް ތަނުގައިވެސް، ސަރުކާރުގެ އެންމެ މުހިންމު އެއް ސިޔާސަތަކަށް ވާނީ ރާއްޖެއަކީ އަމާން ތަނަކަށް ހެދުން ކަމަށް އެމަނިކުފާނު ވިދާޅުވިއެވެ.
މިއާއެކު ރައީސް ޞާލިހު ވިދާޅުވީ، އެމަނިކުފާނުގެ މި ވޭތުވެދިޔަ ފަސް އަހަރަކީ ރާއްޖޭގެ ފަހުގެ ތާރީޚް ދުށް އެންމެ ކުށް މަދު ފަސް އަހަރު ކަމަށެވެ.
މި ވޭތުވެދިޔަ 5 އަހަރުގެ ތަފާސްހިސާބުތަކަށް ބަލާއިރުގައި، މިއީ، މި ރާއްޖޭގަ ފަހުގެ ތާރީޚުގައި އެންމެ ކުށް މަދު ފަސް އަހަރުގެ ގޮތުގައި ފުލުހުން ރިޕޯޓް ކޮށްފައި އެބައޮތް. އިރާދަކުރެއްވިޔާ އަޅުގަނޑުމެންގެ ކުރިއަށް އޮތް ފަސް އަހަރުގައި، މި ޕަސެންޓޭޖް، މިއަށްވުރެ އަޅުގަނޑުމެން ދަށް ކުރާނަން.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހް އިތުރަށް ވިދާޅުވީ މިއަހަރު ސެޕްޓެމްބަރު މަހުގައި ބޭއްވޭ ރިޔާސީ އިންތިޚާބު، ބޮޑުތަނުން އެއްބުރުން އެމަނިކުފާނު ކާމިޔާބު ކުރައްވައި، ކުރިއަށް އޮތް ދައުރުގައިވެސް ރައްޔިތުން އެދޭ އަމާން ރާއްޖެ އެއް ހޯދައި ދެއްވާނެ ކަމަށެވެ.
މިއީ ފަހުގެ ތާރީޚްގައި އެންމެ ކުށް މަދު ފަސް އަހަރު ކަމަށް ރައީސް ޞާލިހު ވިދާޅުވާއިރު، މިއީ ރާއްޖޭގެ ފަހުގއ ތާރީޚްގައި ހިނގައިދިޔަ އެންމެ އަނިޔާވެރި ގަތުލުތައް ހިނގައިދިޔަ އަހަރުތައް ކަމަށް ގިނަ ބަޔަކު އިއްތިފާގު ވެއެވެ. އަދި އެއްޖިންސުން ގުޅުން ހިންގުމާއި، ހަށި ވިއްކުންފަދަ ނުބައި ފާހިޝް އަމަލުތައް މި ފަސް އަހަރުގެ ތެރޭގައި އިންތިހާއަށް އިތުރުވެފައި ވާއިރު, އެ މައްސަލަތައް ބަލައި ތަހުގީގުކޮށް ކުށްވެރިންނަށް އަދަބު ނުދެވޭ ކަމުގެ ޝަކުވާވެސް އާންމުން އަންނަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
