އެމްއެމްޕީއާރުސީގެ ޚިޔާނާތުގެ ކުށް ސާބިތުވެ ޖަލުހުކުމެއް ގޭގައި ތަންފީޒު ކުރަމުންދާ ކުރީގެ ނައިބު ރައީސް އަހުމަދު އަދީބު ރާއްޖެއިން ބޭރަށް ގޮސް ބޭސް ފަރުވާކުރުމަށް މޯލްޑިވްސް ކަރެކްޝަނަލް ސާވިސްއިން ދިން މުއްދަތު އިތުރުކޮށްދިނުމަށް އޭނާ އެދިއްޖެ އެވެ. 

އަދީބު ބޭސްފަރުވާއަށް ސިންގަޕޫރަށް ފުރާފައިވަނީ މި މަހުގެ 12 ވަނަ ދުވަހުގެ ރޭ ގައެވެ. އޭނާ ބޭސްފަރުވާއަށް ސިންގަޕޫރަށް ފުރީ ރާއްޖެއިން ހެދެން ނެތް ޓެސްޓުތަކެއް ހެދުމަށް ރާއްޖެއިން ބޭރަށް ދިއުމުގެ ހުއްދަ މޯލްޑިވްސް ކަރެކްޝަނަލް ސާވިސްއިން ދިނުމުން ނެވެ.

އެ ޓެސްޓުތައް ހަދާ، ފަރުވާ ހޯދުމަށް އޭނާގެ ހާލަތަށް ބަލައި ކެރެކްޝަނުން ވަނީ 10 ދުވަހުގެ މުއްދަތެއް ދީފަ އެވެ. 

އެހެންކަމުން މިއަދުގެ ނިޔަލަށް ބޭސްފަރުވާކޮށްގެން އަދީބު މާލެ އަންނަން ޖެހޭނެ އެވެ.

އެހެން ނަމަވެސް އަދީބު ވަނީ އެ މުއްދަތު އިތުރުކޮށްދިނުމަށް ކަރެކްޝަންސްއަށް ހުށައަޅާފައެވެ. ކަރެކްޝަންސްގެ މީޑިއާ އޮފިސަރު ވިދާޅުވީ ބޭސްފަރުވާ ކުރުމަށް ރާއްޖެއިން ބޭރަށް ދިއުމަށް އަދީބަށް ހުއްދަދިން މުއްދަތު އިތުރުކުރުމަށް އޭނާ ހުށައަޅާފައިވާ ކަމަށެވެ. 

އެހެން ނަމަވެސް އެ ހުއްދަ އިތުރުކޮށްދޭނީ އަދީބު ހުށައަޅާފައިވާ މެޑިކަލް ޑޮކިއުމަންޓުތަކަށް ބެލުމަށްފަހު ކަރެކްޝަންސްގެ މެޑިކަލް ބޯޑުންކަމަށް މީޑިއާ އޮފިޝަލު ވިދާޅުވި އެވެ. 

އަދީބުގެ ބައްޔާއި ގުޅޭގޮތުން އޭނާ ނިސްބަތްވާ ޕާޓީ އެމްޓީޑީން ބުނީ، އަދީބު ގެންދަނީ ފުރާނަޔަށް ނުރައްކާ ބައްޔަކަށް ފަރުވާ ހޯދަމުން ކަމަށެވެ. 

އަދީބު ބޭރަށް ފުރުމުގެ ދުވަސްކޮޅެއް ކުރިން ވަނީ އައިޖީއެމްއެޗުގައި 24 ގަޑިއިރު އެޑުމިޓު ވެސް ކޮށްފަ އެވެ. 

އަދީބަކީ އޭނާގެ އަމިއްލަ އިއުތިރާފުން އެމްއެމްޕިއާރުސީގެ ކޮރަޕްޝަނުގެ ކުށް ސާބިތުވެ 20 އަހަރުގެ ޖަލުހުކުމެއް ކޮށްފައިވާ މީހެކެެވެ. 

އެހެން ނަމަވެސް ދައުލަތުން އަދީބާއެކު ހަދާފައިވާ ޕްލީ ބާގެއިން އެއްބަސްވުމުގެ ސަބަބުން އަދީބަށް ވަނީ ބޮޑެތި ލުއިތަކެއް ދީފައެވެ. 

އެގޮތުން އޭނާ ޖަލު ހުކުމް ތަންފީޒު ކުރަމުންދަނީ ގޭގައެވެ. އަދި އެ އެއްބަސްވުމުގެ ފަށުން އަދީބުގެ މައްވަށް ކުރެވޭ ޓެރަރިޒަމްގެ ގިނަ ދައުވާތަކެއް ނުކުރުމަށް ވެސް ދައުލަތުން ވަނީ ނިންމާފަ އެވެ.