ޖުމްހޫރީ މައިދާނުގައި ބޭއްވުނު އިދިކޮޅު ކޯލިޝަންގެ މުޒާހަރާ ކަވަރު ކުރަމުން ދިޔަ ޗެނަލް 13 ގެ ކެމެރާމަން އާއި ސަންގު ޓީވީގެ ނޫސްވެރިޔާއަށް ފުލުހަކު އަނިޔާ ކުރުމުގެ ސަބަބުން އިންޓާނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން ކަންބޮޑުވުން ފާޅުކޮށްފިއެވެ.
މިދިޔަ ބުރާސްފަތި ދުވަހު ބޭއްވުނު އިދިކޮޅު ކޯލިޝަންގެ ހަރަކާތުގައި ފުލުހަކު ވަނީ މީޑިއާ ފާސް އަޅައިގެން ތިބި ޗެނަލް 13 ގެ ކެމެރާމަން އާއި ސަންގު ޓީވީގެ ނޫސްވެރިޔަކު ބިންމައްޗަށް ކޮށްޕާލާފައެވެ.
މި ހާދިސާގެ ވީޑިއޯއެއް މީސް މީޑިއާގައި އާންމުވެ ގިނަ ބަޔެއްގެ ފާޑުކިޔުން ފުލުހުންނަށް ރައްދު ވުމާއިއެކު ޕޮލިސް ކޮމިޝަނަރ މުހައްމަދު ހަމީދު ވަނީ މި މައްސަލާގައި ޝާމިލްވާ ފުލުސް އޮފިސަރު ސަސްޕެންޑްކޮށް ސްޕެޝަލް އޮޕަރޭޝަންސް އިން މި މައްސަލަ ތަހްގީގު ކުރަމުންދާ ކަމަށް އިއުލާން ކޮށްފައެވެ.
މިކަންތައްތައް ފާހަގަކޮށް މިއަދު އައިއެފްޖޭއިން ނެރެފައިވާ ބަޔާނުގައި ބުނެފައިވަނީ އިދިކޮޅު ކޯލިޝަންގެ މުޒާހަރާތައް ކަވަރު ކުރާ ނޫސްވެރިންނަށް ރާއްޖޭގައި ފުލުހުން ފުރައްސާރަ ކޮށް އަނިޔާ ކުރާ ކަމަށެވެ.
އެގޮތުން ފެބްރުއަރީ މަހު އިދިކޮޅުގެ މުޒާހަރާ ކަވަރު ކުރަން އުޅުނު ޗެނަލް 13 ގެ ރިޕޯޓަރަކަށާއި ނޫސްވެރިއަކަށް އަނިޔާކޮށް ޕެޕާ ސްޕްރޭ ޖެހި ހާދިސާއަށާއި މާރިޗު މަހުގައި އަވަސް ނޫސްގެ ނޫސްވެރިޔަކަށް ހަމަލާދީ ބަންދުގައި ބަހައްޓާފައިވާ ހާދިސާއަށް އައިއެފްޖޭއިން ވަނީ އަލިއަޅުވާލައިފައެވެ.
އެހެންކަމުން މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ) އާއިއެކު ގުޅިގެން ފުލުހުންގެ މި އަމަލު ކުށްވެރިކުރާ ކަމަށް ފާހަގަކޮށް އައިއެފްޖޭ އިން ވަނީ މި މައްސަލަ ތަހްޤީގު ކުރުމަށް ކަމާބެހޭ ފަރާތްތަކަށް ގޮވާލާފައެވެ.
"ހުރަސް އެޅުމާއި އުނދަގޫ ކުރުމާއި އަނިޔާ ލިބުމުގެ ބިރެއް ނެތި ނޫސްވެރިންނަށް ރިޕޯޓް ކުރެވެން ޖެހޭ. މި ހާދިސާތައް ތަކުރާޜު ވެގެން ދިޔުމަކީ ރާއްޖޭގެ މީޑިއާތަކުގެ މަސައްކަތްތެރިންގެ ރައްކާތެރިކަމަށް އިތުރު ފިޔަވަޅުތައް އަޅަންޖެހޭކަން ސާފުވާ ކަމެއް. ފުލުހުންގެ މި ހަމަލާ އައިއެފްޖޭއިން ކުށްވެރިކޮށް ހާމަކަން ބޮޑުކޮށް މިހާދިސާގެ ތަހްގީގެއް ހިންގުމަށް ކަމާބެހޭ ފަރާތްތަކަށް އިލްތިމާސް ކުރަން"
އިންޓާނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ)
Advertisement
This content is created and paid for by advertisers and does not involve Voice Journalists
