ވިއްސާރަވެ ފެންބޮޑުވުމުގެ ސަބަބުން އަފްޣާނިސްތާނާއި ޕާކިސްތާނުން 40 އަށްވުރެ ގިނަ މީހުން މަރުވެއްޖެއެވެ.

ޕާކިސްތާނާއި އަފްޣާނިސްތާނަށް ކުރަމުންދާ މޫސުމީ ގަދަ ވިއްސާރައިގެ ސަބަބުން އަފްޣާނިސްތާނުން 31 މީހުން މަރުވެ އެތައް ގިނަ ބަޔަކު ގެއްލިފައިވެއެވެ. އަދި ޕާކިސްތާނުން 13 މީހަކުވަނީ މަރުވެފައެވެ.

ޕާކިސްތާނާއި އަފްޣާނިސްތާނަށް ކުރަމުންދާ މޫސުމީ ވިއްސާރައިގެ ސަބަބުން ދެޤައުމުގެ ބޮޑު ސަރަހައްދެއްގައި ފެންބޮޑުވެ ބިންގަނޑު ކަނޑައިގެން ދިޔުމުގެ ހާދިސާތައް ވަނީ ހިނގައިފައެވެ.

އަފްޣާނިސްތާނުގެ ޑިޒާސްޓަރ މިނިސްޓްރީގެ ސްޕޯކްސްމޭން ޝާފިއުالله ރަޙީމީ ވިދާޅުވެފައިވަނީ  މޫސުމީ ވިއްސާރައިގެ ސަބަބުން އަފްޣާނިސްތާނުން 31 މީހަކު މަރުވެފައިވާއިރު 74 މީހަކަށް އެކިވަރުގެ އަނިޔާލިބިފައިވާކަމަށެވެ. އަދި ބިންގަނޑު ކެނޑުމާއި ފެންބޮޑުވުމުގެ ސަބަބުން 41 މީހަކު ވީނުވީއެއް ނޭނގި ގެއްލިފައިވާ ކަމަށެވެ.

ޝާފިއުالله ވިދާޅުވެފައިވަނީ ވިއްސާރައިގެ ސަބަބުން އެންމެ ބޮޑަށް ފެންބޮޑުވެފައިވަނީ ވެރިކަން ކުރާ ކާބުލްގައި ކަމަށެވެ. އަދި އަނިޔާވި ގިނަ މީހުންނަކީ ވެސް ކާބުލްގެ ހުޅަނގުން އަނިޔާވިމީހުން ކަމަށެވެ.

އެހީ ފޯރުކޮށްދޭ ޓީމުތަކުން ލަފާކޮށްފައިވަނީ ގެއްލިގެން ހޯދާ މީހުން ފެންނާނީ  ވެއްޓިފައިވާ ގެތަކުގެ ދަށުން ކަމަށެވެ. އެ ސަރަހައްދުގައި މިހާރު ވެސް ކަކޫތާފެނަށް ފެން ބޮޑުވެފައިވާތީ، ގެއްލިފައިވާ އެކަކު ވެސް ދިރިހުއްޓައި ފެންނާނެ ކަމުގެ އުންމީދު ނެތްކަމަށްވެސް އެޓީމުތަކުން ވަނީ ބުނެފައެވެ.

ޕާކިސްތާނަށް އިއްޔެ ކުރި ގަދަ ވިއްސާރައިގައި އެޤައުމުގެ ބައެއް ސަރަހައްދުތަކުގައި ފެންބޮޑުވެ ބިންގަނޑު ކަނޑައިގެން ދިޔުމުގެ ސަބަބުން ގޭގެ ވަނީ ވެއްޓިފަ އެވެ. ހުޅަނގުއުތުރު ޕްރޮވިންސެއް ކަމަށްވާ ޚައިބަރު ޕަޚްތުންޚުވާ އަށް މިދިޔަ 48 ގަޑިއިރުގެ ތެރޭގައި ކުރި ވިއްސާރައިގައި މަދުވެގެން ނުވަ މީހަކު މަރުވެ އިތުރު އެތައް ބަޔަކަށް އެކިވަރުގެ އަނިޔާތައް ލިބުނު ކަމަށް އަލްޖަޒީރާގައި ބުނެފައިވެއެވެ. އަދި އެ ސަރަހައްދުން 74 ގެ ވެއްޓި އެތައް ބަޔަކު ތިބީ ހާލުގައި ޖެހިފަ އެވެ.

ޕާކިސްތާނުގެ މި އަހަރުގެ ވިއްސާރަ މޫސުން، މިދިޔަ ޖޫން މަހުގެ 25 ވަނަ ދުވަހު ފެށިފައިވާ އިރު، އެ ޤައުމުގެ އެކި ސަރަހައްދުތަކަށް ކުރަމުންދާ ވިއްސާރައިގެ ސަބަބުން ހިނގި ތަފާތު ހާދިސާތަކުގައި މިހާތަނަށް މަރުވި މީހުންގެ އަދަދު ވަނީ 101 އަށް އަރައިފަ އެވެ. އޭގެ ތެރޭގައި 16 އަންހެނުންނާއި 42 ކުޑަކުދިން ވެސް ހިމެނެ އެވެ.