ޖަޕާނުގެ ޚާރިޖީ ވަޒީރު ހަޔަޝީ ޔޮޝިމަސާ ރާއްޖެ ވަޑައިގަތުމަށް ހަމަޖެހިއްޖެއެވެ.

ހަޔަޝީ ޔޮޝިމަސާ ރާއްޖެ ވަޑައިގަންނަވަނީ ޚާރިޖީ ވަޒީރު ޢަބްދުالله ޝާހިދުގެ ދައުވަތަކަށެވެ. ޚަރިޖީ ވުޒާރާއިން ބުނެފައިވަނީ ޖަޕާނުގެ ޚާރިޖީ ވަޒީރު ރާއްޖެއަށް ވަޑައިގަންނަވާނީ 29 ޖުލައި ގައެވެ. ދި ދަތުރުފުޅަކީ ދެދުވަހުގެ ދަތުރުފުޅެކެވެ.

މި ދަތުރުފުޅުގައި ޖަޕާނުގެ ޚާރިޖީ ވަޒީރު ރާއްޖޭގެ ޚާރިޖީ ވަޒީރު ޝާހިދު އާއި ދިފާޢީ ވަޒީރު އަލްއުސްތާޒާ މާރިޔާ އަހުމަދު ދީދީ އާއި ބައްދަލުކުރެއްވުމަށް ވަނީ ހަމަޖެހިފައެވެ.

Advertisement

އަދި ހިއުމަން ރިސޯސް ޑިވެލޮޕްމެންޓް ސްކޮލަރޝިޕް (ޖޭއެސްޑީ) ޕްރޮޖެކްޓް ކުރިޔަށް ގެންދިއުމަށް ރާއްޖެއާއި ޖަޕާނާއި ދެމެދު ވެވޭ އެއްބަސްވުމެއްގައި ސޮއި ކުރެއްވުމަށްވެސް ހަމަޖެހިފައިވެއެވެ.

ޖަޕާނުގެ ޚާރިޖީ ވަޒީރު ޔޮޝިމަސާ ވެގެން ދާނީ 2018 ވަނަ އަހަރަށް ފަހު  ރާއްޖެއަަށް ވަޑައިގަންނަވާ އެޤައުމުގެ އެންމެ އިސް އިއްޒަތްތެރިޔާއަށެވެ.

ޖަޕާނުގެ އިސް ބޭފުޅެއް އެންމެ ފަހު ރާއްޖެއަށް ވަޑައިގެންނެވީ 2018 ވަނަ އަހަރުހެ ޖެނުއަރީގައެވެ. އެއީ އޭރުގެ ޕޮރިން މިނިސްޓަރ ޓާރޯ ކޮނޯ އެވެ.

ޖަޕާނަކީ ރާއްޖޭގެ ތަރައްޤީގެ މަސައްކަތުގައި ގިނަ ދާއިރާ ތަކަކުން އެހީތެރިކަން ފޯރުކޮށްދޭ ޤައުމެކެވެ. އެގޮތުން ތައުލީމީ ދާއިރާ، ސިއްޚީ ދާއިރާ އަދި  މޫސުމީ ކާރިސާތަކުން ރައްކާތެރިވުމަށް ހިންގޭ މުހިންމު ޕްރޮޖެކްޓްތަކާއި މިނޫންވެސް ގޮތްގޮތުން ރާއްޖެއަށް އެހީތެރިކަން ފޯރުކޮށްދޭ ޤައުމެކެވެ.