ޑެންމާކުގެ ކޯޕަންހޭގަންގައި ހުންނަ ޢީރާޤްގެ އެމްބަސީކުރިމަތީގައި މުޒާހަރާ ކުރަމުންދިޔަ ދެމީހަކު ކީރިތި ޤުރްއާނުގެ ކޮޕީއެއް އަންދައިލައިފިއެވެ.
ޑެނިޝް ޕެޓްރިއޮޓްސް ނަމަކަށް ކިޔާ ގްރޫޕަކަށް ނިސްބަތްވާ ކަމަށް ބުނާ މިދެމީހުން ޢިރާޤް އެމްބަސީ ކުރިމައްޗަށް ގޮސް އިސްލާމްދީނުގެ ޙުރުމަތް ކަނޑައި އެކި ޝިޢާރުތަކުން އަޑު އުފުލައިފައިވެއެވެ. އަދި ކީރިތި ޤުރުއާނުގައި ރުޅިވެރިކަމާއި އެކު ފައިންއަރައި ހަދައިފައިވާކަމަށް އަލްޖަޒީރާގައި ބުނެފައިވެއެވެ.
އަދި އެއަށްފަހު އެމީހުން ޤުރުއާނުގައި އަލިފާން ރޯކޮށް އަންދާލައިފައިވެއެވެ. އަދި އެމީހުން ޢިރާޤުގެ ދިދައިގައިވެސް ރޯކޮށްލައިފައިވެއެވެ.
މިކަމާއި ގުޅިގެން ޢިރާޤުގެ ޙާރިޖީ ވަޒީރުވަނީ ޑެންމާކުގެ ކަމާއިގުޅޭ ފަރާތްތަކާއި ޔޫއެންގެ ކަމާއި ގުޅޭ ފަރާތްތަކާއި ފޯނުން ގުޅުއްވައިފައެވެ.
އަދި ޙިޔާލު ފާޅުކުރުމުގެ މިނިވަންކަމުގެ ނަމުގައި ކުރަމުންދާ މިފަދަ ހައްދުފަހަނަ އެޅި ޢަމަލުތައް ހުއްޓުވުމަށް ގޯވާލައިފައިވެއެވެ.
ޑެންމާކުގައި ހިންގާފައިވާ މިޢަމަލު އިސްލާމީ ޤައުމުތަކުން އަންނަނީ ކުށްވެރިކުރަމުންނެވެ.
ޑެންމާކުގައި ޤުރުއާން އަންދާލައިފައިމިވަނީ މިދިޔަ އަޟްޙާ ޢީދު ދުވަހު ސުވިޑެންގައި ދިރިއުޅޭ ޢިރާޤަށް ނިސްބަތްވާ ކްރިސްޓިއަނަކު ސުވިޑެންގެ އެންމެ ބޮޑު މިސްކިތުގެ ކުރިމަތީގައި ޤުރުއާން މުސްޙަފެއް އަންދާލުމާއި ގުޅިގެން މުސްލިމް ޤައުމުތަކުގައި ކަންބޮޑުވުން ފާޅުކުރަމުން ދާ ދަނޑިވަޅެއްގައެވެ.
Advertisement
This content is created and paid for by advertisers and does not involve Voice Journalists
