ތުރުކިޔޭގެ އަވަށެއް ކަމުގައިވާ ރެހާންލީ ގައި، ދިވެހިންގެ ދީލަތި އެހީއާއެކު އެކު، އިންޓަނޭޝަނަލް އެއިޑް ކެންޕެއިން (އައިއޭސީ) އިން ބިނާކުރި ފަހާ ފެކްޓަރީން އެތަކެއް ހުވަފަތް ކަނބަލުންނަށް އާމްދަނީ ހޯދޭނެ މަގު ފަހިވެގެންގޮސްފައިވާ ކަމަށް އެ ޖަމިއްޔާ އިން ހާމަ ކޮށްފިއެވެ.

މި ފަހާ ފެކްޓަރީ އާއި ގުޅިގެން މައުލޫމާތު ދެއްވަމުން އައިއޭސީގެ މީޑިއާ އެންޑް ޕީއާރު ޑައިރެކްޓަރ އަޒުހަދު އަހުމަދު ވިދާޅުވީ، މި ފަހާ ފެކްޓަރީ މެދުވެރިކޮށް މަހެއްގެ މައްޗަށް ގާތްގަނޑަކަށް 26 ހާސް، އަދި ޢީދު ދުވަސް ތަކާއި ދިމާކޮށް ގާތްގަނޑަކަށް 50 ހާހާއި ގާތް ކުރާ އަދަދަށް، ހެދުން، އެކަނބަލުން ފަހަމުންދާ ކަމަށެވެ. 

ދިވެހިންގެ އެހީގައި ހިންގަމުންދާ ފަހާ ފެކްޓަރީގައި ކަނބަލުން ފަހާފައިވާ ބައެއް ހެދުންތައް-- ފޮޓޯ/ އައިއޭސީ

އަދި މި ފަހާ ފެކްޓަރީން ފަހާ ހުރިހާ ހެދުމަކީ، އެ ސަރަހައްދުގައި ހުންނަ ރެފިއުޖީ ކޭންޕުތަކުގައި އުޅޭ މީހުންނަށް ހިލޭ ބަހަމުންދާ ކަމަށާ، އެގޮތުގައި ފެކްޓަރީ ހިންގަމުންދާތާ މިހާރު 3 އަހަރު ވެފައިވާ ކަމަށް އަޒުހަދު ފާހަގަކުރެއްވިއެވެ. އަދި މި ފެކްޓަރީ ހިންގަމުންދަނީ ދިވެހި ރައްޔިތުންގެ ދީލަތި އެހީގައި ކަމަށްވެސް އޭނާ ވިދާޅުވި އެވެ. 

ދިވެހިންގެ އެހީގައި ހިންގަމުންދާ ފަހާ ފެކްޓަރީ-- ފޮޓޯ/ އައިއޭސީ

ތުރުކިޔޭ ގެ މި ފަހާ ފެކްޓަރީ ގައި މަސައްކަތް ކުރާ ކަނބަލުންނަށް އުޖޫރަ ދިނުމުގެ ކަންކަން އައިއޭސީން ބަލަހައްޓަމުންދާއިރު, ހެދުން ފެނުމަށް ތަކެތި ފޯރުކޮށްދެނީ ތުރުކީގެ އިންސާނިއްޔަތަށް މަސައްކަތްކުރާ މައި ޖަމިއްޔާ އައިއެޗްއެޗް ހިއުމެނިޓޭރިއަން ރިލީފް ފައުންޑޭޝަންގެ ފަރާތުން ކަމަށެވެ. އަދި މިއީ އައިއޭސީ އާއި އައިއެޗްއެޗް ގެ ޖޮއިންޓް ޕާޓްނާޝިޕް ޕޮރެޖެކްޓެއް ކަމަށްވެސް އެ ޖަމިއްޔާ އިން މައުލޫމާތު ދެއެވެ. 

ދިވެހިންގެ އެހީގައި ހިންގަމުންދާ ފަހާ ފެކްޓަރީ-- ފޮޓޯ/ އައިއޭސީ

އައިއޭސީން އިތުރަށް ބުނީ، ދިވެހިންގެ ދީލަތި އެހީ އާއިއެކު، އެ ޖަމިއްޔާއިން ފޯރުކޮށްދޭ އެހީގައި ނިކަމެތިންގެ ހާލަތު ރަނގަޅުވެ، އަމިއްލަ ފައިމައްޗަށް ތެދުވެ އަބުރުވެރިކަމާއިއެކު ދިރިއުޅޭތަން ފެނުމަކީ އެ ޖަމިއްޔާގެ އުންމީދު ކަމަށެވެ. އަދި އައިއޭސީގެ ހުރިހާ މަސައްކަތެއްވެސް ބިނާކުރަމުންދަނީ އެ ވިސްނުމުގައި ކަމަށެވެ.