ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމަށް ދިވެހިރާއްޖޭގެ ވެރިކަން ދޭން މާ ލަސްވެސް ވެއްޖެކަމަށް ކުރީގެ ރައީސް ޑރ މުޙައްމަދު ވަހީދު ހަސަންމަނިކު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައި ވަނީ ޕީޕީއެމް ދޫކުރައްވާ ޖޭޕީއާއި ގުޅިވަޑައިގެން މާމިގިނލީގައި ބޭއްވި ޤާސިމްގެ ރިޔާސީ އިންތިޚާބުގެ ކެމްޕޭނު ޖަލްސާގައި ވާހަކަދައްކަވަމުން ނެވެ. 

ޑރ ވަހީދުގެ ވާހަކަފުޅުގައި ވަނީ އިސްލާހީ މަސައްކަތް ފެށިގެން އައި ދުވަސްވަރު ޤާސިމް އިބްރާހިމް ކުރައްވާފައިވާ މަސައްކަތްތަކުގެ ހަނދާން އާ ކުރައްވާފަ އެވެ. އަދި އަމިއްލަ މަސައްކަތްޕުޅުން ޤާސިމް އަމިއްލަފުޅު ވިޔަފާރި ކުރިއަރުވައި ރާއްޖެގައި ހުރި އެންމެ ބޮޑު މަހުޖަނަށް ވެ ވަޑައިގެންނެވި ގޮތަށް އަލިއަޅުވާލައްވާ ތައުރީފު ކުރައްވާފަ އެވެ. 

Advertisement

އޭގެ އިތުރުން ޑރ ވަހީދު ވިދާޅުވީ އެމަނިކުފާނު ވެރިކަމުގައި ހުންނެވި ދުވަސްވަރު، އެމަނިކުފާނަށް ހުރިހާ ގޮތަކުން ވެސް އެންމެ ބޮޑު އެހީތެރިކަމެއް ފޯރުކޮށްދެއްވި ބޭފުޅަކީ ވެސް ޤާސިމް އިބްރާހިމް ކަމަށެވެ. އެ ކަންކަން ޑރ ވަހީދުގެ ވާހަކަފުޅުގައި ފާހަގަކުރެއްވީ ޤާސިމުގެ ކިބައިގައި އަށަގެންފައި ހުރި ލީޑަޝިޕް ކޮލެޓީތައް ވިދާޅުވުމަށެވެ. 

ޑރ ވަހީދު ވިދާޅުވީ ދިވެހިރާއްޖެ މިހާރު މިއޮތް ހާލަތުން ސަލާމަތްކުރުމަށްޓަކައި މިހާރު ސިޔާސީ މައިދާނުގައި ފެންނަން ހުންނެވި އެންމެ ވަރުގަދަ ބޭފުޅަކީ ޤާސިމް އިބްރާހިމް ކަމަށެވެ. 

އެހެންކަމުން ރައްޔިތުން މި ކަންކަމާއި ދޭތެރޭގައި ވިސްނާ ވަޑައިގެން މިއަހަރުގެ ރިޔާސީ އިންތިޚާބުގައި ޤާސިމަށް ވޯޓުދެއްވާ ވެރިކަން ކުރެއްވުމުގެ ފުރުސަތު އެމަނިކުފާނަށް ދެއްވުމަށް ޑރ ވަހީދު ވަނީ އެދިލައްވާފަ އެވެ.