ސެޕްޓެމްބަރު 9 ގައި ބާއްވާ ރިޔާސީ އިންތިހާބު ކާމިޔާބު ކުރައްވައި ވެރިކަމަށް އިންތިޚާބުވެވަޑައިގެންފި ނަމަ، ހދ. ކުޅުދުއްފުށީ ބޮޑެތި ގިނަ މަޝްރޫއުތަކެއް ހިންގަވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒު ވިދާޅުވެއްޖެއެވެ. 

މުޢިއްޒު ވިދާޅުވީ ކުޅުދުއްފުށްޓަކީ، ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ސަރުކާރުގައި ތަރައްޤީގެ ގިނަ މަޝްރޫއުތަކެއް ހިންގަވާފައިވާ ރަށެއް ކަަމަށެވެ. އެހެންނަމަވެސް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި 5 އަހަރުގެ ދައުރުގައި ކުޅުދުއްފުށީގައި އެއްވެސް ކަމެއް ހިންގޭތަން ނުފެންނަ ކަމަށާ، އެ ރަށް ވަރަށް ބޮޑަށް ބާކިކޮށްފައިވާ ކަމަށް މުޢިއްޒު ވިދާޅުވިއެެވެ. 

މަގު ހެދުމުގެ މަޝްރޫއު ކަމަށްވިޔަސް، ބަނދަރުގެ މަސައްކަތް ކަމަށް ވިޔަސް، އަދި ޓާޝިއަރީ ހޮސްޕިޓަލްގެ މަސައްކަތް ކަމަށް ވިޔަސް އެއިން އެއްވެސް ކަމެއް ރަނގަޅަށް ގޮސްފައި ނުވާ ވާހަކަ މިރަށު ބޭފުޅެއްވެސް އެ ވިދާޅުވީ. 

Advertisement

މުޢިއްޒު ވިދާޅުވީ، ކުޅުދުއްފުށްޓަށް ތަރައްގީ ގެނައުމަށް ވަރަށް ގިނަ ކަންކަން ކުރަން ޖެހޭ ކަމަށެވެ. އަދި ކުރިއަށް އޮތް ދައުރަށް އޭނާ އިންތިހާބު ކުރައްވައިފި ނަމަ، ކުޅުދުއްފުށީ ރައްޔިތުން ބޭނުންވާ ގޮތަށް އެ ބޭނުންވާ ތަރައްގީ އެ ރަށަށް ގެނެސްދެއްވާނެ ކަމަށް މުޢިއްޒު ވިދާޅުވިއެވެ.

ކުޅުދުއްފުށީ ޖަލްސާގެ ތެރެއިން--ފޮޓޯ/ ޕީޕީއެމް

އެގޮތުން ކޮށްދެއްވާނެ ކަމަށް ވިދާޅުވި ބައެއް ކަންކަމުގެ ތެރޭގައި؛ 

1) ކުޅުދުއްފުށީ ބޮޑެތި މަގުތަށް ތާރު އަޅައިގެން ހަދައި، ކުދި މަގުތައް ގައު އަޅައިގެން ހަދައި، މުޅި ކުޅުދުއްފުށީގެ ހުރިހާ މަގެއް ރަނގަޅު ފެންވަރެއްގައި ހެދުން

2) ހުރިހާ ބޮޑެތި ބަލިތަކަށް ފަރުވާ ލިބޭހާ ރަނގަޅު ފެންވަރުގެ ހޮސްޕިޓަލެއް ގާއިމް ކޮށްދިނުން. އަދި ހޮސްޕިޓަލުގައި މަސައްކަތް ކުރާ ގިނަ މުވައްޒަފުންނަކީ ދިވެހިން ކަމުގައި ހެދުން

3) ބޮޑު ޚަރަދެއް ކުޅުދުއްފުށީގައި ޕްރިވެންޓިވް ހެލްތު ކެއާރ ގާއިމް ކުރަން، 24 ގަޑި އިރު ޚިދުމަތްދޭ ދަމަނަ ވެއްޓެއް ގާއިމް ކޮށްދޭނަން. 

މީގެ އިތުުރުން ކުޅުދުއްފުށީގެ އިތުރުން މުޅި ރާއްޖޭގެ ހުރިހާ ރަށެއްގެ ރައްޔިތުންނަށް ގެދޮރު އެޅުމަށް އަތްފޯރާ ފަށުގައި ލޯން ސްކީމް ތަޢާރަފް ކުރައްވާނެ ކަމަށްވެސް މުޢިއްޒު ވިދާޅުވިއެވެ. އަދި އަޅަން ފަށާފައި ނުނިމި ހުރި ގެތަށް އެޅުމަށްވެސް ލޯން ސްކީމެއް ތަޢާރަފް ކުރައްވާނެ ކަމަށް މުއިއްޒު ވިދާޅުވި އެވެ. 

ހަމައެހެންމެ، އެޗްޑީއެފްސީ ގައި، ސަރުކާރުގެ ފަންޑުން ފައިސާލައި، އެ ފަންޑު ބޮޑު ކުރައްވައި، އެއިން ގެދޮރު އެޅުމަށް ލުއި ލޯނު ދޫކުރައްވާނެ ކަމަށްވެސް މުޢިއްޒު ވިދާޅުވިއެވެ. 

މުއިއްޒު ވަނީ ކުޅުދުއްފުށީ ގައިވެސް އަދި އެނޫން ރަށްރަށުގައިވެސް މިސަރުކާރުން ފަށާފައިވާ މަޝްރޫއުތަކަށް ހުރަސް އެޅުމުގެ ވިސްނުން ނުގެންގުޅުއްވާ ކަމަށް ތަކުރާރުކޮށް ވިދާޅުވެފަ އެވެ. އެގޮތުން ޕީޕީއެމްގެ ފިކުރަކީ ތަރައްގީގެ ފިކުރު ކަމަށާ، ރައްޔިތުންނަށް ފައިދާ ހުރި ތަރައްޤީގެ އެއްވެސް މަޝްރޫއެއް ނުހުއްޓުވާނެ ކަމަށް ވިދާޅުވިއެެވެ.