ސެޕްޓެމްބަރު 9 ވަނަ ދުވަހު އޮންނަ ރިޔާސީ އިންތިހާބު ކާމިޔާބު ކުރައްވައި ވެރިކަމަށް އިންތިޚާބުވެވަޑައިގެންފިނަމަ، ދިވެހި ފުލުހުންގެ މުއައްސަސާ އާއި ސިފައިންގެ މުއައްސަސާ ސިޔާސީ ނުފޫޒުން އެއްކިބާ ކޮށްދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރިޔާސީ ކެމްޕޭނަށް ބޮޑު ތިލަދުންމައްޗަށް ކުރައްވަމުން ގެންދަވާ ދަތުރުފުޅުގައި ހއ. ދިއްދޫ ބޭއްވި ޖަލްސާގައި ވާހަކަދައްކަވަމުން، މުޢިއްޒު ވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ދައުރުގައި ފުލުހުންނާއި ސިފައިންގެ މުއައްސަސާއަށް ސިޔާސީ ނުފޫޒު ފޯރުވަމުންދާތީ އެކަމާ ނުރުހުން ފާޅުކުރައްވާފައެވެ. 

އެގޮތުން ވިދާޅުވީ އެ ދެ މުއައްސަސާއަކީ ދިވެހިންގެ ފަޚުރު ކަމަށާ، ނަމަވެސް އެ ދެ މުއައްސަސާގެ އަގު ވައްޓާލުމަށް ބަޔަކު މަސައްކަތް ކުރަމުންދާކަމަށެވެ. އެހެންކަމުން އޭނާގެ ސަރުކާރެއްގައި، ގާނޫނަށް ބަދަލު ގެނެސްގެން ނަމަވެސް އެ ދެ މުއައްސަސާގެ ފަޚުރުވެރިކަން އަނބުރާ އިޔާދަ ކޮށްދެއްވާނެ ކަމަށް މުޢިއްޒު ވިދާޅުވިއެެވެ.

Advertisement

މުޢިއްޒު ވިދާޅުވީ މިނިވަން ކަމާއެކީގައި ދިވެހި ޤައުމަށް ޚިދުމަތް ކުރުމުގެ ފުރުޞަތު ސިފައިންނާއި ފުލުހުންނަށް ހޯދައި ދެއްވާނެ ކަމަށާއި، ބޭރު ޤައުމެއްގެ އަޅުވެތިކަމަށް ބާރު ދޫކޮށްލަންޖެހޭ އެއްވެސް ކަހަލަ ނުފޫޒެއް ހިންގުމުގެ ޖާގައެއް އެ ދެ މުއައްސަސާއަށް ކުރިމަތިވިޔަކަ ނުދެއްވާނެ ކަމަށެވެ. 

އެހެންކަމުން ދިވެހީންނަށް ވީތީ އާދަކުރަންޖެހޭ އަމިއްލަ ވަޠަނީ ޒިންމާ އަދާކޮށް، ކުރިއަށް އޮތް ރިޔާސީ އިންތިޚާބުގައި ދިވެހި ރައްޔިތުން ޑރ. މުޢިއްޒު އަށް ވޯޓު ދެއްވުމަށް އެދިވަޑައިގެންނެވިއެވެ.