މިހާރުގެ ސަރުކާރުން ދެވަނަ ރިޔާސީ ދައުރެއް ދިނުމަށް ރައްޔިތުންގެ ކިބައިން އެދެމުން އެދަނީ އަދި ފުރަތަމަ ދައުރުގެ ވައުދުތައް ފުއްދުމަށް ކަމުގައި ވިދާޅުވެ އެމްޑީޕީގައި އިސްކޮށް ކުރިން ހަރަކާތްތެރިވި، އަދި މިހާރު ދަ ޑިމޮކްރެޓްސްގައި ހުންނެވި އިމްތިޔާޒް ފަހުމީ ވިދާޅުވެއްޖެއެވެ. 

އެ ބޭފުޅާ މިފަދައިން ވިދާޅުވީ މިހާރު ކުރިއަށްދާ ދަ ޑިމޮކްރެޓްސްގެ ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. 

އެގޮތުން އިމްތިޔާޒް ވިދާޅުވީ އެމްޑީޕީން މީގެ ކުރިން ވެފައިވާ މައިގަނޑު ބޮޑެތި ވައުދުތައް ފުއްދުމަށް ކަމަށާއި މިއީ ހެއްވާ ޒާތުގެ ކަމެއްކަމުގައި ވިދާޅުވެ އިމްތިޔާޒް ވަނީ ސަރުކާރާ ރައީސް ޞާލިޙަށް ވަރަށް ބޮޑަށް ފާޑު ވިދާޅުވެފައެވެ. 

އަދި މީގެ އިތުރުން އިމްތިޔާޒް ފާހަގަ ކުރެއްވި ގޮތުގައި ދެވަނަ ދައުރެއް ލިބިވަޑައިގެންފިނަމަ ސިޔާސީގޮތުން އެއްވެސް ކަމެއް ހާސިލް ނުކުރައްވާނެ ކަމަށް ރައީސް ވިދާޅުވާ ވިދާޅުވުން އެއީ ކެމްޕެއިން ހަރާކާތެއް ކަމަށާއި އެއްވެސް އަސާސެއް ނެތް ވާހަކައެއް ކަމަށެވެެ.

އަދިވެސް ރައީސް ޞާލިހަށް ފާޑުވިދާޅުވަމުން އިމްތިޔާޒް ވިދާޅުވީ، 2018 ގެ ރިޔާސީ އިންތިހާބުގެ ކެމްޕެއިންގައި 4 އަހަރުގެ ދައުރެއްވެސް ދިގުކަމުގައި ވިދާޅުވި ބޭފުޅަކު އިތުރު ދައުރެއް ބޭނުންވެ ވަޑައިގެން އުޅުއްވުމަކީ ހުތުރު ކަމެއްކަމުގައެވެ. 

ހަމައެއާއެކު އިމްތިޔާޒް ވިދާޅުވީ، ދައުލަތު ވަސީލަތްތައް ނަހަމަ ގޮތުގައި ބޭނުންކުރައްވަމުން ރައީސް ޞާލިޙް އިތުރު ދައުރެއް ލިބިވަޑައިގަންނަވާތޯ މަސައްކަތް ކުރައްވާތަން ފެނިވަޑައިގަަންނަވާކަމުގައެވެ. 

މީގެ އިތުރުން އިމްތިޔާޒް ގެ ވާހަކަފުޅުގައި ވިދާޅުވީ، 2018 ގައި އެމްޑީޕީގެ ވެރިކަމެއް ގެނައުމަށް ކެނޑިނޭޅި އެންމެ ގަދަޔަށް މަސައްކަތް ކުރެއްވި ފަރާތްތައް މި ސަރުކާރުން ވަޒީފާއިން ވަކިކުރަމުން އެ ގެންދަނީ ރައީސް ޞާލިޙަށް ދެވަނަ ދައުރެއް ދޭން ބޭނުން ނުވާތީ ކަމުގައެވެ. 

އެހެން ނަމަވެސް 2018 ގައި އެ ފަރާތްތަކުން މަސައްކަތްކުރެއްވީ އެމްޑީޕީގެ ވެރިކަމެއް ގެނައުމަށް ކަމަށާއި ރައީސްއަށް ދެވަނަ ދައުރެއް ހޯދައި ދިނުމުގެ ވާހަކަ އެއްވެސް ބޭފުޅަކު ދައްކަވައިފައި ނުވާނެ ކަމުގައި އިމްތިޔާޒް ވިދާޅުވިއެވެ.