މިއީ ތަޢުލީމީ އޮޑިއެއްގެ ދަތުރަށް ފަރިތަ، ކުޅަދާނަ އަދި އެހާމެ ކެރޭ މާލިމީއެއްގެ ވާހަކައެވެ.

ދުރުވިސްނޭ ސިޔާސަތެއްގެ ވޮށުގެ އަލިކަމުން އާންމު ތަޢުލީމަކުން ތައުލީމުގެ އައު ހަރުފަތަކަށް ރަށެއް ގެންގޮސްދިން ތާރީޚީ ނާޛިރެއްގެ ވާހަކައެވެ. ރަށެއްގެ ތަޢުލީމީ ތާރީޚު ބަދަލުކޮށްލި ކުޅަދާނަ ހިންގުންތެރިއެއްގެ ވާހަކައެވެ. ތައުލީމީ ޖީލެއް ބިނާކުރި ހިޔާލެއްގެ އޮޅިގަނޑު ބަލަހައްޓައިދިން ތައުލީމީ ޖީލެއްގެ ބައްޕައެއްގެ ވާހަކައެވެ. އާދެ! ފ އަތޮޅު ތައުލީމީ މަރުކަޒުގެ ޕްރިންސިޕަލް، ފ ނިލަންދޫ އަތިރީގޭ އަބްދުالله އަޙްމަދު (49 އަހަރު) ގެ ކާމިޔާބު ތައުލީމީ ހަޔާތުގެ ވާހަކައެވެ. 

މަޑުމައިތިރި މިޒާޖެއްގެ އަބްދުالله، ގިނަ ބަޔަކު ދަންނަ ނަމުން ނަމަ އަބްދޯސަރ އަކީ ފ ނިލަންދޫ އަތިރީގޭ އަހްމަދު މޫސާއާއި ފ ފީއަލީ މަރިޔަމް ހަމީދާއަށް ލިބިވަޑައިގެން 11 ބޭފުޅުންގެ ތެރެއިން 10 ވަނަ ދަރިކަލުންނެވެ. ކައިވެނި ބައްލަވައިގެން އުޅުއްވަނީ ބ އޭދަފުށީ ފެންއާރު، ސީޒާ މުސާއާއެވެ. ކައިވެނިފުޅަށް ދެ ފިރިހެން ކުދިންނާއި އެއް އަންހެން ކުއްޖަކު އެބަތިއްބެވެ. 

އަބްދުالله ގެ ތައުލީމުގެ އެންމެ ދުރު ހަނދާނަކީ، އާއިލާގެ އެންމެ ދޮށްޓަށް ހުންނެވި ބޭބެ ފަހިކޮށްދެއްވި ފުރުސަތެއްގައި، އުމުރުން އެންމެ 11 އަހަރުގައި މާލޭ ކިޔަވަން ދިއުމަށް ލިބުނު ފުރުސަތެވެ. ކިޔެވުމަށް މާލެ އައިސް އެންމެ ފުރަތަމަ އަބްދުالله ހުންނެވީ ބޭބެގެ ރަހުމަތްތެރިއެއްގެ ގޭގައެވެ. އެދުވަސްވަރަކީ ދިވެހިރާއްޖެގެ ތައުލީމީ ނިޒާމްގެ ތެރެއަށް އިނގިރޭސި ތައުލީމު އެންމެ ތާޒާ އޭގެ އެންމެ ޅަފަތުގެ ދުވަސްވަރުވެސް މެއެވެ. އެހެންކަމުން ޚުދު އަބްދުالله އަށްވެސް އިނގިރޭސި ތައުލީމު އެއްވެސް ވަރަަކަށް ޙާސިލްކުރެވިފައެއް ނުވެއެވެ. އޭރު މާލޭގައި ހިންގާ ޕްރައިވެޓް ސްކޫލްތަކަށް ވަނުމުގެ އުސޫލުތައް އޮންނަ ގޮތުން ސްކޫލަށް ވަނުމުގެ ކުރިން ފެންވަރު ވަޒަން ކުރުމުގެ އިމްތިހާނެއްގައި ބައިވެރިވާނެ ޖެހެއެވެ. އެހެންކަމުން މާލެއައުމަށް ފަހު ހަފްތާއެއް ނުވަތަ ދެހަފްތާއެއްހާ ދުވަހު އިނގިރޭސި އަދި ހިސާބު އުނގެނުމަށް ޓީޗަރެއްގެ ކައިރިއަށް އަބްދުالله ދިޔައެވެ. 

އެއަށްފަހު މާލޭގައި އެދުވަސްވަރު ހުންނަ އެމްއީއެސް ސްކޫލަށް ވަނުމަށްޓަކައި އޮންނަ އުސޫލުގެ ދަށުން އަބްދުالله ވެސް ފެންވަރު ވަޒަން ކުރުމުގެ އިންތިހާބުގައި ބައިވެރިވިއެވެ. އެއްވެސް ވަރަަކަށް އެއްޗެއް ނޭނގޭކަންވެސް އެނގިހުރެމެއެވެ. އެހެނަސް ސްކޫލަށް ވަދެވެން އޮންނަނީ އެ މަރުހަލާތައް ފުރިހަމަކޮށްގެން ކަމުގައިވާތީއެވެ. 

ކޮންމެއަކަސް ފެންވަރު ވަޒަންކުރުމުގެ އިމްތިހާނުގެ ނަތީޖާ އައި އިރު އަބްދުاللهގެ އިނގިރޭސި ފެންވަރު މާބޮޑަށް ދަށީއެވެ. ވުމާއެކު އޭރު އެމްއީއެސްގެ ހެޑް މާސްޓަރ އަލީ މުސްތަފާގެ ލަފާފުޅުގެ މަތިން އެ ސްކޫލުގެ އެންމެ ދަށް ގްރޭޑް ކަމުގައިވާ، ޔޫކޭޖީ ކްލާހަށް އަބްދުالله ވެއްދީއެވެ. 

ރާއްޖޭގެ ތައުލީމީ ހާލަތު އެހާވެސް ދަށް ދުވަސްވަރެއްގައެވެ އާއިލާއާއި ދުރުގައި ނުވެސް ދަންނަ ބައެއްގެ ކައިރީގައި ތައުލީމު ހާސިލްކުރުމަށް ހުރުން ވެވަޑައިގަތީ އަބްދުالله އަށް ވަރަށް ބޮޑު ގޮންޖެހުމަކަށެވެ.

ރަނގަޅު ފެންވަރުގެ ތައުލީމެއް ލިބެން ފެށި އިރު އަބްދުالله އަކީ ހިތް އަލި ކުއްޖެއްކަމުގައި ވުމުން ކުރު މުއްދަތެއްގެ ތެރޭގައި ގިނައެއްޗިހި ދަސްވެ، ތައުލީމީ ފެންވަރު ރަނގަޅުވުމުގެ ނަތީޖާއެއްގެ ގޮތުން 3 އަހަރު ތެރޭގައި ޑަބަލް ޕްރޮމޯޝަން ލިބި ގްރޭޑް ހަޔަކާއި ހަމައަށް އާދެވުނެވެ. 

އަބްދުالله ގެ ގްރޭޑް ހައެއްގެ އަހަރު ދިމާވީ 3 ނޮވެމްބަރުގެ ހަމަލާ ރާއްޖެއަށް ކުރިމަތިވި އަހަރާއެވެ. އޭގެ ޖެހިގެން އަންނަ އަހަރަކީ އެދުވަސްވަރު ރާއްޖޭގެ ސްކޫލްތަކުގައި ގްރޭޑް 7 ނިންމުން ދޭ ޖޫނިއަރ ސްކޫލް އެގްޒަމިނޭޝަން (ޖޭއެސްއީ) އިންތިހާބުގައި އަބްދުالله އިށީންނަން ޖެހޭ އަހަރުވެސް މެއެވެ. އެހެންނަމަވެސް އޭރުގެ ސަރުކާރުން އެ އިމްތިހާނު އުވާލަން ނިންމުމުން ޖޭއެސްއީ އިމްތިހާނު ހެދުމާކާއި ނުލައި އަބްދުالله އަށް ގްރޭޑް އަށަކަށް ދެވުނެވެ. 

އަބްދުالله ގެ އިނގެރޭސި ފެންވަރު ރަނގަޅު ކުރުމަށްޓަކައި ބުރަ ބޮޑެތި މަސައްކަތްތައް ކުރަންޖެހުނެވެ. އެގޮތުން އިނގެރޭސި ފެންވަރު ރަނގަޅުކުރުމަށްޓަކައި އިނގެރޭސި ފޮތްތައް ކިޔުމަށްޓަަކައި ގައުމީ ކުތުބުޚާނާއަށް ދާންފެށިއެވެ. އެހެންނަމަވެސް އިނގިރޭސި ފެންވަރު މާބޮޑަށް ދަށްވުމުގެ ސަބަބުން ކުތުބުޚާނާއިންވެސް ފަށައިގަންނަން ޖެހުނީ އެންމެ އާންމު ފެންވަރުގެ ފޮތްތަކުންނެވެ. ކުޑަކުދިންނަށް ޚާއްސަ ކުރު ޖުމުލަ ހުންނަ ފޮތްތަކުންނެވެ. 

ކޮންމެއަކަސް ބުރަ މަސައްކަތުން ކުރު މުއްދަތެއްގެ ތެރޭގައި އަބްދުالله ގެ އިނގެރޭސި ބަހުގެ ފެންވަރަކަށް އުއްމީދު ކުރި ވަރަށްވުރެ ހަލުވި ކުރިއެރުމެއް ލިބުނެވެ. 

ބަހުގެ އިލްމު އިތުރު ކުރުމަށް އަބްދުالله ކުރެއްވީ އެންމެ މުހިއްމު ކަމަކީ ފޮތް ކިޔުމުގެ އިތުރަށް، އާންމު އުޅުމުގައި ވެސް އަމިއްލަ ބަހުން ހިތުގައި އުފެދޭ ޝުއޫރުތަކާއި ޚިޔާލުތައް އިނގިރޭސި ބަހަށް ތަރުޖަމާކޮށްގެ ސިކުނޑީގެ ތެރޭގައި އޭގެ ޚިޔާލާތުތައް އުފެއްދުމެވެ. އަދި އެ ޚިޔާލުތައް ލިޔުމެވެ. 

ކޮންމެއަކަސް އަބްދުالله ގެ މިންނެތް މަސައްކަތުން އިނގެރޭސި ބަހުގައިވެސް ކްލާހުގެ އެންމެ މަތީ ނަތީޖާ ހާސިލްކުރި ދަރިވަރެއް ކަމުގައިވީ އަބްދުالله ވިއެވެ. 

މަދަރުސީ ތައުލީމުގައި އެންމެ ދަތި އެއް އަހަރާއި އަބްދުالله ކުރިމަތިލާން ޖެހުނީ ގްރޭޑް 10 ގެ އަހަރުއެވެ. ތަފާތު ސަބަބުތަކާއި ހުރެ އޭރު ކިޔަވަންހުރި ގެއިން ބަދަލުވަން ޖެހުނެވެ. 

ގްރޭޑް 10 ނިމި ނަތީޖާ ލިބުނު އިރު އަބްދުالله ގެ ނަތީޖާވެސް އެންމެ ހީކުރިހާ ނަތީޖާވެސް އެންމެ ރަނގަޅެއް ނޫނެވެ. އެކަމަކު ފާސްވިއެވެ. ވުމާއެކު އޭރު އެންމެ އެކުގައި އުޅުނު އެކުވެރިންނާއެކު ވަޒީފާއަކަށް ދިއުމަށް ބޭބެގެ ގާތުގައި އެދުނެވެ. އެގޮތުން ސްޓެލްކޯއިން ހުޅުވާލި ފުރުސަތެއްގައި އެ ތަނުގެ ވަޒިފާއަށް އެދި ހުރިހާ އެކުވެރިން އެއްކޮށް ސިޓީލިއެވެ. ވަޒީފާއާއި ސްކޮލަރޝިޕް ގެ ފުރުސަތުވެސް އެންމެ ފަހިކޮށް އޮތީ އަބްދުالله އަށެވެ. ވަޒީފާއަށް އެދި ހުށަހެޅި ފަރާތްތަކުގެ ތެރެއިން ނަތީޖާ އެންމެ ރަނގަޅު ފަރާތަކީވެސް އަބްދުالله އަށް ވާތީއެވެ. 

ކޮންމެއަކަސް ބޭބެގެ ބުނުމަށް އިތުރު ހިތްވަރެއް ކުރިއަށް އަޅައި މަތީ ސާނަވީ ތައުލީމުގެ ވެސް އަބްދުالله ފުރިހަމަ ކުރެއްވިއެވެ. ސާނަވީ ތައުލީމު ފުރިހަމަ ކުރެއްވީ އޭރުގެ އެސްސީސީ (މިހާރުގެ ސީއެޗްއެސްސީ) އިންނެވެ. 

އަބްދުالله ގެ ނުރަސްމީ ފުރަތަމަ ވަޒީފާއަކީ ބޭބެ އޭރު ހިންގި ޓިއުޝަން ކްލާހެވެ. ސްކޫލުގައި އުޅެމުން އަބްދުالله ވެސް އައީ ޓިއުޝަން ކްލާހުގައި ކިޔަވައިދެމުންނެވެ. މަހަކު 200 ރުފިޔާގެ މުސާރައެއްވެސް ލިބުނެވެ. 

މަތީ ސާނަވީއަށްފަހު އަބްދުالله ބޭނުންވީ ސިފައިންގެއަށް ވަނުމަށެވެ. އެކަމަކު ބޭބެ އެއްވެސް ވަރަަކަށް ރުހޭ ކަމަކަށް އެކަންވެސް ކުރުމަށް އަބްދުالله ބޭނުންނުވީއެވެ. 

ސިފައިންގޭގެ ވިސްނުން ދޫކޮށްލުމަށްފަހު އަބްދުالله ގެ ރަސްމީ ފުރަތަމަ  ވަޒީފާއެއްގެ ގޮތުގައި އެޓޯލްސްއަށް ވަދެވަޑައިގަތެވެ. 1130ރ ގެ މުސާރައަކަށް އެޓޯލްގައި ދުވަސްކޮޅަކު އުޅުއްވުމަށްފަހު ފ އަތޮޅު އޮފީހުގެ ވަޒީފާއަކަށް ބަދަލުވެވަޑައިގަތިއެވެ. އޭރު ފ އަތޮޅުގެ ވެރިކަން ކުރަނީ އެ އަތޮޅު މަގޫދޫގައެވެ. 

ނަމަވެސް ސްކޫލު ދުވަސްވަރުން ފެށިގެންވެސް ކިޔަވައިދިނުގެ ތެރޭގައި އުޅެވިފައި ހުރުމުގެ ސަބަބުން އަތޮޅު އޮފީހާއި ގުޅިވަޑައިގެން ފަހުންވެސް ކިޔަވައިދިނުމަށް ހިތުގައި އޮތް ލޯތްބާއި ޝައުގުވެރިކަން އެއްވެސް ވަރަަކަށް ފަނޑުވާގޮތެއް ނުވިއެވެ. 

އެހެންވެގެން އަބްދުالله ގެ ބޭބެ ގާތުގައި ވަރަށް ގިނައިން އެދިގެން 1997 ވަނަ އަހަރު ނިލަންދޫ ސްކޫލުގެ އެސިސްޓެންޓް ޓީޗަރެއްގެ މަގާމަށް ބަދަލުވިއެވެ. އެއީ އެ އަހަރުގެ ޖޫން މަހުގެ ތެރޭގައެވެ.

އޭގެ ފަހުންވެސް މަތީ ތައުލީމު ފުރިހަމަކުރުމަށްފަހު އައިސް އަނބިކަނބަލުންގެ ރަށް، ބ އޭދަފުށީ ސްކޫލުގައި ދެތިންމަސްވަންދެން ޓީޗަރެއްގެ ގޮތުގައި މަސައްކަތްކުރިއެވެ. އެހެންނަމަވެސް އަބްދުالله ގެ ބައްޕަގެ ބަލިހާލަތު ބޮޑުވެ އަނެއްކާވެސް ބައްޕަގެ ކައިރިއަށް އެނބުރި ރަށަށް ބަދަލުވީއެވެ. 

1997 ވަނަ އަހަރުގެ ޖޫން އިން ފެށިގެން އެ އަހަރުގެ ބާކީ މުއްދަތުގައި އެ ރަށު ސްކޫލުގެ އެސިސްޓެންޓް ޓީޗަރެއްގެ މަގާމުގައި ހުރުމަށްފަހު ޖެހިގެން އައި އަހަރު އިންސްޓިޓިއުޓް އޮފް ޓީޗިންގް އެޑިއުކޭޝަން (އައިޓީއީ) ގެ ފަރާތުން ކުރިއަށް ގެންދިޔަ ނެޝަނަލް ޑިޕްލޮމާ ކޯހުގައި ބައިވެރިވެ މާލެ ކިޔަވަން އައެވެ. 

އެ ކޯސް ފުރިހަމަ ކުރުމަށްފަހު 2000 ވަނަ އަހަރު މަޖީދިއްޔާ ސްކޫލަށް، ހިސާބު/ފިޒިކްސް ޓީޗަރެއްގެ ގޮތުގައި ގުޅިވަޑައިގަތެވެ. އެހެންނަމަވެސް މަޖީދިއްޔާ ސުކޫލުގައިވެސް ހޭދަވީ 6 ވަރަކަށް މަސްދުވަހެވެ. ލިބިލެއްވި ސްކޮލަރޝިޕެއްގައި އިންޑިޔާގެ ބެންގަލޫރ ޔުނިވާސިޓީއަށް ޑިގްރީ ހާސިލްކުރުމަށް ފުރިއެވެ.  ފުރަތަމަ އަހަރުގެ ކިޔެވުން ފުރިހަމަ ކުރެއްވުމަށްފަހު ރާއްޖެ އައި ދަތުރުގައި ކައިވެނި ބައްލަވައިގަތެވެ. ކިޔެވުމުގެ ދެވަނަ އަހަރުގައި ފުރަތަމަ ދަރިކަލުން ލިބިވަޑައިގަތުމުން އަނބިކަނބަލުންނާއެކު އިންޑިޔާއަށް ގެނައެވެ. އަބްދުލް ގެ ކިޔެވުން ފުރިހަމަ ކުރުމަށްފަހު އެނބުރި ރާއްޖެ އައީ 2003 ވަަނަ އަހަރުއެވެ. 

ބައްޕަގެ ބަލި ހާލަތު ހުރިގޮތުން އޭދަފުށީގައި ދެތިންމަސް ވަންދެން އުޅުމަށްފަހު އެނބުރި ރަށަށް އައިސް އަނެއްކާވެސް ރަށު ސްކޫލުގެ ޓީޗަރެއްގެ ގޮތުގައި ގުޅުނެވެ. އޭރު 2004 ވަނަ އަހަރުގެ ގްރޭޑް 10 ގެ ބެޗްތަކަށް ކިޔަވައިދިނުމާއި ހަވާލުވެގެން މަސައްކަތް ކުރަމުން އައިސް 2005 ވަނަ އަހަރުގެ މެދު ތެރޭގައި އޭރު އެރަށު ސްކޫލްގެ ހެޑް މާސްޓަރ އަކަށް ހުންނެވި ބޭފުޅާ ޗުއްޓީއަށް ދިއުމަށް ފަހު އެނބުރި ނުއެއް އާދެއެވެ. އެ އަހަރުގެ މިޑްސެމިސްޓަރ ބްރޭކް ގައި އޭދަފުށީގައި ހުއްޓައި މިނިޓްރީގެ ފަރާތުން އަބްދުالله އަށްގުޅައި ޗުއްޓީ ކުރުކޮށްލުމަށްފަހު މިނިސްޓްރީއަށް އައުމަށް އެންގިއެވެ. 

ކޮންމެއަކަސް ސްކޫލުގެ ޕްރިންސިޕަލްކަމުގެ ބިޔަ މަސްއޫލިއްޔަތާއި ހަވާލުވެ އަބްދުالله އެނބުރި ރަށަށް އައިއިރު އޭނާގެ ހިތުގައި ނުތަނަވަސްކަމެއް އޮތެވެ. ފ އަތޮޅު ތައުލީމީ މަރުކަޒުގެ ޕްރިންސިޕަލްކަމަށް އައްޔަނުކުރެވުނު ފ ނިލަންދޫގެ ފުރަތަމަ ރައްޔިތަކަށްވުމުގެ އިތުރުން އަބްދުالله އައްޔަނުކުރެވުނީ އުމުރުގެ ގޮތުންނާއި ތަޖުރިބާގެ ގޮތުން އަބްދުالله އަށް ވުރެ ދޮށި އަދި ތަޖްރިބާކާރު ގިނަ ބައެއްގެ ވެރިއަކަށް ކަމުގައިވުމެވެ. 

 މިކަމުގެ ސަބަބުން ފުރަތަމަކޮޅު ބައެއް މުވައްޒަފުންގެ ބައްދަލުވުންތަކުގައި ވާހަކަދައްކަން ޖެހުމުން ތުރުތުރު އަޅާގޮތްވެސް ވިއެވެ. 

ޕްރިންސިޕަލްކަމާއި ހަވާލުވި އިރު ސްކޫލުކީ އަތޮޅު ފެންވަރުގައިވެސް އާންމު ދަރަޖައިގެ ސްކޫލެކެވެ. އެދުވަސްވަރު ރާއްޖޭގެ ސްކޫލްތަކުގައި ސާނަވީ ނަތީޖާ ވަޒަންކުރާ މިންގަނޑުކަމުގަައިވާ އޭޕީ ސްކޮރގައި އެ ސްކޫލަށް އެންމެ މަތިން ސްކޮރ ކުރެވިފައިވަނީވެސް 32 ކެވެ. އެހެންކަމުން ތައުލީމުގެ އައު ހަރުފަތަކަށް ސްކޫލު ގެންދިއުމަށްޓަކައި ޖިޔަވައިދިނުގެ ގިނަ އުސޫލުތަަކަަކާއި ވައްޓަފާޅި ތަކެއްވެސް ބަދަލު ކުރަން ޖެހޭކަމަށް އަބްދުالله އަށް ގަބޫލު ކުރެވުނެވެ. އެހެނަސް އެކަަންކަން ބަދަލުކޮށްލުމަކީ ގޮންޖެހުން ބޮޑު މަސައްކަތެއްކަން އެނގިހުރެވެސްމެއެވެ. 

ކޮންމެއަކަސް ނަތީޖާ ނެރުމަށްޓަކައި އެންމެ އިސްކަމެއް ކަމުގައި އަބްދުاللهއަށް ފެނުނީ މީހުންގެ ވިސްނުން ބަދަލުކުރުމުގެ މަސައްކަތުން ފިޔަވަޅު ފެށުމަށެވެ. މި މަސައްކަތުގެ ތެރެއިން ކުދި ކުދި އުސޫލުތައް ބަދަލުކުރަމުން ގެނދިޔައީ އެކަމާއި މެދު ކަންބޮޑުވުން ހުރި ފަރާތްތަކުގެ ކަންބޮޑުވުންތައްވެސް އަޑު އަހަމުންނެވެ. 

ކޮންމެއަކަސް ކުރެވުނު މަސައްކަތުން ފުރަތަމަ އަހަރުގެ ނަތީޖާގައި އޭޕީ ސްކޮރ ތަންކޮޅެއް މައްޗަށް ޖައްސައިލެވުނެވެ. އެހެނެއްނަމަވެސް ތަފާތު ބޮޑު ނަތީޖާއެއް ނެރުމަށްޓަކައި ކުރަންޖެހޭ މަސައްކަތް ދެގުނައަށް އިތުރުކުރަން ޖެހުނެވެ. 

ޕްރިންސިޕަލްކަމާއި ހާވާލުވުމުގެ ފަހުގައިވެސް އަބްދުالله ކިޔަވައިދިނުން ދޫކޮށެއް ނުލައެވެ. އެ އަހަރުގެ ގްރޭޑް 10 ގެ ދަރިވަރުންނަށް ހިސާބު މައްދާ ކިޔަވައިދިނީވެެސް އަބްދުالله އެވެ. 

އޭގެ ފަހުންވެސް މިއަދާއި ހަމައަށްވެސް ޓީޗަރަކު މަދުވެއްޖެ ކޮންމެ ހާލަތެއްގައި އެ ކްލާހަކާއި ހަވާލުވެ، އެ މާއްދާ ކިޔަވައިދެމުން އަންނީ އަބްދުالله އެވެ. 

ދެ އަހަރެއްހާ ދުވަހުގެ މަސައްކަތުންނާައި ބެލެނިވެރިންނާއި ޓީޗަރުންގެ ގުރުބާނީގެ ނަތީޖާއެއްގެ ގޮތުން 2008 ވަނަ އަހަރު ފ އަތޮޅު ތައުލީމީ މަރުކަޒުން ސާނަވީ އިމްތިހާނު ހެދި ދަރިވަރުންގެ ތެރެއިން ގައުމީ ގަދަ ދިހައެއްގައި ދަރިވަރަކު ހިމެނިގެން ދިޔައެވެ. އަދި އަހަރުގެ އޭޕީ ސްކޮރ 89 އަކަށްވެސް އެރުވުނެވެ.

އެހެންނަމަވެސް 2007 ވަނަ އަހަރުން ފެށިގެން 2008 ވަނަ އަހަރުގެ މެދަކާއި ހަމައަށް މާސްޓަރސް ހާސިލްކުރުމަށް އަބްދުالله އިންޑިޔާގައި ހުރުމުން އެ މުއްދަތުގައި ސްކޫލުގެ ހިންގުމާއި ހަވާލުވެ ހުންނެވި އަސްލަމްއަށް މި ކާމިޔާބީގެ ބޮޑު ހިއްސާއެއް އަބްދުالله ހާއްސަކުރެއެވެ. 

މީގެ އިތުރުން ސްކޫލުގެ މި ފުރިހަމަ ނަތީޖާއާއެކު ޖެހިގެން އައި އަހަރު އެ ސްކޫލުގައި މަތީ ސާނަވީ އުފެއްދުމުގެ ފުރުސަތު ލިބިގެން ދިޔައެވެ. ކިޔެވުން ފުރިހަމަކުރުމަށްފަހު އަބްދުالله އެނބުރި އައި އިރު މަތީ ސާނަވީ އުފެއްދުމުގެ މަސައްކަތްތައްވެސް އޮތީ ފެށިފައެވެ. 

އޭގެ ފަހުން ސާނަވީ އަދި މަތީ ސާނަވީ އިމްތިހާނުތަކުން އެ ސްކޫލުގެ ދަރިވަރަކު ގައުމީ ގަދަ ދިހައެއްގައި ނުހިމެނޭ އަހަރެއް ނުދެއެވެ. އަދި އަހަރަކަށްވުރެ އަހަރެއް އައީ ނަތީޖާ ރަނގަޅުވަމުން ނުވަތަ އެއް މިނެއްގައި ހިފެހެއްޓިގެންނެވެ. 

މި ފާއިތުވި އަހަރުވެސް ސާނަވީ އިމްތިހާނުން 7 ދަރިވަރަކު އަދި މަތީ ސާނަވީ އިމްތިހާނުން 9 ދަރިވަރަކު އެ ރަށު ސްކޫލުން ވަނީ ގައުމީ ގަދަ ދިހައެއްގައި ހިމެނިފައިއެވެ. 

ތައުލީމީ ފިޔަވަޅުތަކުގެ އިތުރުން އިދާރީ ހިންގުމުގައިވެސް އަބްދުالله ގެ ވިސްނުން ތަފާތެވެ. އަބްދުالله ދެކޭ ގޮތުގައި ސަރުކާރުތަކުގެ ސިޔާސަތުތަކުގެ ތެރެއިން ސްކޫލުތަކަށް ކަނޑައެޅޭ ކުޑަކުޑަ ބަޖެޓުގެ ތެރެއިން ސްކޫލުތަކުގެ ހިންގުމުގެ އެންމެހައި ކަމެއް ކުރަންވެއްޖެނަމަ ގިނަ ކަންކަން ނުކުރެވި، މުހިއްމު ކަންކަމަށް ފައިސާއެއް ނުހުންނާނެއެވެ. 

މި ވިސްނުމުގައި އަބްދުالله އަމާޒުހިފީ ސްކޫލުގައި ކުރަން ހުންނަ ކުދި ކުދި މަސައްކަތްތައް އަމިއްލައަށް ކޮށްލައިގެން އެކަމަށް ހަރަދުވާ ފައިސާ ސަލާމަތްކުރުމެވެ. މި ވިސްނުމުގެ ދަށުން ސްކޫލުގެ ފާހަނަ ސާފުކުރުމުގެ މަސައްކަތާއި ހަމައިން ފުރާޅު ސާފުކުރުމުގެ މަސައްކަތާއި ހަމައަށް ކުރަން ޖެހުނު ކޮންމެ މަސައްކަތެއް އަމިއްލަ ކަމެއް ކަމުގައި ދެކިގެން އަބްދުالله އައީ ކުރަމުންނެވެ. 

އަބްދުالله ގެ ކާމިޔާބީގެ އެންމެ ބޮޑު ހިއްސާދާރެއްގެ ގޮތުގައި ފާހަގަކުރަނީ އެއްބަނޑު އެއްބަފާ ބޭބެ މުހައްމަދު ޖަލީލަށެވެ. ބޭބެގެ ހިކުމަތްތެރި ވިސްނުމާއެކު އަބްދުاللهއަށް ދެއްކި މަގުން ފިޔަވަޅު ނޭޅިނަމަ، މިއަދު ހުރި ކާމިޔާބީ މަންޒިލްގެ ތަސްވީރެއްވެސް އަބްދުالله އަށް ނުފެނުނީސް ކަމުގައި އަބްދުالله ދެކެއެވެ. 

ކާމިޔާބު ފްރިންސިޕަލެއްގެ އިތުރުން ރަސްމީ މަސައްކަތުން ބޭރުގައި ކާމިޔާބު މީހަކަށް ވުމުގައި އަބްދުالله ގެ އާއިލާގެ އިތުރުން ހާއްސަކޮށް، އަނބިމީހާގެ އެއްބާރުލުމާއި އެހީތެރިކަން އަބްދުالله ފާހަގަކުރެއެވެ. 

ރަސްމީ މަސައްކަތުން ބޭރުގައިވެސް އަބްދުالله އަކީ ނަމޫނާއެކެވެ. ދިރިއުޅުމުގެ ހުރިހާ ޒިންމާއެއް ފުރިހަމައަށް އަދާކުރާ، އެއްވެސް ކަމަކަށް ފަރުވާ ކުޑަނުކުރާ ފިރިއެކެވެ. ދަރިންގެ ހުރިހާ ޒިންމާތަކެއް އެންމެ ފުރިހަމައަށް ނަގައިގެން ދިރިއުޅުމަށްޓަކައި އެކުދިންނަށް ހެޔޮ ތަރުބިއްޔަތުދޭ ތަރުބަވީ ބައްޕައެކެވެ. އުމުރުން ދުވަސްވެފައިވާ މައިންބަފައިން ބެލުމުގެ މަސްއޫލިއްޔަތާއި ހަވާލުވެ އެ ދެމީހުންނަށް އަޅާލުމާއި އޯގާތެރިކަންދޭ ކިޔަމަންތެރި ދަރިއެކެވެ. 

ކޮންމެއަކަސް ބުރަ މަސައްކަތާއި އެތަކެއް ގުރުބާނީއެއްގެ ނަތީޖާއެއްގެ ގޮތުން، މިއަދު ފ އަތޮޅު ތައުލީމީ މަރުކަޒަކީ މުޅި ރާއްޖެއިންވެސް ހޮވާލެވޭ އެއް ސްކޫލު ކަމުގައިވެއްޖެއެވެ. 

ސާނަވީ އިމްތިހާނު ތަކުގައްޔާއި މަތީ ސާނަވީ އިމްތިހާނުތަކުގައި އެ ސްކޫލުން ހޯދަމުން އަންނަ ނަތީޖާ އަހަރަކަށް ވުރެ އަހަރެެއް އަންނަނީ ރަނގަޅު ކުރަމުންނެވެ. 

މިއަދު ފ އަތޮޅު ތައުލީމީ މަރުކަޒުގެ ތައުލީމީ ދަތުރުގެ ރިޔާ ހުރީ ފައްސިޔަކޮށެވެ. ސީދާ ކާމިޔާބީގެ މަލަމައްޗާއި ދިމާއަށް ތެދުކޮށްފައޭ ބުނެވިދާނެއެވެ. އެހެން ދަތުރުގެ ތެރެއިން ބަނދަރުކުރަންޖެހޭ ކާމިޔާބީގެ ކޮންމެ ބަނދަރަކަށްވެސް ފަސޭހަކަމާއެކު ބަނދަރުކުރަމުންނެވެ. ކުރިމަތިވާ ކޮޅިގަނޑުތަކާއި ރާޅުތަކާއި ދެކޮޅަށް އޮޑި ފަހި ކުރުމަށް ގާތްގަނޑަކަށް ހުރިހާ ހުރިހާ ފަޅުވެރިންވެސް އެއް އަންބާ އެއް ކިޔައިގެންނެވެ. ވުމާއެކު މި ކާމިޔާބު ދަތުރުގެ އިސްމޭސްތިރިއަކީ އޮޑީގެ މާލީމީ، އަބްދުالله އަހްމަދު ކަމުގައި ނޫނީ ނުވާނެއެވެ. 

މިއަދު ފ ނިލަންދޫގައި އުފެދެމުން އެދަނީ ރަށުގެ ތާރީޚުގައިވެސް ދުށް އެންމެ ތައުލީމީ ޖީލުތަކެވެ. ފ ނިލަންދޫ ތާރީޚުގެ ތެރޭގައި ލިޔެވެމުން ވެސް އެދަނީ ރާއްޖޭގައި ތައުލީމީ ރޮނގުން އެންމެ ބޮޑެރި ކާމިޔާބީތައް ހޯދަމުންދާ ރަށްތަކުގެ ގޮތުގައެވެ. 

ފ ނިލަންދޫ ގައި ހުންނަ ފ އަތޮޅު ހޮސްޕިޓަލަކީ ރާއްޖެއިންވެސް އެންމެ ފުރަތަމަ 100 އިންސައްތަ ދިވެހި ނަރުހުން މަސައްކަތް ކުރަންފެށި ހޮސްޕިޓަލެވެ. އެ ރަށުގެ 15 އަށް ވުރެ ގިނަ ކުދިން ޑަކްޓަރީކަންވެސް އަންނަނީ ކިޔަވަމުންނެވެ. ރަށަށް ބޭނުންވާ އެއްވެސް ވަޒީފާއަކަށް ކުއްޖަކު ނުކިޔަވާ ރޮނގެއް ނެތެވެ.

ވުމާއެކު ފ ނިލަންދޫގެ މި ތައުލީމީ ޖީލު ބިނާކުރުމުގެ ފުރާޅުގެ ބެލެނިވެރި ފަރާތެއްގެ ގޮތުގައި ހުރެ އަބްދުالله އެކުލާލި އުސޫލުތަކާއި ރުކުރުވާލި ބަދަހިކަމުގެ ނަތީޖާއިން ނިކުނތް ނޭވާ ކިހައި ފޮނި ނޫންތޯއެވެ؟ 

ހަމަ ޔަގީނުންވެސް ފ ނިލަންދޫ ދެކެމުން އެދާ ތައުލީމީ ރަންދުވަސްތަކާއި ތައުލީމީ ޖީލުގެ ހަގީގީ ބައްޕައަކީ އަބްދުالله އަހްމަދުކަން ގައިމެވެ.

" ވޮއިސް ޓީމުގެ ފަރާތުން އަބްދުالله އަހްމަދަށް އިތުރު ކާމިޔާބީއާއި އުފާ ފާގަތިކަމަށް އެދެމެވެ."