ހުޅުމާލެ ލިންކު ރޯޑުގެ ބައެއް ހިސާބުތައް މާދަމާ ބަންދު ކުރާނެ ކަމަށް އެންވަޔަރަންމަންޓް މިނިސްޓްރީން ބުނެފިއެވެ.

އެ މިނިސްޓްރީއިން ބުނީ ލިންކް ރޯޑުގައި ގާއިމުކުރާ ސޯލާ ޕީވީ ނިޒާމުގެ މަސައްކަތްތައް ކުރުމަށް މާދަމާ ހުޅުމާލެ ލިންކް ރޯޑުގެ އެއް ލޭނުން ބައެއް ސަރަހައްދުތައް ބަންދުވާނެ ކަމަށެވެ.

ލިންކް ރޯޑްގެ ބައެއް ސަރަހައްދުތައް ބަންދުވި ނަމަވެސް އާއްމު ދަތުރުފަތުރުތައް މެދުނުކެނޑި ކުރިއަށް ދާނެ ކަމަށް ވެސް މިނިސްޓްރީން ވަނީ ބުނެފައެވެ.

އެއް ލޭނުގެ ބައެއް ސަރަހައްދުތައް ބަންދުކުރާނީ ހެނދުނު 09:00 އިން ހަވީރު 05:00 އަށެވެ. އަދި މިނިސްޓްރީން ވަނީ އެވަގުތު ތަކުގައި ލިންކު ރޯޑުން ދަތުރުކުރާ ފަރާތްތަކުން އެކަމަށް ސަމާލުކަން ދިނުމަށް އެދިފައެވެ.

ރާއްޖޭގައި އެއްފަހަރާ އެންމެ ގިނަ އަދަދަކަށް އިރުގެ އަލިން ހަކަތަ އުފައްދާ ނިޒާމެއް ޤާއިމުކުރުމުގެ މި މަސައްކަތަކީ ވޯލްޑް ބޭންކާއި އެންވަޔަރަމަންޓު މިނިސްޓްރީ ގުޅިގެން ހިންގާ އެކްސްލެރޭޓިން ސަސްޓެއިނަބަލް ޕްރައިވެޓް އިންވެސްޓްމަންޓް އިން ރިނިއުވަލް އެނާޖީ (އެސްޕަޔާ) ޕްރޮޖެކްޓުގެ ދަށުން ހިންގާ މަޝްރޫއެކެވެ.

މި މަސައްކަތް އެންވަޔަރަމަންޓް މިނިސްޓްރީން ތައިލެންޑުގެ ކުންފުންޏެއް ކަމަށްވާ އެންސިސް ކޯ ލިމިޓެޑާ ހަވާލުކޮށްފައިވަނީ 2020 ވަނަ އަހަރުގެ ނޮވެމްބަރު މަހުގެ 24 ވަނަ ދުވަހުއެވެ.