ރިޔާސީ އިންތިޚާބުގެ ދެވަނަ ބުރަކަށް ދާން ޖެހިއްޖެނަމަ ރާއްޖެ ހަލަބޮލި ކަމަކަށް އަމާޒު ހިފައިފާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ތ.އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅު ކިނިބިދޫގައި ދެއްކެވި ވާހަކަ ފުޅުގައެވެ.
ރައީސް ވިދާޅުވީ ވަރަށް ގިނަ ރަށްރަށަށް ވަޑައިގަނެވިއްޖެ ކަމަށާއި ހުރިހާ ރަށަކުންވެސް ފެންނަނީ އެމަނިކުފާނުގެ ސަރުކާރުން ގެންނަމުންދާ އިސްލާޙީ ހެޔޮ ބަދަލުތަކާއި އެކު ކުރިއަށްދާން ބޭނުންވާ ކަމުގެ މަންޒަރުތައް ކަމަށެވެ.
"އަޅުގަނޑުމެން ތެރޭގަ އުޅެފާނެ, ޕާޓީތެރޭގަ އުޅެފާނެ ޚިޔާޅުތަފާތުވެގެން އުޅުއްވާ ބޭފުޅުން އުޅެދާނެ، އަޅުގަނޑު އެދުމަކީ ކިނބިދޫގެ ރައްޔިތުންވެސް، އެޚިޔާލާ ފިކުރު އެކަހެރިކޮށް ރައްޔިތުންނަށް ޓަކައި ކުރިއަށް އޮތް ރިޔާސީ އިންތިޚާބުގައި ނިކުމެ ވަޑައިގެން އަޅުގަނޑަށް ވޯޓުދެއްވުން" ރައީސް ވިދާޅުވިއެވެ.
ރައީސް ވިދާޅުވީ މި އިންތިޚާބުގައި އެންމެ ރަނގަޅު ގޮތަކަށް ވާނީ އެގޮތް ކަމަށެވެ.
"އެހެންނޫންނަމަ މި ދެވަނަބުރަކަށް ގޮސް އަނެއްކާވެސް ބޮޑު ހަލަބޮލިކަމަކަށް މިރާއްޖެ އަމާޒުހިފުމަކީ އެކަށީގެންވާކަމެއް، އެފުރުސަތު ނުދެއްވުން އެއީ ކޮންމެ ރައްޔިތަކު އެއާއި ދެތެރޭގައި ވިސްނާވަޑައިގަންނަވަންޖެހޭ ކަމެއް"
ރައީސް އިބްރާހިމް މުޙައްމަދު ޞާލިޙް
ކިނބިދޫގައި ވާހަކަ ދައްކަވަމުން ރައީސް ޞާލިޙް ވަނީ ދެން އަންނަ ދައުރެއްގައި ކިނބިދުއާއި ވޭމަންޑޫ ކޯޒްވޭ އަކުން ގުޅާލަ ދެއްވާނެ ކަމަށާއި، އެރަށުގެ ފުޓްސަލް ދަނޑު ނިންމަވައި ދެއްވާނެ ކަމަށް ވިދާޅުވެފައިވެއެވެ. މީގެ އިތުރުން އެރަށު ސްކޫލްގައި މަލްޓި ޕާޕަސް ހޯލެއް އަޅައި ސްކޫލަށް ކްލާސް ރޫމް އިތުރުކޮށްދެއްވާނެ ކަމަށް ވިދާޅުވިއެވެ. މީގެ އިތުރުން އެރަށުގައި ހުންނަ ކުޅިވަރު އެރީނާ އަޕްގްރޭޑްކޮށް އިތުރު ވަސީލަތްތަކާއި ޚިދްމަތް ލިބޭނެ ގޮތް ހަދައި، ރަށުގެ ބޮޑެތި މަގުތަކުގައި ތާރު އަޅައި ދެއްވާނެ ކަމަށް ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
