ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މިސަރުކާރުން ގދ. ތިނަދޫއާއި މެދު ވެފައިވާ އިހުމާލުތައް، ކުރީގެ އިސްލާމިކް މިނިސްޓަރު އަދި ޕީޕީއެމްގެ އެޑްވައިޒަރ ޑރ. ޝަހީމް ޢަލީ ސަޢީދު ހާމަކޮށްދެއްވައިފިއެވެ. 

ތިނަދޫގައި އިދިކޮޅުން ރޭ ބޭއްވި ޖަލްސާގައި ވާހަކަދައްކަވަމުން ޝަހީމް ވިދާޅުވީ ޝަހީމް ވިދާޅުވީ ތިނަދުއަކީ ކުރީގެ ރައީސް އަބްދުالله ޔާމީން އަބްދުލްގައްޔޫމް ވަރަށް އިސްކަމެއް ދެއްވައިގެން ތަރައްގީ ކުރެއްވި ރަށެއް ކަމަށެވެ. ނަމަވެސް އެމަނިކުފާނުގެ ޒަޢާމަތުގައި ތިނަދޫގައި ކުރިއަށް ގެންދިޔަ މަޝްރޫއުތައް މިހާރު ފެންނަނީ އެ ވީރާނާވާން ދޫކޮށްލާފައި ތަން ކަމަށްވެސް ވިދާޅުވި އެވެ.

އެގޮތުން ތިނަދޫގައި ގާއިމްކުރި އިސްލާމީ މަރުކަޒަކީ މުޅި ހުވަދު އަތޮޅުގައި ހުންނަ އިސްލާމިކް ޔުނިވާސިޓީގެ ގޮތްޕެއް ކަމުގައި ހެދުމަށް އޭރު ނިންމުނު ކަމަށާ، އެހެން ނަމަވެސް މިހާރު އެތަނަށް އެއްވެސް ވަރަކަށް އަޅާނުލާ ކަމަށް ޝަހީމް ވިދާޅުވި އެވެ. 

މިއާއެކު ޝަހީމް ވިދާޅުވީ އިސްލާމީ މަރުކަޒަކީ އެތައް މިލިއަން ރުފިޔާއެއް ހޭދަކޮށްގެން ހަދާފައިވާ ތަނެއް ކަމަށެވެ. އަދި އެފަދައިން އަޅާ ނުކާތަން ފެނުމުން ހިތަށް ވަރަށް އަސަރު ކުރައްވާ ކަމަށެވެ. 

"އަޅުގަނޑަށް ފެންނަނީ މި ރަށުގެ އިސްލާމީ މަރުކަޒު އަޅުގަނޑުމެންނަށް އެދި ގޮވަމުންދާ ތަން،" ޝަހީމް ވިދާޅުވި އެވެ.

ޝަހީމް އިތުރަށް ވިދާޅުވީ، ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުޢިއްޒު ރައީސުލްޖުމްހޫރިއްޔާ ކަމުގެ ހުވާ ކުރައްވާ ދުވަހު ތިނަދޫގެ އިސްލާމިކް ސެންޓަރު އެއީ އިސްލާމިކް ޔުނިވާސިޓީގެ ގޮތްޕެއްގެ ގޮތުގައި ކަނޑައެޅިގެންދާނެ ކަމަށެވެ.

މީގެ އިތުރުން، ރައީސް ޔާމީން ގެ ވެރިކަމުގައި އެންމެ 6 ދުވަސް ތެރޭގައި، ތިނަދޫގެ 53 ހެކްޓަރުގެ ބިން ހިއްކާފައިވާ ކަމަށާ، އެހެން ނަމަވެސް އެ ބިމުގެ ބޭނުންވެސް ނުކުރެވޭ ކަމަށް އޭނާ ވިދާޅުވި އެވެ. 

ޝަހީމް ވިދާޅުވީ ޔާމީންގެ ވެރިކަމުގައި ތިނަދޫގައި މިޔުޒިޔަމް އެއް ގާއިމް ކުރެއްވި ކަމަށާ، އެހެން ނަމަވެސް އެތަން ވެސް މިހާރު އޮތީ ވީރާނާވެފައި ކަމަށެވެ. އެ ސަރުކާރުގައި ތިނަދޫއަށް އެއް ބިލިއަން ރުފިޔާ ހަރަދުކުރި ކަމަށް ވިދާޅުވިއެވެ.

މިއާއެކު ޝަހީމް ވިދާޅުވީ، ތިނަދޫގައި އެ ހުރިހާ މަޝްރޫތަކެއް ހިނގަމުން ދިޔައިރު އޭރުގައި ހައުސިން މިނިސްޓަރަކަށް ހުންނެވީ މުއިއްޒު ކަމަށާއި އެހެންކަމުން މިއަދު މުއިއްޒުގެ އަތްޕުޅުގައި ތިނަދޫގެ ރައްޔިތުން ހިއްޕަވަން ޖެހޭ ކަމަށެވެ.  ވިދާޅުވިއެވެ. ޝަހީމް ވިދާޅުވީ މުއިއްޒު ވެރިކަން ކުރައްވާނީ ގާނޫނު އަސާސީގައި ބަޔާންކޮށްފައިވާ ގޮތުގެ މަތިން ކަމަށެވެ.