ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްގެ ސަރުކާރަށް ކަންކަން ނުކުރެވި ލަސްވަމުންދަނީ މި ސަރުކާރުގެ ވެރިންގެ ކިނބައިގައި ކަންކަން ކުރުމުގެ ތަސައްވުރެއް ނެތުމުންކަމަށް ކުރީގެ އިސްލާމިކް މިނިސްޓަރު ޑރ.މުޙައްމަދު ޝަހީމު އަލީ ސައީދު ވިދާޅުވެއްޖެއެވެ. 

ގދ ތިނަދޫގައި ރޭ ބޭއްވި އިދިކޮޅު ޕީޕީއެމް/ޕީއެންސީ ގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގ ރިޔާސީ ކެމްޕެއިން ޖަލްސާގައި ވާހަކަފުޅުދައްކަވަމުން ޝަހީމް ވިދާޅުވީ، ރައީސް ޔާމީނުގެ އަރިހުގައި ސައުދީ އަރަބިއްޔާއަށް ކުރެއްވި ދަތުރުފުޅެއްގައި  ރަސްގެފާނު ރައީސް ޔާމީނު އަރިހުން ބޭނުންފުޅުވަނީ ކޮންކަމެއްތޯ ސުވާލުކުރެއްވުމުން ދިވެހި ހައްޖުވެރިންނާއި އުމްރާވެރިން ވިސާ ހޯދުމަށް އެހެން ޤައުމަކަށް ދާންޖެހޭތީ އެކަމުގެ ދަތިކަން ފާހަގަކުރައްވައި އެކަމަށް ހައްލުކޮށްދެއްވުން ރައީސް ޔާމީނު އެދިވަޑައިގެންނެވި ކަމަށެވެ.

އެ ބައްދަލުވުމަށްފަހު ރައީސް ޔާމީނާއި އެމަނިކުފާނުގެ ވަޒީރުން ރާއްޖެ ވަޑައިގެންނެވިތާ ހަފުތާއެއްގެ ތެރޭގައި ޝާހީ ޤަރާރުތައް ރާއްޖެއަށް އަންނަން ފެށިކަމަށާއި، ރައީސް ޔާމީނު އެދިވަޑައިގެންނެވި ހުރިހާ ކަމެއް ހަމަޖެހިގެން ދިޔަކަމަށް އިޝާރާތް ކުރައްވައި ޝަހީމް ވިދާޅުވީ، ކަންކަން ކުރުމުގެ ތަސައްވުރު ގެންގުޅޭނަމަ އެކަންކަން ފަސޭހަކަމާއެކު ވާނެކަމަށެވެ. 

މީގެ އިތުރުން ޑރ.ޝަހީމު ވިދާޅުވީ ދަރުމަވަންތަ ހޮސްޕިޓަލު ފަދަ ބޮޑު ތަސައްވުރަކާ އެއްގޮތަށް އެ ހޮސްޕިޓަލަށް ކަންކަން ނުހިނގުމުގެ ސަބަބުން އެބިޔަ ބޮޑު ހޮސްޕިޓަލުގެ އުފާވެރިކަން ރައްޔިތުންނަށް ލިބިފައި ނުވާކަމަށެވެ. 

މިއާއެކު ޝަހީމް ވިދާޅުވީ މަދުރަސާއެއްގެ މިޝަނާއި ވިޝަން އެނގޭނީ އެ މަދުރަސާއެއްގައި ކިޔެވި ދަރިވަރުންނަށް ކަމުގައްޔާއި ރައީސް ޔާމީނުގެ ސިޔާސީ މަދުރަސާގައި ކިޔަވައިވިދާޅުވި ބޭފުޅެއްގެ ހައިސިއްޔަތުން ރައީސް ޔާމީނުގެ ތަސައްވުރު އެންމެ ބޮޑަށް އެނގިވަޑައިގަންނަވާނީ އެ ބޭފުޅާއަށް ކަމަށެވެ.

މިކަންކަން ފާހަގަކުރައްވައި ޑރ.ޝަހީމު ވިދާޅުވީ ރައީސް ޔާމީނުގެ ސިޔާސީ މަދުރަސާއިން ދަސްވެނިވި އެންމެ އިލްމުވެރި ޤާބިލު އެއް ބޭފުޅަކީ ޑރ.މުޢިއްޒު ކަމަށެވެ.