ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުޢިއްޒުގެ ވެރިކަމެއްގައި، ޖުޑިޝަރީ ދާއިރާއަކީ ވެސް ވަކި ކެޓަގަރީއެއްގެ ގޮތުގައި ހަމަޖައްސައި އެދާއިރާގައި މަސައްކަތް ކުރާ މުވައްޒަފުންނަށްވެސް ބޯހިޔާވަހިކަން ޔަގީން ކޮށްދެއްވާނެ ކަމަށް ވިދާޅުވެއްޖެއެވެ.

މުޢިއްޒު މިފަދައިން ވިދާޅުވީ ރޭ ގދ. ތިނަދޫގައި ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. 

އެގޮތުން ޑރ. މުއިއްޒު ވިދާޅުވީ ޖުޑިޝަރީ ދާއިރާގައި މަސައްކަތްކުރާ އެންމެ އާދައިގެ މީހުން ފެށިގެން ފަނޑިޔާރުންނަކީ އެހެން މީހުންކައިރިން ސަލާންޖަހަން ޖެހޭ ބަޔަކަށް ވެގެން ނުވާނެ ކަމަށެވެ. އެމީހުންނަކީ ކޮންމެ މަހަކު ގޭ ކުލި ދައްކަން، ނުވަތަ އެޕާޓްމަންޓް ކުލިދައްކަން ޖެހުމުން ކޮންމެވެސް މީހެއްގެ އަތުން ލާރި ހޯދަންޖެހޭ ބަޔަކަށް ވެގެން ނުވާނެ ކަމަށް ޑރ. މުއިއްޒު ވިދާޅުވިއެވެ.

މިއާއެކު ޑރ. މުއިއްޒު ވިދާޅުވީ އަމިއްލަ ތަނެއް ލިބުމުން އެހެންމީހުންކައިރިން ސަލާން ޖަހަން ޖެހޭ ޖެހުން ނިމުމަކަށް އަންނާނެ ކަމަށެވެ.

މީގެ އިތުރުން ޑރ. މުއިއްޒު ވިދާޅުވީ، އެމަނިކުފާނުގެ ވެރިކަމެއްގައި ޖުޑީޝަރީ ސަރުކާރުގެ ނުފޫޒުން މިނިވަންކުރައްވާނެ ކަމަށެވެ. އަދި ތެރެއިން ޖޭއެސްސީއިން ކުރަން ނުޖެހޭކަންކަން ނަގާ އެޑްމިނިސްޓްރޭޓިވް މަސައްކަތް ކުރަން، ކުރިއެކޭވެސް އެއްގޮތަށް އެކަމަށް ހާއްސަ ޑިޕާޓްމަންޓަށް ބަދަލުކުރައްވާނެ ކަމަށް އޭނާ ވިދާޅުވި އެވެ.