ޕީޕީއެމް ޕީއެންސީގެ ސަރުކާރެއްގައި މިހާރުގެ ސަރުކާރުން ފަށާފައިވާ މަޝްރޫއުތައް ހުއްޓާލާނެ ކަމަށް ބުނެ އެމްޑީޕީން ވާހަކަދައްކަނީ ފިނޑިކަމުން ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިންގައި ޑރ މުހައްމަދު މުއިއްޒުއާއި ކެމްޕެއިން ޓީމުން އަތޮޅުތެރޭގެ ރަށްތަކަށް ކުރަމުންދާ ދަތުރުގައި މިއަދު ހެނދުނު ރ އަތޮޅު އަލިފުށްޓަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒު ވިދާޅުވީ، ވެރިކަމަށް ކުރިމަތިލެއްވީ އިހްލާސްތެރިކަމާއެކު ރައްޔިތުންނަށް މަސައްކަތް ކޮށްދެއްވުމަށް ކަމަށާއި އެއްވެސް ރަށެއްގައި ކުރިއަށް ގެންދާ މަޝްރޫއެއް އެމަނިކުފާނުގެ ސަރުކާރުގައި ހުއްޓައި ނުލައްވާނެކަމުގައެވެ.

މީގެ އިތުރުން އެއްވެސް ޒުވާނެއްގެ ވާޒީފާވެސް ޕީޕީއެމްގެ ސަރުކާރެއްގައި ނުގެއްލޭނެ ކަމުގެ ޔަގީންކަން ދެއްވަމުން ޑރ މުހައްމަދު މުއިއްޒު ވިދާޅުވީ، ޕީޕީއެމް/ ޕީއެންސީއަށް ވެރިކަން ލިބިއްޖެނަމަ މިހާރު ސަރުކާރުން ރަށްރަށުގައި ފަށާފައިވާ ތަރައްގީގެ މަޝްރޫއުތައް ހުއްޓި، މީހުން ވަޒީފާއިން ވަކިކުރާނެ ކަމަށް ވާހަކަދައްކަނީ އެ ވާހަކަތައް ދައްކަވާ ފަރާތްތަކުގެ ފިނޑިކަމުން ކަމުގައި ޑރ މުހައްމަދު މުއިއްޒު ވަނީ ވިދާޅުވެފައެވެ. 

Advertisement

ޑރ. މުއިއްޒު މިއަދު އަލިފުއްޓަށް ވަޑައިގެންނެވިއިރު ބޯވާރޭގައި ގިނަ އަދަދެއްގެ ސަޕޯޓަރުންވަނީ ނިކުމެ މަރުހަބާ ކިޔައިފައެވެ.