2018 ވަނަ އަހަރު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ގެންނަން ގުޅިފައިވާ ކޯލިޝަނުން ނިންމީ އެ ނޫން އެހެން ގޮތެއް އޭރު ނެތުމުން ކަމަށާ، އެއީ އެމަނިކުފާނަކީ އެކަމަށް އެންމެ ގާބިލު މީހާއަށް ވީމާ ނިންމި ނިންމުމެއް ނޫން ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.

ރިޔާސީ ކެންޕެއިނަށް ބ ތުޅާދޫ އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ގާސިމް ވިދާޅުވީ، އަދުގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެރިކަން ހޯދާދިނުމަށް މަސައްކަތް ކުރެއްވީ، އެމަނިކުފާނު އެ މަސައްކަތް އަމާނާތްތެރިކަމާއެކު ކުރައްވާނެ ކަމަށުގެ އުއްމީދުގައި ކަމަށެވެ.

އަދި އެމަނިކުފާނު ވެރިކަމަށް ގެނައީ އެނޫން އެހެން ގޮތެއް ނެތުމުން ކަމާއި، އެއީ އެންމެ ގާބިލު ބޭފުޅާ ކަމަށް ވުމުން ނޫން ކަމަށްވެސް ގާސިމް ވިދާޅުވި އެވެ. 

އެހެންނަމަވެސް، އެމަނިކުފާނަށް ވެރިކަން ހަވާލު ކުރުމުން މި ގައުމު އިންޑިއާގެ އަޅުވެތި ކަމަށް ދާ ކަމަށާ، ވެރިކަމަށް ކުރިމަތި ލެއްވީ، އެތަން ބަލަން ނުހުރެވިގެން އެތައް ބައެއްގެ އާދޭސް ތަކާއި ހުރެ ކަމަށް ގާސިމް ވިދާޅުވި އެވެ.

ގާސިމް އިބްރާހިމް ވިދާޅުވީ ގައުމުގެ މިހާރުގެ ހާލަތާއި މިސަރުކާރުގެ އަމަލުތަކުގެ ސަބަބުން ލިބުނު ނިކަމެތިކަމުގެ ވާހަކަ ރައްޔިތުންނަށް އެނގިތިބެ ސެޕްޓެމްބަރ 9 ވަނަ ދުވަހު ނަގާ ވޯޓުގައި އެހެންގޮތަކަށް ނިންމާފިނަމަ އެކަމުގެ ސަބަބުން ގައުމަށް ލިބޭނެ ނިކަމެތިކަން ވަޒަންނުކުރެވޭނެ ކަމަށެވެ. އަދި ރައީސް ޞާލިހު ދެވަނަ ދައުރަކަށް އިންތިހާބު ކުރުމަކީ އަޅުވެތި ކަމަށް އެނބުރި ދިޔުން ކަމަށްވެސް އެމަނިކުފާނު ވިދާޅުވި އެވެ.