ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް، ގާސިމް އިބްރާހިމް ގެ ވެރިކަމެއްގައި ޅ. ނައިފަރުގައި ޓާޝިއަރީ ހޮސްޕިޓަލެއް އަޅައި، ބޭސްވެރިކަމުގެ ރަންޒަމާން އެ ރަށަށް އަލުން އަނބުރައި ގެނެސްދެއްވާނެ ކަމަށް ވިދާޅުވެއްޖެއެވެ. 

މިއަދު ޅ.ނައިފަރުގައި ބޭއްވި ކެންޕެއިން ޖަލްސާގައި ވާހަކަ ދައްކަވަމުން ގާސިމް ވިދާޅުވީ, އެމަނިކުފާނުގެ ވެރިކަމެއްގައި ރާއްޖޭގެ މީހުން ދިރިއުޅޭ ކޮންމެ ރަށަކަށްވެސް އެ ރަށު ރައްޔިތުން ބޭނުން ފަސް ކަމެއް ކޮށްދެއްވާނެ ކަމަށާ، އަދި އެއާއި އެކު ކްލާސް ރޫމް ތަކާއި މިސްކިތްތައް އޭސީ ކުރުން ފަދަ ކަންކަން ކޮށްދެއްވާނެ ކަމަށެވެ.

އެ ކަންކަމުގެ އިތުރުން ނައިފަރަށް ކޮށްދެއްވާނެ ކަންކަން ހާމަ ކުރައްވަމުން ގާސިމް ވިދާޅުވީ އެ ރަށަކީ ވެސް އާބާދީގެ ގޮތުން ބޮޑު ރަށެއް ކަމަށެވެ. އަދި އެއީ ތައުލީމީ، އަދި ޒަމާނުއްސުރެން ވެސް ބޭސްވެރިކަމުގެ ރޮނގުން ފާހަގަކޮށްލެވޭ ރަށެއް ކަމަށް ގާސިމް ވިދާޅުވި އެވެ. 

Advertisement

މިއާއެކު ގާސިމް ވަނީ އެމަނިކުފާނުގެ ވެރިކަމެއްގައި ނައިފަރަށް ކޮށްދެއްވާނެ ގިނަ ކަންކަމުގެ ތަފްސީލް ދެއްވާފައެވެ.

1) މަގުތައް ހެދުން

2) ރައްޔިތުން ބޭނުންވާ ވަރުގެ ބޮޑު ބަނދަރެއް

3) އާޓިފިޝަލް ބީޗެއް

4) އިތުރަށް ހިއްކާނެ ބިމެއް ފަޅުގައި ނެތް މިންވަރަށް ބިން ހިއްކައި ދިނުން. 

5) ފުލެޓު އެޅުން

6) ޓާޝިއަރީ ހޮސްޕިޓަލެއް އެޅުން 

ގާސިމް ވިދާޅުވީ އެމަނިކުފާނުގެ ވެރިކަމެއްގައި އެ ހުރިހާ ކަމެއްވެސް ކުރިއަށް ގެންދަވާނީ މަސައްކަތް ފައްޓަވާގޮތައް ވަރަށް ބާރަށް ކުރިއަށް ކަމަށާ، އެއްވެސް ބަޔަކަށް އުނދަގޫ ވާގޮތަށް ކަންކަން ނުކުރައްވާނެ ކަމަށެވެ. 

މީގެ އިތުރުން، ފެލިވަރު ތަރައްގީކޮށް، އެތަނުން ހުރިހާ ވަސީލަތްތަކެއް ލިބޭނެ ގޮތް ހަދައި ދެއްވާނެ ކަމަށާ، އަދި ވަޒީފާގެ ފުރުސަތުތައް ވެސް ހޯދައި ދެއްވާނެ ކަަމަށް ގާސިމް ވިދާޅުވިއެވެ.