ޖުމްހޫރީ ޕާޓީގެ ވެރިކަމެއްގައި ކައިވެނި ނުކޮށް ތިބޭ ޒުވާނުން މެރީ ކުރަން ޑޭޓު ކަނޑައަޅުއްވަން ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ގެ އިންތިޚާބީ އޭޖެންޓް ޢަލީ ވަހީދު އެދިވަޑައިގެންފިއެވެ.
ހުޅުމާލޭ ފޭސް 2 ގައި ޖުމްހޫރީ ޕާޓީގެ އައު ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަ ދައްކަވަމުން ޢަލީ ވަހީދު ވިދާޅުވީ، މިވަގުތު ސިޔާސީ މައިދާނުގައި ތިބި ޚިޔާލު ތަފާތު އެންމެހާ ބޭފުޅުންގެ ތެރެއިން އެންމެން އެއްމޭޒެއް ދޮށަށް ގެނެސްގެން، އަދި ހުރިހާ ގައުމަކާއިވެސް ވާހަކަދެއްކޭނެ ބޭފުޅަކަށް ހުރީ ގާސިމް އެކަނި ކަމަށެވެ. ޗައިނާ އާއި އިންޑިއާ އާއި އަދި ސައުދީ އަރަބިއްޔާއާވެސް އެމަނިކުފާނު ބާއްވާނީ ގާތްގުޅުމެއްކަމުގައި އަލީ ވަހީދު ވިދާޅުވިއެވެ.
ދުނިޔެ ގަބޫލުކުރާ ސްޓޭޓްްމޭން އެއް ނެތޭ ގާސިމް ނޫނީ. ގާސިމް އަށް އެކަން ކުރެވޭނެ. ގާސިމް އަށް އެނގޭނެ ލޯނު ރީ ސްޓްރަކްޗަރ ކުރަން. ގާސިމަކީ ހުރި ގޮތަށް ހުރި ގެރެންޓީޑް ޕްރޮޑަކްޓް އެކޭ. ޝާއިރު ވިދާޅުވެފައި އޮވޭ، ވިތާހިރު އެ ރަންމުތަކީ، އިތާގެ ބަނޑުން ވިހޭ ދަރިޔޭ. އަޅުގަނޑުމެން މާމިގިލިން ނަގައިގެން މިއުޅެނީ އިތާ މުތެއް ފަދަ ކެންޑިޑޭޓެކޭ އިނގޭތޯ. މިއީ ތޯތޯ އެއް ނޫނޭ އިނގޭތޯ.
ޢަލީ ވަހީދު
އަލީ ވަހީދު ވަނީ ޖުމްހޫރީ ޕާޓީގެ ވެރިކަމެއްގައި ޖުމްހޫރީ ޕާޓީގެ ވެރިކަމެއްގައި އަލަށް ކައިވެނިކުރާ ޒުވާނުންނަށް ފުލެޓު ލިބޭނެ ކަމަށެވެ.
"އެބަހުރިތޯ މީހަކާ ނީނދެ ހުރި ކުއްޖެއް. ދެން ހުސް ފިރިހެން ކުދިން ގިނައީ. އަލަތު ކައިވެންޏެއް ފަށާ. އަލަތު ކައިވެންޏެކަށް ދިރިއުޅުން ފަށާ ޒުވާނުން، ނުވަތަ ކުރީން ބޯހިޔާވަހިކަން ނެތް ޒުވާނުން. އަޅުގަނޑުމެންގެ މި މޭން ނަގައިފިއްޔާ 18,000 ފުލެޓު އަންނާނެ ތިބޭފުޅުންނަށް. އެހެންވީމާ ވޯޓު ލާންވީ. މެރީ ކުރަން ޑޭޓު ކަނޑައަޅަންވީ."
ޢަލީ ވަހީދު
މީގެ އިތުރުން، ޒުވާނުންނަށް ޚާއްސަކޮށްގެން، ހުރިހާ ކުޅިވަރެއް ކުޅެވޭނެ ބޮޑު އޮލީމްޕިކް ސްޓޭޑިއަމް އެއް ފަސް އަހަރުގެ ތެރޭގައި ނިންމަވާ ދެއްވާނެ ކަމަށް އަލީ ވަހީދު ވިދާޅުވިއެވެ. ގާސިމްގެ މެނިފެސްޓޯއަށް އަލިއަޅުއްވާލައްވަމުން ވިދާޅުވީ ގައުމީ ހުރިހާ ކުޅިވަރެއް ކުޅެން 10 ފަންގިފިލާގެ އިމާރާތެއް ވެސް އެޅިގެންދާނެ ކަމަށެވެ.
ހަމައެހެންމެ، ހުރިހާ މަދަނީ ޖަމިއްޔާތަކަކަށް، ހުޅުމާލޭގައި އިމާރާތެއް އަޅައި، އެ ޖަމިއްޔާތަކަށް އެތަނުން ޖާގަ ދެއްވާނެ ކަމަށްވެސް އަލީ ވިދާޅުވިއެވެ.
މީގެ އިތުރުން، ގާނޫނު ބަދަލުކޮށްގެން ހުރިހާ ފުޓްބޯޅަ ކުލަބު ތަކަކަށް ފައިސާ ލިބޭނެ ގޮތް ޔަގީން ކުރައްވާނެ ކަމަށްވެސް އޭނާ ވިދާޅުވި އެވެ. އަދި މާލެ އާއި ރާއްޖޭގެ އެހެން ރަށްރަށުގައިވެސް ކުޅިވަރު ކުރި އަރުވަން، ރާއްޖޭގައި އަދި ރާއްޖެއިން ބޭރުގައި ވެސް ޑިވެލޮޕްމަންޓް ޕްރޮގްރާމްތައް ހިންގަވާނެ ކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
