އެބޭފުޅާ އަކީ 'ދެފުށްކެހެރި' މީހެއް ނޫން ކަމަށާ، ކުރިއަށް އޮތް ފަސް އަހަރު ނިމެންދެން ހުންނަވާނީ، އެމްޑީޕީީ ގެ ރިޔާސީ ކެންޑިޑޭޓް، އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި އެކު ކަމަށް އެމްޑީއޭގެ ލީޑަރ އަދި މީދޫ ދާއިރާގެ މެންބަރު އަހުމަދު ސިޔާމް (ސަން ސިޔާމް) ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެރިކަމުގެ ދެވަނަ ދައުރެއް ހޯއްދަވާދެއްވުމަށް އެމަނިކުފާނާއި އެކު ކޯލިޝަން ހައްދަވައިގެން ހުންނެވި ނަމަވެސް ސިޔާމަކީ ގާތް ރަހުމަތްތެރިއެއް ކަމަށާއި، ރިޔާސީ އިންތިޚާބުގައި ސިޔާމު ވޯޓުދެއްވާނީ ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމަށްކަމަށް އެމަނިކުފާނު ވަނީ ވިދާޅުވެފަ އެވެ.
"އެބޭފުޅުން އެތާ ތިއްބެވީ، ނަމުގައި އިބްރާހިމް މުހައްމަދު ޞާލިހުގެ ކައިރީގައި މަލަމަތި ދައްކައިގެން. އަޅުގަނޑު ކައިރީގައި ވިދާޅުވެފައި އޮތީ ތިމަންނާމެން މިތާ ތިއްބަސް ނުބަލާށޭ، ވޯޓު ލާނީ ޤާސިމަށޭ" ނ އަތޮޅަށް ގާސިމް ކުރެއްވި ރިޔާސީ ކެމްޕޭނު ދަތުރުފުޅުގައި މިލަދޫއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ވިދާޅުވި އެވެ.
ގާސިމްގެ އެ ވާހަކައަށް ރައްދު ދެއްވަމުން، ރޭ މަކުނުދޫ ގައި ބޭއްވި އެމްޑީޕީގެ ކެންޕެއިން ޖަލްސާގައި ވާހަކަ ދައްކަވަމުން ސިޔާމް ވިދާޅުވީ ގާސިމަކީ ވަރަށް ގާތް ރަހުމަތްތެރިއެއް ނަމަވެސް އެފަދައިން ވިދާޅުވެ އެ ހެއްދެވީ އިތުރުފުޅެއް ކަމަށެވެ.
ރޭގެ ޖަލްސާގައި ސިޔާމް ވާހަކަ ދައްކަވަނީ-- ފޮޓޯ/ އެމްޑީޕީ
އަޅުގަނޑު ދަންނަވާލާނަން އަޅުގަނޑު ގެ އަޚް ގާސިމް އިބްރާހިމް އަށް. ގާސިމް އޭ ތިޔަ ވަރަށް ދޮގު ނުހައްދަވާށޭ. އަޅުގަނޑު މިއީ ދެފުށްކެހެރި މީހެއް ނޫން. އަޅުގަނޑު މިހުރީ ސީދާ އިބްރާޙީމް މުހައްމަދު ޞާލިހު ގެ އަރިހުގައި. އަޅުގަނޑެއް ގައިމުވެސް، އިބްރާޙީމް މުހައްމަދު ޞާލިހު ދޫކޮށްލާފަކާ، އަޅުގަނޑެއް މި ފަސް އަހަރަކު އިރާދަކުރެއްވިޔަކާ ނުދާނަން.
އެމްޑީއޭގެ ލީޑަރު އަހުމަދު ސިޔާމް
މިއާއެކު ސިޔާމް ވަނީ، ކުރިއަށް އޮތް ރިޔާސީ އިންތިހާބުގައި ރައީސް ޞާލިހު އާއި އެކު ކޯލިޝަން ހަދައި އެމަނިކުފާނަށް ވެރިކަން ހޯދަވައި ދެއްވުމަށް އެކުގައި މަސައްކަތް ކުރެއްވުމަށް ގާސިމްގެ އަރިހުން ވެސް އެދިވަޑައިގެންފައެވެ.
އަޅުގަނޑު ގާސިމް އަށް އިލްތިމާސްކުރަން. ރަހުމަތްތެރިޔާއޭ. އަޅުގަނޑު މެންނާ ގުޅެން އަންނާށޭ. ގުޅުނީމައޭ ތިބޭފުޅާއަށް ވެސް ރަނގަޅު ވާނީ. ތި ކުރައްވަނީ ހަމަ ބޭކާރު މަސައްކަތް ތަކެކޭ. ބޭކާރު ލާރިއޭ ތި ޚަރަދު ކުރައްވަނީ. ބޭކާރު އެނާޖީއޭ ތި ވޭސްޓު ކުރައްވަނީ. އެހެން ނުހައްދަވާ އަޅުގަނޑުމެންނާ އެކު އަންނަވާށޭ. ދިވެހިރާއްޖެ ތަރައްޤީ ކުރެވޭނީ އަޅުގަނޑުމެންނާ އެކު ދެންވެސް އައިސްގެންނޭ. އަވަހަށް ވަޑައިގަންނަވާށޭ. އަޅުގަނޑުމެން މި ތިބީ މަރުހަބާ ކިޔަން ގާސިމް އަށް. ވަޑައިގަންނަވާށޭ. ވަޑައިގަންނަވާށޭ.
އެމްޑީއޭގެ ލީޑަރު އަހުމަދު ސިޔާމް
ސިޔާމް މިފަދައިން ވިދާޅުވެފައި ވާއިރު، މ. މުލަކުގައި ބޭއްވި ރައީސް ޞާލިހުގެ ކެމްޕޭނު ޖަލްސާގައި ވާހަކަދައްކަވަމުން އެމްޑީއޭގެ ނައިބް ރައީސް މައުރޫފު ވަނީ ކުރީގެ ރައީސް އަބްދުالله ޔާމީން އަބްދުލްގައްޔޫމުގެ ވެރިކަން ބަދަލުކުރުމަށް އެމްޑީއޭއިން އަދާކުރި ސިއްރު ރޯލުގެ ވާހަކަތައް ހާމަކުރައްވާފަ އެވެ.
އެގޮތުން މައުރޫފު ވިދާޅުވީ އެމްޑީއޭގެ މުއައްސިސުން 2018 ވަނަ އަހަރު ރިޔާސީ އިންތިޚާބުގެ ދުވަސްވަރު ސިންގަޕޫރުގައި ރައީސް ޞާލިހާއެކު ސިއްރު ބައްދަލުވުމެއް ބާއްވާފައިވާނެ ކަމަށެވެ. އަދި އެ ބައްދަލުވުމުގައި މައުރޫފުގެ އިތުރުން އެމްޑީއޭގެ ރައީސް އަހުމަދު ސިޔާމު ވެސް ބައިވެރިވެވަޑައިގެންނެވި ކަމަށް ވިދާޅުވި އެވެ.
އެ ބައްދަލުވުމަށްފަހު ރިޔާސީ އިންތިޚާބުގައި ސިޔާމު ހުންނެވީ ހަޤީގަތުގައި ރައީސް ޞާލިހުގެ ފަހަތްޕުޅުގައިކަމަށް މައުރޫފު ވަނީ ވިދާޅުވެފަ އެވެ. އަދި އެ އިންތިޚާބު ކާމިޔާބުކުރުމަށް ކޮށްދެވެން އޮތް ހުރިހާ ކަމެއް އެމްޑީއޭއިން ކޮށްފައިވާނެކަމަށް މައުރޫފު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
