ރިޔާސީ އިންތިހާބުގެ ކެމްޕެއިންގައި ޖުމްހޫރީ ޕާޓީގެ ރިޔާސީ ކެންޑިޑޭޓް، ޤާސިމް އިބްރާހިމް އެކި އެކި ރަށްރަށަށް ވަޑައިގެން ދައްކަވައިފައިވާ ވާހަކަތަކުގެ އޯޑިއޯތައްް ބޭނުންކޮށްގެން ހަދައިފައިވާ ޓިކްޓޮކް ވީޑިއޯތައް ބައްލަވައި ޚުދު އެމަނިކުފާނަށްވެސް ހިނިފުޅުވެޑުވިއްޖެއެވެ. 

މީސް މީޑިޔާގައީ މިހާރު އާންމުވަމުންދާ ވީޑިއޯއަކުން ފެންނަ ގޮތުގައި ގާސިމް އިބްރާހިމް ބައްދަލުވުމެއްގެ ތެރެއިން ކޮފީއެއް ބައްލަވަން އިންނެވި އިރު ގާސިމްގެ ފޯނުން ބައްލަވަމުން ގެންދިޔައީ އެމަނިކުފާނަށް ޖޯކު ޖަހައި ހަދައިފައިވާ ޓިކްޓޮކެވެ.

ޓިކްޓޮކް ބައްދަލަވަމުން ގެންދިޔަ ވަގުތު ގާސިމް އިނީ ހިނިފުޅުވަޑުވާންށެވެ. ގިނަ ދިވެހިންގެ މެދުގައި ވައިގައި ހިފާފައިވާ މި ޓިކްޓޮކްތައް ގާސިމަށް ވެސް ވަރަށް މަޖާވެއްޖެއެވެ.

ޓުވިޓާގައި މި ވީޑިއޯ އާންމުކުރަމުން ގާސިމް އިބްރާހިމްގެ އިންތިހާބީ މަންދޫބު އަލީ ވަހީދު ބުނެފައިވަނީ "ހަމްބަލް އެންޑް ސިމްޕަލް" މިހެންނެވެ. މާނައަކީ ހިތްތިރި އަދި އާދައިގެކަމެވެ.

ރިޔާސީ އިންތިޚާބަށް ކެމްޕްއިން ކުރުމަށް ރަށްރަށަށް ވަޑައިގެން އުޅުއްވާއިރު، ވަޑައިގެންނެވުނު ރަށް ހަނދާން ނެތުމާއި ބައެއް ކަންކަމަށް ކިޔާ ނަންތައް ހަނދާން ނެތުން ފަދަ ކަންކަން ގާސިމަށް ކުރިމަތިވެފައި އެބަހުއްޓެވެ. މި ފަދަ ވީޑިއޯތައް ސޯޝަލް މީޑިއާގައި ދައުރުވީއިރު އެ އަޑުތައް ބޭނުންކޮށްގެން ޓިކްޓޮކް ހެދީ ނައުފަލް ނަސީމް ނަމަކަށް ކިޔާ މީހެކެވެ.

އޭނާގެ ޓިކްޓޮކްތަކަށް ވަރަށް ގިނަ ބައެއްގެ ސަމާލުކަން ލިބުނެވެ. ބައެއް ޓިކްޓޮކްތަކަށް ހިންދީ އަދި ދިވެހި އަޑުތައް އަމިއްލައަށް ލައިގެން އެޑިޓްކޮށްފައި ވާއިރު މި ޓިކްޓޮކްތަކުގައި ނައުފަލްގެ އެކްޓު ކުރުން ވެސް މޮޅީއެވެ.

އެގޮތުން އަޑާ ގުޅޭ ގޮތަށް ނައުފަލް އޭނާގެ މޫނުމަތީގެ ކުލަވަރު ބަދަލުކުރެއެވެ.