ކަރެކްޝަންސް ގެ އޮފިސަރުން ރަސްމީކޮށް ބޮޑީ ވޯން ކެމެރާ ބޭނުން ކުރަން ފަށައިފިއެވެ. 

ކަރެކްޝަންސް އިން މިއަދު ބުނީ ބޮޑީވޯން ކެމެރާ ބޭނުން ކުރަން ފެށުމުން އޮފިސަރުން މިހާރަށް ވުރެ ޒިންމާދާރުވެ، ޖަވާބުދާރީވުން އިތުރު ވާނެ ކަމަށެވެ. 

އަދި ރަސްމީކޮށް މިކަން ފަށާއިރު، މިހާރު ބޭނުން ކުރަމުންދާނީ 51 ކެމެރާ ކަމަށްވެސް އިދާރާއިން މައުލޫމާތު ދެއެވެ. އަދި، ކުރިއަށް އޮތް ތަނުގައި ރަސްމީ މަސައްކަތު ވަގުތުގައި ގައިދީންނާ މުއާމަލާތް ކުރާ ހުރިހާ ވަގުތަކު މި ކެމެރާ ބޭނުން ކުރަންޖެހޭނެ ކަމަށެވެ. 

Advertisement

ބޮޑީވޯން ކެމެރާ އިން އެއްކުރެވޭ މައުލޫމާތުން އަދި ޖަލުތަކުގައި ހިންގާ އެކި އޮޕަރޭޝަންތަކާއި ހައިސެކިޔުރިޓީ ދޭން ޖެހޭ ގައިދީން އެއްތަނުން އަނެއްތަނަށް އުފުލާއިރު ލައިވް ސްޓްރީމް ކުރުމުގެ ގާބިލްކަން ލިބިގެންދާނެ ކަމަށް ކަރެކްޝަންސް އިން ބުނެ އެވެ.

އަދި ކެމެރާ އިން އެއްކުރެވޭ މައުލޫމާތަކީ އެއަށް އުނި އިތުރު ނުގެނެވޭނެހެން ރައްކާތެރި ކުރެވި ބަލަހައްޓާނެ މައުލޫމާތު ކަމަށް ކަރެކްޝަންސް އިން ބުނެ އެވެ.

ކަރެކްޝަންސް އިން މިއަދު ބުނީ، ބޮޑީވޯން ކެމެރާއާ އެކު، އެ ސާވިސްގެ އޮފިސަރުންގެ ރައްކާތެރިކަމާއި ގައިދީން ބެލެހެއްޓުމުގައި ދިމާވާ މައްސަލަތަކަށް ހައްލު ގެނައުމަށް އެހީއަކަށް ވާނެ ކަމަށެވެ. ހަމަ އެއާ އެކު، ޖަލުތެރޭގެ ހާލަތު ދެނެގަނެ، ދިމާވެދާނެ ހާދިސާއެއް ތަހުގީގު ކުރަން ޖެހޭ ހާލަތުގައި، އެތެރޭންނާއި ބޭރުން އެ ކަމެއް ތަހުގީގުކުރާ ފަރާތްތަކަށް ވީޑީއޯ އަދި އޯޑިއޯ ރެކޯޑިން އޮތުމުން އެ މައްސަލަ ބަލަން ފަސޭހަވެގެންދާނެ ކަމަށް އެ ތަނުން ބުންޏެވެ.

މިއީ ޖަލުގައި ބަންދުކޮށްފައި ތިބޭ ފަރާތްތަކާއި ޕްރިޒަން އޮފިސަރުންގެ ރައްކާތެރިކަން ކަށަވަރުކޮށްދިނުމަށް މުހިންމު ދައުރެއް އަދާކުރާނެ ފިޔަވަޅެއް ކަމަށް ކަރެކްޝަންސް އިން ބުންޏެވެ.