އަންނަ ހޮނިހިރު ދުވަހު ބާއްވާ ރިޔާސީ އިންތިޚާބު ކާމިޔާބު ވެ، ވެރިކަމަށް އިންތިޚާބު ވެ ވަޑައިގެންފި ނަމަ، މާލެއާއި އަތޮޅުތެރެ ތަފާތެއް ނުކުރައްވާނެ ކަމަށާއި ހުރިހާ ތަނަކަށްވެސް ގެންގުޅޭނީ ގެންގުޅޭނީ އެއްއަގެއް، އެއްއުސޫލެއް އަދި އެއްހަމައެއް ކަމަށް ޖުމްހޫރީޕާޓީގެ ލީޑަރ އަދި ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.
ރޭ ތިނަދޫގައި ބޭއްވި ކެންޕެއިން ޖަލާސާގައި ވާހަކަ ދައްކަވަމުން ގާސިމް ވިދާޅުވީ އެމަނިކުފާނުގެ ވެރިކަމެއްގައި ރާއްޖެތެރެއާއި މާލޭގެ ތަފާތު ނައްތާލާނެ ކަމަށެވެ. ރާއްޖޭގެ ހުރިހާ ތަނެއްގައި ވެސް އެއްހަމައަކާއި އެއްއުސޫލެއް ގާއިމްކޮށްދެއްވާ އަގުތަކުގެ ތަފާތު ނައްތާލާނެ ކަމަށްވެސް ވިދާޅުވި އެވެ.
ރާއްޖެތެރޭ އާއި މާލެއާ، ކަރަންޓާއި ފެނުގެ ކަންކަން ވެސް މިހުރި ތަފާތުކަން އަޅުގަނޑު ގެ ވެރިކަމެއްގައި މާތް الله އިރާދަކުރެއްވިޔާ ރާއްޖޭގެ ހުރިހާ ތަނެއްގައި އޮންނާނީ އެއް އަގެއް. މާލެ އެކޭ ރާއްޖެތެރެ އެކޭ ތަފާތެއް ނުކުރާނަން.
ގާސިމް އިބްރާހިމް
މިއާއެކު ގާސިމް ވިދާޅުވީ މިހާތަނަށް، ފެނާއި ކަރަންޓް ބިލު ފަދަ އަސާސީ ޚިދުމަތްތަކަށް ފައިސާ ނުދެއްކިގެން ޖޫރިމަނާ ކޮށްފައިވާ މީހުންގެ ޖޫރިމަނާތައްވެސް އެމަނިކުފާނުގެ ވެރިކަމެއްގައި މައާފްކޮށްދެއްވާނެކަމަށެވެ.
އަދި މިހާތަނަށް ރާއްޖޭގެ ރައްޔިތުންގެ ތެރެއިން ކަރަންޓު ބިލާއި، ފެނުގެ ބިލާއި، ޖޫރިމަނާ ކޮށްފައިވާ ހުރިހާ ޖޫރިމަނާއެއް މަޢާފް ކުރާނަން. އަދި އޭގެ އިތުރުން، ކުރިއަށް އޮތް މުސްތަގްބަލުގައި ވިޔަފާރި ކުރާ ތަންތަނުން ޑަބަލްކޮށް، ތިންގުނަ ކޮށްފައި ނަގާ ރެންޓުވެސް، ކަރަންޓުވެސް ފެނުގެވެސް ނުނެގޭނެ. ނަގަން ޖެހޭނީ ހަމަ އެއް އަގެއް. އެއް ގޮތަކަށް އެކަން ކުރާނީ. އެއް އުސޫލުން އެކަން ގެންދާނީ. އެއް އަގެއް އޮންނާނީ. އެއް ރޭޓަކަށް.
ގާސިމް އިބްރާހިމް
ރައްޔިތުންގެ ޖީބުތައް ފުރާދީ ތަނަވަސްކަން އިތުރުކޮށްދޭނެ ކަމަށްބުނެ އަންނަ ސަރުކާރުތަކުން މީގެ ކުރިން ރައްޔިތުންނަށް ދެއްކީ ދަޅަތަކެއްކަމަށް ގާސިމް ވިދާޅުވިއެވެ. އެހެންނަމަވެސް، އެފަދައިން ކަން ނުކުރައްވާނެ ކަމަށާއި ވެރިކަން ލިބިވަޑައިގެންފިނަމަ ރައްޔިތުން 'ފެލާލައި' އުޞޫލުން އަގުނަގާ ނެގުން ނައްތާލާނެ ކަމަށް ގާސިމް ވިދާޅުވިއެވެ.
ގާސިމް އިތުރަށް ވިދާޅުވީ މާލޭ ސަރަހައްދައް މީހުން ޖަމާކުރުމުގެ ބަދަލުގައި އެމަނިކުފާނު ގައުމު ބިނާ ކުރައްވާ ރާއްޖޭގެ ކަންކޮޅުތަކުގައި ގާއިމްކުރައްވާ ސިޓީތަކުގައި ތަހުޒީބު ވަސީލަތްތައް ގާއިމްކޮށް ފުރުޞަތުތައް އުފައްދައިގެންނެވެ. އެކަންކުރާނީ ދުނިޔޭގެ އެންމެ ތަހުޒިބު ސިޓީ ތަކުގެ ނަމޫނާއިއިންނާއި އެކަމުގެ އިލްމާއި ދިރާސާތައްކުރާ ކުރާ މާހިރުންގެ ލަފަޔާއި ބައިވެރިވުން ހޯދައިގެން ކަމަށެވެ.
Advertisement
This content is created and paid for by advertisers and does not involve Voice Journalists
