ހުޅުމާލޭ ޖަލުގައި ޙުކުމް ތަންފީޛުކުރަމުން ދިޔަ ގައިދީއެއް ނިޔާވެއްޖެ އެވެ. 

ނިޔާވެފައިވަނީ ގއ. ކަނޑުހުޅުދޫ އަންނާރުމާގޭ ޙަސަން މޫސާ ދީދީ (85 އަހަރު) ކަމަށް ކަރެކްޝަންސްއިން މައުލޫމާތު ދެއެވެ. 

ކަރެކްޝަންސް އިން ބުނީ، ޙަސަން މޫސާ ދީދީ ހަރަކާތްނުކުރާކަން ފާހަގަކުރެވިގެން، އެމެޖެންސީކޮށް ހުޅުމާލޭ ހޮސްޕިޓަލަށް މިއަދު ހެނދުނު ގެންދިއުމުން، ޑޮކްޓަރ ބެލުމަށްފަހު 9:55 ހާއިރު އޭނާ ނިޔާވެފައިވާކަމަށް ކަނޑައަޅާފައިވާ ކަމަށެވެ. އަދި އޭނާ ނިޔާވީ ހިތްހުއްޓިގެން ކަމަށްވެސް ހޮސްޕިޓަލާއި ހަވާލާދީ ކަރެކްޝަންސް އިން މައުލޫމާތު ދެއެވެ. 

މީގެ އިތުރުން އެ އީދާރާއިން ބުނީ، ޙަސަން މޫސާ ދީދީ އަކީ 25 އަހަރު ދުވަހުގެ ޙުކުމެއް ތަންފީޛުކުރަމުންދިޔަ ޤައިދީއެއް ކަމަށާ، އޭނާއަކީ މުސްކުޅި ބަލީގެ ސަބަބުން އެއްގޮތަކަށްވެސް ހިނގާ ބިނގާ ނޫޅެވޭ، އެނދުމަތިވެފައިވާ މީހެއް ކަމަށެވެ. 

ޙަސަން މޫސާ ދީދީ ނިޔާވުމާ ގުޅިގެން ކަރެކްޝަންސް އިން ވަނީ ވަގުތުން އެކަން އޭނާގެ ޢާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައި ކަމަށް އެ އިދާރާއިން ބުނެއެވެ.