މިއަހަރުގެ ރިޔާސީ އިންތިހާބުގައި ވާދަކުރައްވަން ގިނިކަންޏާ ނުކުންނަވައި، ކުރީގެ ހޯމް މިނިސްޓަރު ޢުމަރު ނަޞީރު ހޯއްދެވި ކާމިޔާބީއަށް ގިނަ ބައެއްގެ ތަޢުރީފު އޮހެން ފަށައިފި އެވެ. 

ރިޔާސީ އިންތިހާބުގައި ވާދަކުރައްވާކަން އިއުލާން ކުރައްވައި ކެންޕެއިން ފެށުނީއްސުރެ ވެސް ޢުމަރު ދައްކަމުން ދިޔައީ އެހެން ކެންޑިޑޭޓުންނާ ތަފާތު ވާހަކަތަކެކެވެ. ނުވަތަ ފާޅުގައި އެހެން ކެންޑިޑޭޓުން މާ ބޮޑަށް ދައްކައި ނޫޅޭ ވާހަކަ ތަކެކެވެ. 

އެގޮތުން ރަށްރަށުގަޔާއި، މާލޭގައި އަދި މީސްމީޑިއާ މެދުވެރިކޮށްވެސް ބޭއްވި އުމަރުގެ ކެންޕެއިން ބައްދަލުވުންތަކުގެ ތެރެއިން އެންމެ ގަދަޔަށް އޭނާ ދެއްކެވި ވާހަކައަކީ މަސްތުވާތަކެތީގެ މައްސަލަ ހައްލު ކުރާނެ ވާހަކަ އާއި ގޭންގުތައް ރޫޅާލާނެ ވާހަކައެވެ. މިދެ މައްސަލަ އަކީ މިއަދު ރާއްޖެއަށް ދިމާވެފައިވާ އެންމެ ބޮޑު މައްސަލައަށް ވާއިރު، އެ މައްސަލައިގެ ހައްލަކީ އިސްލާމީ ޝަރީޢަތުގައިވާ އަދަބުތައް، އެކަންކަން ކުރާ މީހުންނަށް ދިނުން ކަމަށް އޭނާ އައީ ވިދާޅުވަމުންނެވެ.

މީގެ އިތުރުންވެސް، ތަރައްގީގެ ބޮޑެތި މަޝްރޫއުތައް ހިންގާނެ ކަމަށް ބުނެ ނުފުއްދޭވަރުގެ ބޮޑެތި ވަޢުދުތައް ވެ "ޅޮސް އުނދޯންޔަށް ލާން" އުޅުމުގެ ބަދަލުގައި އުމަރު ކިޔައިދެއްވަމުން ދިޔައީ މުޖުތަމައުގައި އިސްލާހުކޮށް، މާރާމާރީތަކާއި، ހައްގަކާއި ނުލައި މީހުން މެރުމުގެ މައްސަލަތައް ހައްލުކުރުމަށް އިސްލާމީ ޝަރީޢަތުގައި އޮންނަ ގޮތަށް މަރަށް މަރު ހިފައިގެން މަރުތައް މަދުކުރުމުގެ ވާހަކައެވެ. 

މި ސަބަބު ތަކާއި ހުރެ އޭނާއަށް މީހުން ވޯޓު ނުދޭނެ ކަމަށާ، އޭނާއަށް ވެސް ނުރައްކާވާނެ ކަމަށް ބުނަމުންދިޔައިރު، އުމަރު ވިދާޅުވަމުން ދިޔައީ އެފަދައިން ކަން ވިޔަސް އޭނާގެ މަސައްކަތް ހުއްޓާނުލައްވާނެ ކަމަށެވެ. ކަން ކުރައްވަމުން ދިޔައީވެސް އެފަދައިންނެވެ. 

އެފަދަ ގޮތަކަށް ކެންޕެއިން ނިމި، އިއްޔެ ނަތީޖާ އިއުލާން ކުރެވުނުއިރު، އެންމެން އެންމެ ހައިރާން ކުރުވި ނަތީޖާއަކަށްވީ އުމަރުގެ ނަތީޖާ ކަމޭ ބުނުންވެސް ދޮގަކަށް ނުވާނެއެވެ. 

އިންތިހާބުގައި ރާއްޖެއިން ތިންވަނައަށް އެންމެ ބޮޑު ޕާޓީގެ ކެންޑިޑޭޓް، އަދި މަޝްހޫރު ވިޔަފާރިވެރިޔާ ގާސިމް އިބްރާހިމާއި، ދެން ވެސް ޕާޓީ ތަމްސީލް ކުރައްވަމުންދިޔަ މުހައްމަދު ނާޒިމް ފަދަ ބޭފުޅުންގެ މައްޗަށް އުމަރު ވަނީ ކުރި ހޯއްދަވާފައެވެ. 8 ކެންޑިޑޭޓުން ވާދަކުރެއްވި މި އިންތިޚާބުގެ 4 ވަނައަށް އެންމެ ގިނަ ވޯޓު ހޯދީ ޢުމަރެވެ. އެގޮތުން ޖުމުލަ 6300 އަށްވުރެ ގިނަ ވޯޓު އުމަރަށް ލިބިލެއްވިއެވެ. 

އުމަރުގެ އެ ކާމިޔާބީއަށް ގިނަ ބައެއް ތައުރީފް ކޮށް، އޭނާއަށް މަރުހަބާ ކިޔަމުން އަންނައިރު، އަބަދުވެސް އެގޮތުގައި ސާބިތުވެ ހުރުމަށް އެންމެންވެސް އަންނަނީ އެދެމުންނެވެ. އަދި ގައުމުގެ މައްސަލަތަކުގެ ހައްލަކީ ހަގީގަތުގައިވެސް އުމަރު ކަމަށް އެ ފަރާތްތަކުން އަންނަނީ ބުނަމުންނެވެ. 

އިމްތިހާބުން ލިބުނު ކާމިޔާބީ އާއި އެކު، އުމަރު ވަނީ އޭނާގެ މަސައްކަތުގައި ބައިވެރިވެ ދެއްވި ހުރިހާ ބޭފުޅުންނާއި ވޯޓް ދެއްވި ހުރިހާ ބޭފުޅުންނަށް ޝުކުރު އަދާކުރައްވާފައެވެ.