ޤައުމީ ސަލާމަތަށް ނުރައްކާވާފަދަ ލިޔުމެއް ލީކުވެގެން ސަރުކާރަކުން އުފާފާޅުކުރާ ތަނެއް މިނޫނިއްޔާ ނުދެކެން ކަމުގައި ރައީސް އަބްދުالله ޔާމީނުގެ ވަކީލުންގެ ޓީމުގައި ހިމެނިވަޑައިގަންނަވާ އަބްދުالله ސިޔާޒް ވިދާޅުވެއްޖެއެވެ.
ރާއްޖެ އާއި ޗާގޯސް އާއި ދެމެދު އޮންނަ ކަނޑުގެ ސަރަހައްދުން ފުށު އަރާ ސަރަހައްދުގެ އިން ވަކިކުރުމުގެ މައްސަލަ ބަލަމުންދަނިކޮށް ރައީސް އިބްރާހިމް މުހައްމަދު ސޯލިހު މޮރިޝަސްގެ ބޮޑުވަޒީރު ޕްރަވިންދް ޖުގްނައުތަށް ފޮނުއްވި ސިޓީކަމަށް ބުނާ ސިޓީއެއް ވަނީ އިއްޔެ ލީކުވެފައެވެ.
މިކަމާއި ގުޅިގެން ރައީސް ޔާމިނުގެ ވަކީލުންގެ ޓީމުގައި ހިމެނިވަޑައިގަންނަވާ ސިޔާޒް ކުރެއްވި ޓުވީޓެއްގައި ބުނެފައިވަނީ އަދި މިވީހާތަނަށް ޤައުމީ ސަލާމަތަށް ނުރައްކާވާފަދަ ލިޔުމެއް ލީކުވެގެން ސަރުކާރަކުން އުފާފާޅުކުރާ ތަނެއް މިނޫނިއްޔާ ނުދެކެން ކަމުގައެވެ.
އިއްޔެ ލީކުވެފައިވާ ސިޓީގައި ރާއްޖޭގެ ކަނޑުން ބައެއް ގެއްލުމުގެ ވާހަކައެއް ނެތް ނަމަވެސް މީގެ ކުރިން ވެސް ގާނޫނީ ތަޖުރިބާކާރުންނާއި އަދި މައްސަލައިގައި އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ނިންމި ނިންމުމުގައި ވެސް ވަނީ ރާއްޖެ އިން އެތައް އަހަރެއް ވަންދެން ޗާގޯސް އަކީ މޮރިޝަސްގެ ބާރު ނުހިނގާ ސަރަހައްދެއް ކަމަށް ކުރަމުން އައި ދައުވާ ރައީސް ސޯލިހްގެ ސިޓީން އަނބުރާ ގެންގޮސްފައިވާކަން ފާހަގަ ކޮށްފައެވެ.
މިއާއެކު ގިނަ އަދަދެއްގެ ފަރާތްތަކުން އަންނަނީ ސިޓީއަކީ އިންތިހާބަށް ތަރުހީބު ހޯދުމަށް ސަރުކާރުން ޖަހައިފައިވާ މަޅިއެއްގެ ގޮތުގައި ސިފަކުރަމުންނެވެ.
މީގެ ކުރިން ސަރުކާރުން މި ސިޓީ އާންމުކޮށްފައި ނުވަނީ އެއީ ރާއްޖޭގެ ސަލާމަތާއި ރައްކާތެރިކަމަށް އަސަރުކުރާނެ ފަދަ މައުލޫމާތު ހުރި ސިޓީއެއް ކަމުގައި ބުނެއެވެ.
ރިޔާސީ އިންތިހާބުގެ ފުރަތަމަ ބުރުގައި ލިބިލެއްވި ނާކާމިޔާބީއާއެކު ރައީސް ޞާލިހުވަނީ ނާކާމިޔާބު ވުމުގެ އެންމެ ބޮޑު ސަބަބަކީ، މިނިވަންކަމާއި ގުޅިގެން ދެކެވޭ ވާހަކަތަކަށް ރައްދު ނުދެވުން ކަމުގައި ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
