މޮރިޝަސްގެ ބޮޑު ވަޒީރަށް ދިވެހިރާއްޖޭގެ ރައީސުލްޖުމްހޫރިއްޔާ ފޮނުވާފައިވާ ސިޓީކަމަށް ބުނެ ލީކްވި ސިޓީއަކީ އަސްލު ޙަޤީޤަތެއްނަމަ އެ ސިޓީ ރަސްމީ ޕްރޮޓޮކޯލްގެ ތެރެއިން އާއްމު ކުރެއްވުމަށް ކުރީގެ ބަންޑާރަނައިބު ޑރ. މުޙައްމަދު މުނައްވަރު ސަރުކާރަށް ގޮވާލައިފިިއެވެ.

ރައީސް ޞާލިޙް, މޮރިޝަސްގެ ބޮޑު ވަޒީރަށް ފޮނުވި ސިޓީފުޅު ކަނަށް ބުނާ ސިޓީއެއް އިއްޔެ ވަނީ ލީކްވެފައެވެ. އެ ސިޓީއަކީ ސައްޙަ ސިޓީއެއްކަން ރައީސް އޮފީހުގެ ތަރުޖަމާނު މުޙައްމަދު މިއުވާންވެސް ވަނީ ކަށަވަރުކޮށްދެއްވާފައެވެ.

އެގޮތުން ލީކުވެފައިވާ ސިޓީގައި ލިޔެފައިވާ ވާހަކަފުޅަށް ބަލާއިރު, އެއީ އެހެން ޤައުމެއްގެ ބޮޑު ވަޒީރަކަށް ފޮނުވާ ވަރަށްވުރެ ދަށް ފެންވަރުގެ ސިޓީއެއް ކަމުގައި މުނައްވަރު ވިދާޅުވިއެވެ. އަދި އެއީ ސައްޙަ ސިޓީއެއްނަމަ އެ ސިޓީ ރާއްޖެއިން ފޮނުވުމަކީ ލަދުވެތި ކަމެއް ކަމުގައިވެސް މުނައްވަރު ވަނީ ވިދާޅުވެފައެވެ. 

މީގެ އިތުރުން މުނައްވަރު ވިދާޅުވީ, ސިޓީގެ މައްސަލައިގައި ނޫސްވެރިންނާ ވަރަށް އަވަހަށް ބައްދަލު ކުރައްވައި އިތުރު ތަފްސީލް ހާމަ ކުރައްވާނެ ކަމަށެވެ.