ރާއްޖޭގައި އޮންނަން ފެންނަ ނިޒާމެއް ބެލުމަށްޓަކައި ވޯޓެއް ނެގުމަށް ރައްޔިތުން މަޖިލީހަށް ގަރާރެއް ހުށަހަޅައިފިއެވެ.

މި މައްސަލަ ހުށަހަޅާފައިވަނީ ރައްޔިތުންގެ މަޖިލީހުގެ ހުޅުދޫ ދާއިރާގެ، ޑިމޮކްރެޓްސް ގެ މެންބަރު އިލްޔާސް ލަބީބެވެ. 

އިލްޔާސް ލަބީބް ހުށަހެޅުއްވި ގަރާރު މިއަދުގެ ޖަލްސާގައި މަޖިލީހަށް ތައާރަފްކޮށްފައި ވާއިރު އޭގައި ބުނެފައިވާގޮތުން، 2008 ވަނަ އަހަރު ތަސްދީގުކުރެވުނު ގާނޫނު އަސާސީއަށް 15 އަހަރުވެފައިވާއިރު އެ ގާނޫނުއަސާސީއަށް އަމަލުކުރަން ފެށިފަހުން ބޭއްވި ކޮންމެ ރިޔާސީ އިންތިހާބަކަށް ބެލިކަމުގައި ވީ ނަމަވެސް އެއިން ކޮންމެ އިންތިހާބެއްވެސް ރައްޔިތުންނަށް ބޭނުންވާ ކަންތައްތަކަށް ވޯޓުލުމުގެ ބަދަލުގައި ރައްޔިތުން ވޯޓު ދޭންޖެހިފައިވަނީ އެއިރެއްގެ ސަރުކާރުގައި ހުންނަ ވެރިމީހާ ކަމުނުގޮސްގެން އޭނާ ވެރިކަމުން ބާލައި ވެރިކަން ބަދަލުކުރުމަށް ކަމަށެެވެ. 

Advertisement

އަދި ކޮންމެ އިންތިހާބަކާ ހަމައަށް އަންނައިރު ކޮންމެވެސް ބަޔަކު ސިޔާސީގޮތުން ބަންދުގައި ތިބޭކަމުން އެ ބައެއްގެ ސަޕޯޓަރުންނާއި އެ ބަޔަކަށް ނިސްބަތްވާ ޕާޓީތަކުންގެ ސަޕޯޓަރުން އަބަދުވެސް މަސައްކަތްކުރަން ޖެހިފައިވަނީ އަދި ވޯޓުލާންޖެހިފައިވަނީ އެ ބަޔަކު މިނިވަންކުރުމުގެ މަގްސަދުގައި ކަމަށްވެސް އެ ގަރާރުގައި ވެއެވެ. 

މިއާއެކު އެ ގަރާރުގައި ބުނީ، ރައީސް ކަމަށް މީހަކު އިންތިހާބުވާނީ ވޯޓުދިން މީހުންގެ 50 ޕަސަންޓަށްވުރެ ގިނަ ވޯޓު އެ މީހަކަށް ލިބިގެން. މިހާތަނަށް ރިޔާސީ އިިންތިހާބަށް ކުރިމަތިލި އެއްވެސް ކެންޑިޑޭޓަކަށް ކޯލިޝަން ހެދުމަކާ ނުލައި އިންތިހާބުގެ ފުރަތަމަ ބުރުން 50 ޕަސަންޓަށްވުރެ ގިނަ ވޯޓު ކާމިޔާބު ކުރެވިފައިނުވާ ކަމަށެވެ. 

ކޮންމެ ރިޔާސީ އިންތިހާބެއްގައި ކޯލިޝަން ހެދުމާއި އިންތިހާބުގެ ތެރެއިން އެއް ޕާޓީ އަނެއް ޕާޓީއާ އެއްބަސްވުންތައް ހެދުމާއި ވެރިކަމުގެ ދައުރުގެ ވަކި ހިސާބަކުން ޕާޓީތަކުގެ މެދުގައި ހިލާފު އުފެދި ރައްޔިތުންނަށް ފޯރުކޮށްދޭންޖެހޭ ހިދުމަތްތަކާއި ގައުމަށް ގެންނަންޖެހޭ ތަރައްގީ އާއި ދިިމިގުރާތީ ނިޒާމެއްގައި މަސައްކަތްކުރަންޖެހޭ އެންމެ އެކަށީގެންވާ ގޮތެއްގައި ސަރުކާރުތަކުން މަސައްކަތް ކުރަމުން އައިސްފައިނުވާ ކަމަށް ގަރާރުގައި ފާހަގަކޮށްފައިވެއެވެ.

ގާނޫނު އަސާސީގެ 70 ވަނަ މާއްދާގެ ދަށުން ރައްޔިތުންގެ މަޖިލީހަށް ލިބޭ ގާނޫނު ހެދުމުގެ އާންމު ބާރުގެ ތެރެއިން ކަމެއް ނިންމުމުގައި ރައްޔިތުންގެ ހިޔާލު ހޯދުން މުހިންމު ކަމަށް މަޖިލީހަށް ފެންނަ ކަންތައްތަކުގައި ރައްޔިތުން އެކަމުގައި ދެކޭ ގޮތް ބެލުމަށް ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމުގެ ބާރު މަޖިލީހަށް ލިބޭކަން ގަރާރުގައި ފާހަގަކޮށްފައިވެއެވެ. 

އެހެންކަމުން 2007 ވަނަ އަހަރުގެ އޮގަސްޓް މަހުގެ 18 ވަނަ ދުވަހު ރާއްޭގައި އޮންނަން ފެންނަ ވެރިކަމުގެ ނިޒާމާ ގުޅޭގޮތުން ނެގުނު ރައްޔިތުން ހިޔާލު ހޯދުމުގެ އާންމު ވޯޓުން ރާއްޖޭގައި އޮންނަން ފެންނަނީ ރިޔާސީ ނިޒާމެއް ކަމަށް ފާސްވެފައިވީނަމަވެސް މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން ރައްޔިތުން ދެކޭ ގޮތެއް ބެލުމަށް، 30 ނޮވެމްބަރ ގެ ކުރިން ވޯޓެއް ނެގުމަށް އެ ގަރާރުގައި ވަނީ ހުށަހަޅާފައެވެ.