މިއަހަރުގެ ރިޔާސީ އިންތިހާބުގައި އަމިއްލަ ގޮތުން ވާދަކުރެއްވި ކުރީގެ ހޯމް މިނިސްޓަރު ޢުމަރު ނަޞީރު، 2028 ވަނަ އަހަރު ރިޔާސީ އިންތިހާބުގެ ކެންޕެއިން ފަށްޓަވައިފި އެވެ. 

2028 ވަނަ އަހަރުގެ ކެންޕެއިން ފެށްޓެވިކަން ހާމަކުރައްވައި އުމަރު ވަނީ އޭނާގެ ރަސްމީ ފޭސްބުކު އެކައުންޓްގެ ޕްރޮފައިލް ފޮޓޯ ބަދަލު ކުރައްވާފައެވެ. އެ ފޮޓޯ ގައި އޭނާގެ ކެންޕެއިން ސްލޯގަންގެ ގޮތުގައި ލިޔުއްވާފައިވަނީ މިފަހަރުގެވެސް ސްލޯގަން ކަމުގައިވާ "އަ ނިޔު ޑައިރެކްޝަން" ނުވަތަ "އައު މިސްރާބަކަށް" މިހެންނެވެ. އެއާއެކު އުމަރު2028 ހޭޝްޓެގް ވެސް ވަނީ ބޭނުން ކުރައްވާފައެވެ. 

މިއަހަރުގެ ރިޔާސީ އިންތިހާބުގެ ފުރަތަމަ ބުރުގައި ރާއްޖެއިން ތިންވަނައަށް އެންމެ ބޮޑު ޕާޓީގެ ކެންޑިޑޭޓް، އަދި މަޝްހޫރު ވިޔަފާރިވެރިޔާ ގާސިމް އިބްރާހިމާއި، ދެން ވެސް ޕާޓީ ތަމްސީލް ކުރައްވަމުންދިޔަ މުހައްމަދު ނާޒިމް ފަދަ ބޭފުޅުންގެ މައްޗަށް އުމަރު ވަނީ ކުރި ހޯއްދަވާފައެވެ.

8 ކެންޑިޑޭޓުން ވާދަކުރެއްވި މި އިންތިޚާބުގެ 4 ވަނައަށް އެންމެ ގިނަ ވޯޓު ހޯދީ ޢުމަރެވެ. އެގޮތުން ޖުމުލަ 6300 އަށްވުރެ ގިނަ ވޯޓު އުމަރަށް ލިބިލެއްވިއެވެ. 

އަދި އިންތިހާބުގެ ދެވަނަބުރަށް އެހެން ބައެއް ޕާޓީ ތަކުން އެމްޑީޕީ އަދި ޕީޕީއެމް/ޕީއެންސީ އާއި އެކު ކޯލިޝަން ހެދުމުގެ މަޝްވަރާތައް ފަށްޓަވާފައި ވާއިރު، އުމަރު ނިންމެވީ އެއްވެސް ކޮޅަކަށް ނުޖެހި ހުންނެވުމަށެވެ.

މި އިންތިޚާބު ގެ ކެންޕެއިން ތެރެއިންވެސް އުމަރު ވިދާޅުވަމުން ދިޔައީ ޕާޓީ އެއްގެ ކެންޑިޑޭޓެއްގެ ގޮތުގައި ނުކުމެ ވެރިކަމަށް އިންތިޚާބުވެވަޑައިގެންނެވުނި ނަމަވެސް، ގައުމު އިސްލާހު ނުކުރެވޭނެ ކަމަށެވެ. އެހެންކަމުން، ފުރަތަަމަ ބުރުން ނާކާމިޔާބީ ލިބިލެއްވި ނަމަވެސް، ދެވަނަ ބުރުގައި އެހެން ބަޔަކާ ކޯލިޝަން ނުހައްދަވާނެ ކަމަށް އޭނާ ވަނީ ވިދާޅުވެފަ އެވެ.