ރިޔާސީ އިންތިޚާބު ކާމިޔާބު ކުރުމަށް ރައީސް އިބްރާހީމް މުހައްމަދު ސާލިހް ޖެއްސެވި ހިސާބުގައި ކުޑަ އޮޅުމެއް އަރައިފިއެވެ. އެންމެފަހުން ސޯސަން ޖަގަހައިގައި ދެއްކެވި ވާހަކަފުޅުގައި 9 ސެޕްޓެންބަރގައި ބެއްވި އިންތިޚާބު ރައީސް މިސާލެއް ޖެއްސެވީ ފުޓްބޯޅަ މެޗަކަށެވެ. ސާލިހް ވިދާޅުވީ ފުރަތަމަ ހާފް ބައެއް ފަހަރު 3 ލަނޑު 1 ލަނޑުން ނުވަތަ 4 ލަނޑު 1 ލަނޑުން ބަލިވާކަމަށެވެ. އެއއްބަޔަކު މޮޅުވެއެވެ.

" އަޅުގަނޑުމެން މިއަދު މިތިބީ އެގޮތަށް ބަލާނަމަ 3-1 ގެ ތަފާތަކުން (ބަލިވެފައި). އިރާދަކުރެއްވިޔާ ދެވަނަ ހާފުގައި އަޅުގަނޑުމެން ނުކުމެ އެވަރަށް ހަމަކޮށް އިތުރަށް 2 ލަނޑު ޖަހައި އިރާދަކުރެއްވިއްޔާ 5-2 ލަނޑުން އިރާދަކުރެއްވިއްޔާ މިމެޗް ކާމިޔާބު ކުރާނަން" ރައީސް ސާލިހް ވިދާޅުވިއެވެ.

ރައީސަށް އޮޅިވަޑައިގަތް ތަންކޮޅަކީ ތިންލަނޑު އެއްލަނޑުން ބަލިވެފައި އޮއްވާ ދެވަނަ ހާފުގައި ނުކުމެ އެއްވަރު ކުރުމަށްފަހު ދެން ލަފާކުރެއްވި ނަތީޖާއެވެ. ތިނެއް ތިނަކުން އެއްވަރުކޮށްފައި ފަސްލަނޑު ދެލަނޑުން މޮޅުވާނެ ގޮތެއް ނެތެވެ. ރައީސް ވިދާޅުވާން ޖެހޭނީ ފަސްލަނޑު ތިން ލަނޑުން މޮޅުވާނެ ކަމަށެވެ. އެހެންވީމާ އެއީ މެޗްގެ ސްކޯ ރައީސަށް އޮޅިވަޑައިގަތުމެވެ. އެހެންދިމާވެދާނެއެވެ. ރައީސް ސާލިހަކީ ފުޓްބޯޅައަށްވުރެ ވޮލީބޯޅަ ކުޅުއްވުމަށް ޝައުގުވެރިވެވަޑައިގަންނަވާ ބޭފުޅެކެވެ. ފަހަރުގައި ވޮލީ ބޯޅަ މެޗެއްގެ ސްކޯ ވިދާޅުވާން އުޅުއްވީކަމަށް ވެދާނެއެވެ. އެކަމަކު ވޮލީބޯޅައިގައިވެސް މެޗެއްގައި ފަސް ސެޓް ކުޅެން އޮންނައިރު ތިންސެޓް އެއް ސެޓުން ބަލިވެފައި އޮއްވައި ފަސްވަނަ ސެޓް ގެންދިޔަޔަސް މޮޅުވެވޭނެ ގޮތެއް ނެތެވެ. އެއްވަރެއްވެސް ނުވާނެއެވެ.

ރައީސް ވިދާޅުވިގޮތުން ފުރަތަމަ ހާފުގައި ބަލިވުމާއެކު ޗޭންޖިންރޫމަށްވަދެ މިހާރުވަނީ ކުޅޭނެ ގޮތާއި ބައެއް ކުޅުންތެރިން ބަދަލުކޮށްފައެވެ. އެހެން ފަހަރެއްގައި ރައީސް ވިދާޅުވީ ހެދުނު މިސްޓޭކްތައް މިހާރު ރަނގަޅުކޮށްފައިވާކަމަށެވެ.

އެހެންނަމަވެސް މެޗް އެނަލައިޒްކުރާއިރު ރައީސް އެހެންވިދާޅުވިޔަސް މިސްޓޭކްތައް އަދި ރަނގަޅު ކުރެއްވިތަނެއް ނުފެނެއެވެ. ރިޔާސީ މެޗްގެ ފުރަތަމަ ހާފްގައި ބަލިވީ މައިގަނޑު ދެސަބަބަކާ ހެދިއެވެ. އެއްސަބަބަކީ ޕްލޭނިން މިނިސްޓަރ އަސްލަމް ޖެއްސެވި ކަޑަތަކެވެ. ބޮޑެތި އަތޮޅުތަކާއި ސިޓީތަކުގައި ފެށްޓެވި މަޝްރޫއުތައް ފަސް އަހަރުވެގެންދިޔައިރު ނިންމައިލުމުގެ ގާބިލްކަމެއް ނުދެއްކެވުމެވެ. ބައެއް ރަށްރަށުގައި ރައީސް ސާލިހް ވެރިކަމަށް ވަޑައިގަތުމާއެކު ފެނާ ނަރުދަމާ އަޅަން ގެންދިޔަ ހޮޅިތަކާއި އެހެން ސާމާނުތައް ފަސްއަހަރުތެރޭގައި ވެހުނުހާ ވާރެއަކާއި ދިންހާ އައްވެއްގައި ހުރެ ފަނާވެގެންދިޔައީ ރަށްރަށުގެ މީހުންގެ ކުރިމަތީގައެވެ. ގުނައި އަދަދު ނުކުރެވޭހާ ގިނަ މަޝްރޫއުތައް އިއުލާންކުރަމުން އެމްޓީސީސީއާއި ހަވާލު ކުރަމުންދިޔައިރު މަހާ ޖައްރާފާއާއި ބޮޑު ޖައްރާފާ އޮތީ ހަލާކުވެފައެވެ. އެމްޓީސީސީގައި ސާމާނުގެގޮތުންނާއި މުވައްޒަފުންގެ ގޮތުންވެސް އެވަރުގެ ކެޕޭސިޓީއެއް ނެތެވެ. އެކުންފުނިން ކުރިކަމަކީ އެއް ދުވަހު އެއް ރަށުގައި މަސައްކަތްކޮށްފައި ސާމާނު ހިފައިގެން އަނެއް ދުވަހަކު އަނެއް ރަށަކަށް ގޮސް މަސައްކަތްކޮށްފައި މުޅި ރާއްޖޭގައި ދަތުރުކުރީއެވެ. 9 ސެޕްޓެމްބަރގައި ރައްޔިތުން އެދެއްކީ އެމީހުންނަށް ލިބިފައިވާ މާޔޫސްކަމެވެ.

މަންޒަރުތައް މިހެން ފެންނަން ހުރުމާއެކު ދެވަނަ ހާފް މިފެންނަނީ ރައީސް ރައްޔިތުންގެ ކައިރިއަށް ވަޑައިގަންނަވަން ކުޑަކޮށް ފަސްޖެހިވަޑައިގެންފައިވާ މަންޒަރެވެ.

ފުރަތަމަ ހާފުން ބަލިވި ދެވަނަ ސަބަބަކަށްވީ ބަންޑާރަ ނާއިބް އިބްރާހިމް ރިފްއަތެވެ. ގަނޫން އަސާސީއާއި ޚިލާފަށް އިންޑިއާއާއެކު ސަރުކާރުން ހެދިކަމަށް ބުނާ އެއްބަސްވުންތަކުގެ ފަހަތުގައި ހުންނަވާނީ ދައުލަތުގެ ގާނޫނީ ވަކީލް ބަންޑާރަ ނާއިބެވެ. ރިފްއަތުގެ ގާނޫނީ ލަފާ މުޅިން ގޯސްވެއްޖެކަން ސަރުކާރަށް ފަހުމްވާގޮތްވީ ފުރަތަމަ ހާފު ނިމުނު ފަހުނެވެ. ރިފްއަތުގެ ނާގާބިލްކަމުން ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލުވާލައިފިކަމަށް ދިވެހިންނަށް ގަބޫލު ކުރެވިއްޖެއެވެ. އިންޑިއާއެކު ހަދާފައިވާ އެއްބަސްވުންތަކުން ދިވެހި ގައުމުގެ މިނިވަންކަމަށް ބުރޫއަރާފައިވާކަމަށް މީހުންނަށް ގަބޫލު ކުރެވިއްޖެއެވެ. މީހުންގެ ހިތްތަކަށް ވަދެފައިވާ އެބިރު ފިލުވައިލެވޭތޯ ދެވަނަ ހާފަށް ނުކުންނަވާއިރު މަސައްކަތްކުރައްވަނީ އެހެންވެގެންނެވެ. އެކަމަކު މިހާރު ދެން ވަގުތުވެސް ވަރަށް ކުޑައެވެ. ކުޅުންތެރިން ބަދަލުކުރެއްވިޔަސް އަސްލަމާއި ރިފްއަތު ތިބިގޮތަށް އެބަތިއްބެވިއެވެ.