ޤައުމުގެ ވާހަކަ ދައްކަވަން މަޖިލީހަށް ވަޑައިގަތުމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމަށް ދަންނަވައިފިއެވެ.

ދަ ޑިމޮކްރެޓްސްގެ މުސްތަޤްބަލް ޤައުމުގެ މުސްތަޤްބަލަށް ވުރެން މުހިންމުކަމަށް ދެކުނީތީ ހިތާމަކުރައްވާ ކަމަށް ވިދާޅުވެ ރޮޒައިނާ ކުރައްވާފައިވާ ޓްވީޓަކަށް ރައްދު ދެއްވައި ކުރައްވައިފައިވާ ޓްވީޓެއްގައި އިމްތިޔާޒް ވިދާޅުވީ ޤައުމުގެ ވާހަކަ ދައްކަވަން މަޖިލީހަށް ވަޑައިގެންނެވުމަށެވެ.

އަދި  ފުރަތަމަ ބުރުގެ ނަތީޖާއަށް ފަހު މަޖިލީހަށް ރޮޒޭނާ ވަޑައިނުގަނެ އުޅުއްވާ ކަމަށްވެސް އިމްތިޔާޒް ވިދާޅުވިއެވެ. އެމްޑީޕީ އަކީ ރައްޔިތުންގެ މަޖިލީހުގެ މެޖޯރިޓީ ހިފަހައްޓާ ޕާޓީ އަށް ވާއިރު އެޕާޓީގެ ގިނަ މެމްބަރުންތަކެއް މަޖިލީހުގެ ޖަލްސާގައި ބައިވެރިވެ ވަޑައި ނުގަންނަވައެވެ. އިއްޔެވެސް މަޖިލީހުގެ ޖަލްސާ ފަށައި ޖަލްސާ ހުއްޓާލަން ޖެހުނީ ކޯރަމް ހަމަނުވެގެނެވެ.

މަޖިލިސް ހުއްޓުވަނީ ސީދާ ރައީސް އިބްރާހިމް މުޙައްމަދު ޞާލިޙް އަންގަވައިގެން ކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެފައިވާއިރު، ރައީސް ނަޝީދު މިއަދު ނިންމެވީ ނިޒާމީ ވޯޓާ ގުޅޭ ގޮތުން ގޮތެއް ނިމެންދެން މިއަދުގެ މަޖިލިސް ކުރިއަށް ގެންދިޔުމަށެވެ.