‏ބަރުލަމާނީ ނިޒާމަކަށް ދައުލަތް ހިންގުމުގެ ނިޒާމް ބަދަލުކުރާނަމަ، ޤާނޫނު އަސާސީ ޖެހޭނީ އަލުން އެކުގައި ލިޔަން ކަމަށް އެމްޑީޕީ ކުރީގެ ރައީސް އަދި މިހާރު ޢަމަލުކުރަންދާ ޤާނޫނު އަސާސީ ޑްރާފްކުރި ކޮމިޓީގެ މުޤައްރިރު، އިބްރާހީމް އިސްމާޢީލް (އިބުރާ) ވިދާޅުވެއްޖެއެވެ.

ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރަން ރައްޔިތުންގެ ފެންނަ ނުފެންނަ ވޯޓެއް ނަގަން ގޮވާލައި ހުޅުދޫ ދާއިރާގެ މެންބަރު އިލްޔާސް ލަބީބު ހުށަހެޅުއްވި ގަރާރު، ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން އިއްޔެ ވަނީ ފާސްކޮށްފަ އެވެ. ދެން އޮންނާނީ މަޖިލީހުގެ ތަޅުމުގައި ބަހުސްކޮށް ތަޅުމުން ފާސްކުރުމެވެ.

އެކަމާއި ގުޅިގެން އިބްރާ ކުރެއްވި ޓްވީޓެއްގައި ވިދާޅުވީ، ބަރުލަމާނީ ނިޒާމަކަށް ދައުލަތް ހިންގުމުގެ ނިޒާމް ބަދަލުކުރާނަމަ، ޤާނޫނު އަސާސީ ޖެހޭނީ އަލުން އެކުގައި ލިޔަން ކަމަށާ އެއީ ހަމައެކަނި "ރައީސުލްޖުމްހޫރިއްޔާ" ގެ ބާބު "ބޮޑުވަޒީރުގެ ބާބަށް" ބަދަލުކޮށްލައިގެންވާނޭ ކަމެއް ނޫން ކަމަށެވެ. 

Advertisement

"ކުރަން އުޅެންވާނީ ކުރެވޭވަރުގެ ކަންތައް." އިބްރާ ވިދާޅުވި އެވެ.

ވެރިކަމުގެ ނިޒާމު ބަރުލަމާނީއަށް ބަދަލު ކުރަން ފެންނަ ނުފެން ވޯޓު ނެގުން އެދި ހުށަހެޅު ގަރާރު މަޖިލީހުގެ ކޮމިޓީން ފާސްކޮށްފައިވާއިރު، އެ ގަރާރަށް ބަހުސް ކުރުމަށްފަހު ގަރާރު ފާސްވެއްޖެ ނަމަ، އެ ވޯޓު ނެގުން އަންނަ އޮކްޓޯބަރު މަހުގެ 30 ވަނަ ދުވަހު ބޭއްްވުމަށް ގަރާރުގައި ވަނީ އެދިފައެވެ. 

ބަރުލަމާނީ ނިޒާމަކަށް ވެރިކަން ބަދަލު ކުރުމަކީ މަޖިލީހުގެ ރައީސް މުހައްމަދު ނަޝީދާއި އެމަނިކުފާނަށް ތާއީދު ކުރައްވާ ގިނަ މެންބަރުން ތަކެއްގެ އެދުމެއް ކަން ފާހަގަކޮށްލަން ޖެހެއެވެ.