މި އަހަރަށް ދައުލަތުން ކަނޑައަޅާ ބަޖެޓާ ގުޅޭ ގޮތުން މިދިޔަ އަހަރު އިލެކްޝަންސް ކޮމިޝަނުން ރައްޔިތުންގެ މަޖިލީހުގެ މާލިއްޔަތު ކޮމިޓީއާއެކު ބޭއްވި ބައްދަލުވުމުގައި، ރައްޔިތުންގެ އާންމު ވޯޓެއް ނަގަން ޖެހިއްޖެ ނަމަ އެކަމަށް ބަޖެޓު ބޭނުންވާނެ ކަމަށް ބުނި ނަމަވެސް މަޖިލީހުން އެކަމަށް އިޖާބަ ދީފައި ނުވާކަމުގައި އިލެކްޝަންސް ކޮމިޝަންގެ ނައިބްރައީސް އިސްމާއިލް ހަބީބް ވިދާޅުވެއްޖެއެވެ. 

މި މަހުގެ 30 ވަނަ ދުވަހު ބޭއްވުމަށް ހަމަ ޖެހިފައިވަ ރިޔާސީ އިންތިހާބުގެ ދެވަނަ ބުރުގެ ވޯޓު ލުމާއި ގުޅޭގޮތުން ނޫސްވެރިނަށް މައުލޫމާތު ދިނުމަށް މިއަދު އިންތިހާބީ މަރުކަޒުގައި ބޭއްްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހަބީބް ވިދާޅުވީ، އިސީން ރައްޔިތުންގެ މަޖިލީހުގެ މާލިއްޔަތު ކޮމިޓީގައި، ރައްޔިތުންގެ ވޯޓެއް ނަގަން ޖެހިއްޖެ ނަމަ އާންމުން އެކަމަށް ހޭލުންތެރިކުރުވަން ޖެހޭނެ ކަމަށާއި އެކަމަށް ބަޖެޓު ބޭނުންވާނެ ކަމަށް ބުނުމުންވެސް އެކަމަށް ރައްްޔިތުންގެ މަޖިލީހުގެ ފަރާތުން މާ ބޮޑު 'ސަޕޯޓެއް' ލިބިފައި ނުވާކަމަށެވެ.

މީގެ އިތުރުން ހަބީބް ވިދާޅުވީ ރައްޔިތުންގެ ވޯޓުތަކާއި، އެފަދަ ވޯޓުތަކަށް އާންމުން ހޭލުންތެރި ކުރުވުމަކީ އިލެކްޝަންސް ކޮމިޝަންގެ މައްޗަށް ގާނޫނު ލާޒިމްކުރާ ކަމެއް ކަމަށާއި އަދި އެފަދަ ވޯޓެއް ނެގުމަށް އީސީއަށް އަންގަނީވެސް އަދި ބްޖެޓު ފާސް ކޮށްދެނީ ވެސް މަޖިލީހުން ކަމަށެވެ. 

އަންނަ މަހުގެ 30ގެ ކުރިން ނިޒާމީ ވޯޓެއް ނަގަން މަޖިލީހަށް ހުށަހަޅާފައިވާ ގަރާރެއް، މިދިޔަ ބުދަ ދުވަހު ފާސްކުރުމަށް ފަހު އެ ވޯޓު ނަގަން މަޖިލީހުން ވަނީ އީސީއަށް އަންގައިފިއެވެ. އީސީން ވަނީ އެ ގަރާރާ ބެހޭ ގޮތުން ގާނޫނީ ލަފާ ހޯދުމަށް ފަހު، ބައެއް ކަންކަން ސާފުކޮށްދިނުމަށް މަޖިލީހުގައި އެދިފައެވެ.

ހަބީބު ވިދާޅުވީ މަޖިލީހަށް ފޮނުވި ސިޓީގައި، ރައްޔިތުންގެ ޚިޔާލު ހޯދުމުގެ އާންމު ވޯޓެއް ނަގާނަމަ ރައްޔިތުން ހޭލުންތެރިކުރުވަން ޖެހޭކަން ފާހަގަ ކޮށްފައި އޮންނާނެ ކަމަށެވެ. އަދި އެ ވޯޓުގައި އަހާނީ ސީދާ ކޮން ސުވާލެއްކަން ސާފުކޮށްދޭން ވެސް އެދިފައިވާނެ ކަމަށް އޭނާ ވިދާޅުވިއެވެ.