ހިޔުމަން ރައިޓްސް ކޮމިޝަން އޮފް މޯލްޑިވްސް، އެޗްއާރްސީއެމްގެ ނާއިބު ރައީސް އަހުމަދު އަދުހަމް އަބްދުالله ވަޒީފާއަށް ނުނިކުމެ އޮސްޓްރޭލިޔާގައި ދިރިއުޅޭތާ އެތައް ދުވަހެއް ވެފައިވާކަން ހާމަވެއްޖެއެވެ. 

"ވޮއިސް" އަށް މައުލޫމާތު ލިބިފައިވާ ގޮތުގައި، އޮފީހަށް މަސައްކަތަށް ނުނިކުންނަވައި އަދުހަމް އޮސްޓްރޭލިޔާގައި ދިރިއުޅުއްވަމުންދާތާ މިހާރު 4 ވަރަކަށް މަސް ދުވަސް ވެއްޖެއެވެ. އަދި އޭނާ މިހާރު އަންނަނީ އޮސްޓަރުލިޔާގައި އަމިއްލަ ވިޔަފާރިއެއް ހޯދައި އެއިންވެސް ނަފާ ހޯދަމުން ކަމަށް މައުލޫމާތު ލިބެއެވެ.

އޮސްޓަރޭލިޔާގައި އަމިއްލަ ވިޔާފަރި ހޯދައި އެއިން ފައިދާ ނަގަމުންދާއިރު، އެޗްއާރްސީއެމްގެ ނާއިބު ރައީސް ގެ މަގާމުގައި ހުރުމުގެ ސަބަބުން ދައުލަތުގެ ފައިސާއިންވެސް އޭނާއަށް މަގާމުގެ އުޖޫރަ އަންނަނީ ލިބެމުންނެވެ. 

Advertisement

އަދުހަމް ހިންގާ ވިޔަފާރީގެ މަޢުލޫމާތު --

އެގޮތުން ވަޒީފާއަށް ނުނިކުންނެވި ނަމަވެސް، މުސާރައިގެ ގޮތުގައި 44,000 ރުފިޔާ އަދި އެމްޕްލޯޔަރ ޕެންޝަންގެ ގޮތުގައި 2,100, އެކު ޖުމްލަ 46,100 އޭނާއަށް ކޮންމެ މަހަކުވެސް އަންނަނީ ލިބެމުންނެވެ. 

މަގާމުގައި ހުންނަވައި، ބޮޑު މުސާރަ ނަންގަވައިގެން ވަޒީފާއަށް އޮފީހަށް އަދުހަމް ނުނުކުރައްވާއިރު، އެޗްއާރްސީއެމުން ރާއްޖޭގައި ހިނގަމުންދާ، އެ ކޮމިޝަންގެ ޒިންމާގެ ދަށަށް އަންނަ މައްސަލަތައް ނުބަލާ ކަން އާއްމުންގެ ގިނަބައެއް އަންނަނީ ފާހަގަކުރަމުންނެވެ. 

ޚާއްސަކޮށް މި ރިޔާސީ އިންތިހާބުގެ ތެރޭގައި، ކެންޑިޑޭޓުންގެ ކެންޕެއިން ކުރުމުގެ ހައްގަށް އެރުމާއި، އަދި އިދިކޮޅު ފަރާތްތަކަށް ޝުޢޫރު ފާޅުކުރުމުގެ ފުރުސަތު ނުދީ އެއްވެސް ހައްގަކާއި ނުލައި ހައްޔަރު ކުރަމުންދިޔަ މައްސަލާގައި ގިނަ ބައެއްގެ ނުރުހުން އެ ކޮމިޝަނަށް އަންނަނީ އަމާޒުވަމުންނެވެ.

އެގޮތުގައި އެ ހުރިހާ ކަމެއް ހިނގަމުންދިޔަ އިރު ނިދާފައި އޮތުމަށްފަހު، އެޗްއާރްސީއެމް ދާދިފަހުން ހޭލާފައި ވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ އަނބިކަނބަލުން ފަޒުނާ އަހުމަދު ހުޔާ ސަރަހައްދަށް ކެންޕެއިނަށް ވަޑައިގެންނެވުމުން އެތަނުގައި ހިނގައި ދިޔަ ކަންކަމަށް ފަހުގައި ކަން ފާހަގަކޮށްލަން ޖެހެއެވެ.