ސުޕްރިންޓެންޑެންޓް އޮފް ޕްރިޒަންސް މޫސާ އަންވަރު މަގާމުގެ މަސްއޫލިއްޔަތުތަކުން އެކަހެރި ކުރައްވައިފިއެވެ.
ކޮމިޝަނަރު އޮފް ޕްރިޒަންސް އަހްމަދު މުހައްމަދު ފުޅު ސޮއި ކުރައްވާ ފޮނުއްވާފައިވާ އިންޓާނަލް މެމޯއެއްގައި ބުނެފައިވަނީ ސުޕްރިންޓެންޑެންޓް އޮފް ޕްރިޒަންސް މޫސާ އަންވަރުގެ ބަދަލުގައި 2023 ސެޕްޓެމްބަރު 26 ވަނަ ދުވަހުން ފެށިގެން އިންސްޓިޓިއުޓް ފޯ ކަރެކްޝަނަލް ސްޓަޑީސް ހިންގުމުގެ މަސްއޫލިއްޔަތުތައް ވަގުތީ ގޮތުން ހަވާލުވެވަޑައިގަންނަވާނީ ޑެޕިއުޓީ އޮފް ޕްރިޒަންސް އަބްދުލްޣަނީ ކަމަށެވެ.
އޭގައި މޫސާ އަންވަރު މަގާމުގެ މަސްއޫލިއްޔަތުތަކުން އެކަހެރި ކުރި ސަބަބު ބަޔާންކޮށްފައެއް ނުވެއެވެ.
އެކަމާއި ގުޅިގެން "ވޮއިސް" އަށް މައުލޫމާތު ދެއްވަމުން ކަރެކްޝަންސް ގެ މީޑިއާ އޮފިޝަލް ވިދާޅުވީ، މަގާމުގެ މަސްއޫލިއްޔަތުތަކުން އެކަހެރިކުރާ ސަބަބު ބަޔާން ކޮށްފައި ނެތީ އެއީ ދާއިމީ ގޮތުން ގެނެވިފައިވާ ބަދަލަކަށް ކަމަށް ވާތީ ކަމަށެވެ.
އަދި އެތެރޭގެ އެފަދަ "ސްޓްރަކްޗަރަލް" ބަދަލު ތަކާއި ގުޅޭ މައުލޫމާތު ތަކަކީ މީޑިއާ އާއި ހިއްސާ ކުރާ މައުލޫމާތު ތަކެއް ނޫން ކަމަށް ވެސް އޮފިޝަލް ވިދާޅުވި އެވެ.
ސުޕްރިންޓެންޑެންޓް އޮފް ޕްރިޒަންސް މޫސާ އަންވަރު މަގާމުގެ މަސްއޫލިއްޔަތުތަކުން އެކަހެރިކޮށްފައި ވާއިރު، ރިޔާސީ އިންތިހާބުގެ ދެވަނަ ބުރުގައި އެބޭފުޅާ ތާއީދު ކުރައްވަނީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު އަށް ކަމަށް މައުލޫމާތު ލިބެއެވެ.
Advertisement
This content is created and paid for by advertisers and does not involve Voice Journalists
