ދައުލަތުގެ ވެރިކަން ކުރާ ނިޒާމު ބައްޓަން ކުރެވިފައިވާ ގޮތާ މެދު ހިތްހަމަނުޖެހުމަކީ ނިމިދިޔަ ރިޔާސީ އިންތިޚާބުގެ ދެވަނަ ބުރުގައި ބާތިލް ވޯޓު ގިނަވި ސަބަބުތަކުގެ ތެރެއިން އެއް ސަބަބަށް ވުން އެކަށީގެންވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)އިން ބުނެފިއެވެ.

ރިޔާސީ އިންތިހާބުގެ ދެވަނަބުރުގެ ވޯޓުލުމާއި ގުޅިގެން އެޗްއާރުސީއެމުން ރޭ ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަންގެ މެމްބަރު އާމިނަތު ޝިފާއަތު އަބްދުއްރައްޒާގް ވިދާޅުވީ، ނިޒާމަށް އިތުބާރު ނުކުރާ މީހުން ވެސް ބާތިލް ވޯޓު ލުމުގެ ފުރުސަތު އެބަ އޮތް ކަމަށެވެ.

މީގެ އިތުރުން ޝިފާއަތު ވަނީ، ރާއްޖޭގެ ނިޒާމު އޮންނަ ގޮތުން އިންތިޚާބަށް ކުރިމަތިލާ އެއްވެސް މީހަކަށް ތާއީދު ނުކުރާނަމަ އެކަން ހާމަކޮށް ފާހަގަ ޖަހާނެ ގޮޅިއެއް ނޯންނަކަން ފާހަގަކުރައްވައި އެއްވެސް ކެންޑިޑޭޓަކަށް އަދި ނިޒާމަށް ވެސް ތާއީދު ނުކުރާކަން ދައްކަން ބައެއް މީހުން ވޯޓު ކަރުދާހުގައި ވޯޓު ބާތިލް ކުރާ ސަބަބު ލިޔާކަމަށް ވިދާޅުވެފައެވެ. 

އެކަން އިތުރަށް ތަފްސީލްކޮށްދެމުން އެޗްއާރުސީއެމުން ވަނީ، މީހުން ހިތްހަމަނުޖެހެނީ، ދައުލަތް ހިންގުމުގެ ނިޒާމުގެ ތެރެއިން ލިބިދޭ ޚިދުމަތްތަތަކާއި, ރައްކާތެރިކަމާއި, ހައްލުތަކަކީ އެންމެ އެކަށީގެންވާގޮތަށް އަދި އެންމެ ޒިންމާކުރުވަނިވި ގޮތެއްގައި ހިނގަމުންދާ ކަންކަންކަމުގައި ގަބޫލު ނުކުރެވޭތީ ކަމަށް ބުނެފައެވެ.އަދި ހަމަ އެޔާއެކު ޝިފާއަތު ވިދާޅުވީ އިލެކްޝަންސް ކޮމިޝަނުންނާއި ސަރުކާރުގެ އިދާރާތަކުން ވޯޓު ބާތިލް ވާނެ ހާލަތްތައް ވަރަށް ރަނގަޅަށް ރައްޔިތުންނަށް އޮޅުން ފިލުވައިދިން ކަމަށާއި ނަމަވެސް އެއަށްވުރެ ބޮޑު މަސައްކަތެއް ވޯޓު ބާތިލްވާނެ ހާލަތްތައް އަންގައިދިނުމަށް ކުރަން ޖެހޭކަމަށެވެ. 

މީގެ އިތުރުންވެސް އޭނާ ވިދާޅުވީ، އެކިކަހަލަ ޝަކުވާތަކާ ގުޅިގެންނާއި ވޯޓުގެ ސައްހަކަން ކަށަވަރު ކުރުމަށް އިލެކްޝަންސް ކޮމިޝަން (އީސީ)ން ސައްހަ ވޯޓާއި ބާތިލް ވޯޓު ކަނޑައެޅުމުގެ އުސޫލު ބަދަލުކުރަން ޖެހުނު ކަމަށެވެ. މިއީ ވެސް ބާތިލް ވޯޓު ގިނަވި ސަބަބެއްކަމަށް ބެލެވޭކަމަށް އޭނާ ވިދާޅުވިއެވެ.

މީގެ އިތުރުން އޭނާ ވިދާޅުވީ، އިންތިޚާބުގެ ފުރަތަމަ ބުރުގައި ބާތިލް ވޯޓު ކަނޑައެޅުމުގައި އެކި ވޯޓު ފޮށިތަކުގެ އެކި ވެރިން އެކި ގޮތަށް ކަންތައް ކޮށްފައި އެބަ ހުރި ކަމަށެވެ.

އިއްޔެ ބޭއްވި ރިޔާސީ އިންތިޚާބުގެ ދެވަނަ ބުރުގެ ވަގުތީ ނަތީޖާ ދައްކާގޮތުން ބާތިލް ވޯޓުގެ އަދަދަކީ 7،456އެވެ.

އެއީ، ފުރަތަމަ ބުރާ އަޅާ ބަލާއިރު 2،621 ވޯޓުގެ އިތުރުވުމެކެވެ. އިންތިޚާބުގެ ފުރަތަމަ ބުރުގެ ރަސްމީ ނަތީޖާ ބުނާ ގޮތުން، އެ ބުރުގައި ވަނީ 4،835 ބާތިލު ވޯޓު ލައިފައެވެ.