ރިޔާސީ އިންތިޚާބުގައި ވާދަކުރައްވައި ވަރަށް ތަނަވަސް އަޣުލަބިއްޔަތަކުން އިންތިޚާބް ކާމިޔާބުކުރެއްވި ރާއްޖޭގެ އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކާމިޔާބީ ފާހަގަކޮށް މާލޭ ސިޓީ ކައުންސިލުން އެމަނިކުފާނަށް މަރުހަބާ ދަންނަވައިފިއެވެ. 

މާލޭ ސިޓީގެ މޭޔަރގެ މަގާމުގައިވެސް ހުންނެވި ޑރ. މުޢިއްޒު ރިޔާސީ އިންތިހާބު ކާމިޔާބު ކުރެއްވުމާއި ގުޅިގެން ސިޓީ ކައުންސިލުން ނެރުނު ނޫސް ބަޔާނެއްގައި ބުނީ، ޑރ. މުޢިއްޒު މާލެ ސިޓީގެ މޭޔަރު ކަމުގައި ހުންނަވައިގެން ފާއިތުވި ދެ އަހަރު ދުވަހު މާލޭ ސިޓީއަށް ޚިދުމަތްކުރެއްވުމުގައި ނުހަނު ބުރަކޮށް މަސައްކަތްކުރައްވާފައިވާ ކަމަށެވެ. 

"ސިޓީ ކައުންސިލްގެ ހިންގުން ރަނގަޅުކުރައްވައި ހަރުދަނާކުރައްވައި، ޚިދުމަތްތައް ފުޅާކުރައްވައި ޒަމާނީ ހަލުވި ޚިދުމަތްތަށް ތަޢާރަފްކުރެއްވިކަން މި ފުރުޞަތުގައި ފާހަގަކުރަމެވެ. ލާމަރުކަޒީ ޤާނޫނުން ލާޒިމްކުރާ ކަންކަން އޭގެ ފުރިހަމަ މަޚްފޫމްގައި ތަރުތީބުން ކުރައްވައި ކައުންސިލްގެ އާމްދަނީ އިތުރުކުރައްވައި، ރައްޔިތުންގެ އަޑުއައްސަވައި މަޝްވަރާކުރައްވައި ރައްޔިތުން ގާތަށްވަޑައިގެން ޙާލުބައްލަވައި މަޝްވަރާ ބައްދަލުވުންތައް ބޭއްވިކަންވެސް މި ފުރުޞަތުގައި ފާހަގަކުރަމެވެ." މާލެ ސިޓީ ކައުންސިލުން ބުނެފައިވެއެވެ. 

Advertisement

މިއާއެކު މާލެ ސިޓީ ކައުންސިލުން ބުނީ، ސިޓީ ކައުންސިލްގެ ޓީމް ގޮވައިގެން އެމަނިކުފާނު މަސައްކަތްކުރެއްވި ދުވަސްތަކަކީ މުވައްޒަފުންނަށް އުހައުވެރިކަން ގެނެސްދިން، މުވައްޒަފުންގެ އަގުވަޒަންކޮށް މުވައްޒަފުންގެ ކުރިއެރުމަށް މަސައްކަތްކުރެއްވި އަދި މަސައްކަތްކުރުމަށް މަގުފަހިކޮށްދެއްވި ދުވަސްތަކެއްކަމަށެވެ. 

"މަނިކުފާނަކީ ޝައުގުވެރިކަމާ މުރާލިކަމާއެކު ރައްޔިތުންނަށް ޚިދުމަތްކުރެއްވުމުގައި ދެމިހުންނަވާ ބޭފުޅަކަށްވީހިނދު މިއަދު ސިޓީ ކައުންސިލް ދޫކުރައްވައި ތިޔަ ވަޑައިގަންނަވަނީ އެއަށްވުރެ މަތިވެރި އަމާނަތާ ޙަވާލުވެވަޑައިގެން އެއަށްވުރެ މަތިވެރި ޚިދުމަތްތަކެއް ޤައުމަށް ކުރެއްވުމަށްކަމުގައިހެޔޮހިތުން ޤަބޫލުކުރާހިނދު މަނިކުފާނުގެ ޚިދުމަތުގެތެރޭގައި މި ސިޓީވެސް ހިމެނިގެންދާކަމީ ލިބޭ ޝަރަފެއްކަމުގައި ދަންނަވަމެވެ." ސިޓީ ކައުންސިލްގެ ބަޔާނުގައި ބުނެފައިވެއެވެ. 

މިއާއެކު މުޢިއްޒުގެ މަސައްކަތުގައި މާތް الله ބަރަކާތްލައްވައި އެމަނިކުފާނުގެ ޒަޢާމަތުގެ ދަށުން ދިވެހި ގައުމަށް ފަހިކަމާ ފާގަތިކަން މިންވަރުކުރެއްވުން އެދި މާލެ ސިޓީ ކައުންސިލުން ވަނީ ދުޢާ ކޮށްފައެވެ.